Emitay di ega Abroŋ ma kuga yaŋaayay
15
Ban ATA EMIT na âbaahul Abroŋ ma aanool:“Abroŋ aatuba ûkoli.
Mata înje igam ebangalay yatayi;
ban poop mbi incaami wah wâamak.”
2 Ña Abroŋ naanool: “ATA EMIT, wa mbi uwulom, ma înje ibajutum aŋil? Ban Eliyeser ata Damaasku oo mbi aŋar wahaw wûmbaam! 3 Malhegen amiikeelaw ume abajim yanŋom oo mbi aŋar wahaw wûmbaam, mata uwultom aŋil.”
4 Be ATA EMIT naan Abroŋ: “Añooli kaŋ a mbi ubaj oo ma mbi aŋar wahaw watayi, be ntuwa âynaaw umu.”
5 Ban ATA EMIT naŋar Abroŋ be tîyaŋ âriiŋ naanool: “Ujiker ma hatiya di emitay, mante nooliye upin boota'ubu peh? Moomu kaŋ ma mbi êbajoorumay yatayi emeeŋ.”
6 Ña Abroŋ nâynen ATA EMIT. Momakiimom ma ATA EMIT asohumoom non anaw alhegenumaayaw.
7 Ban ATA EMIT naan Abroŋ joon: “Înje Emitay, yacaalhelim di êsukay yata Ur di etaamay yata Kâldewa ma mbi iwuli etaama'uye ma ega yatayi.” 8 Be Abroŋ narinkool aanool: “Înje bu mbi iga ma îmir kaan etaama'uye mbi ega yûmbaam?” 9 ATA EMIT naanool: “Uŋallom ebe yanor, di ejaameen yanor, di êgaraniina yîinaay yanor sagam ujaañaw ûhaaji, di kâlaabaŋ kanor, di poop êpaakiit yanor.”
10 Ña Abroŋ naŋar uncaamaw uwu âriiŋ, natii'wo di tutaru, ban naga kutijaa'uku kujooŋoor. Be atijut kâlaabaŋaku di êpaakiitay. 11 Ña kuringaaku di kûkayil ki kulen di uncaamaw uwu, be Abroŋ ya acah di ko.
12 Na tigam ma tijon, Abroŋ naŋot nâm. Di kaŋota'uku najuk emuucenay, nawollo. 13 Be ATA EMIT naanool: “Ûmir kaan êbajoorumay yatayi mbi elako di êsuk yaayu ma kuga bo emaasooraay, ban mbi kugawii'bo emiikeelay ma kûgaykoorii'bo ujaañaw sîteemeerasu sibakiir (400). 14 Be înje mbi îgaykoor poop bukana'uku kagawiim emiikeelay, ban na mbi kûcaalhumuu'bo, mbi kûŋarul wahaw lhay watayiil. 15 Be aw mbi uhalhen noon, ban mbi uket di kâsuumaayaku ma ukay ki ûtoo'dô simpayi sihaan. 16 Be ebajulankenay yatayi ebakiirenay, yo ya mbi êlaañul be di etaama'uye. Mata înje îcaalhenorut para bukana'uke kagam amorewwii, mata kûbajumiñaku katayiil kûriiŋorut ta iliikum.”
17 Na tigam tijone, di muucen mib. Abroŋ najuk êphurnaay ma ya ekooretum, di poop sambunasu sâlum ma ya sireesoor tutaru di kutijaa'uku kata uncaamaw. 18 Ña noo huka'uhu, no na ATA EMIT agam yaŋaayay koo di Abroŋ ma aanool: “Înje iwuum etaama'uye êbajoorumay yatayi. Cûkumul di hulhuwahu hata Ejiptu, be kaŋ di haahu hâmakaahu hata Ewphratis. 19 Bagam etaamay yata sîsukasu sata kenewwii, di kenesewwii, di kadmonewwi 20 di êtewwii, di perisewwii, di rephayiŋii, 21 di amorewwii, di kananewwii, di jirgasewwi di poop jebusewwi.”