Abroŋ nâmelhenul Loo
14
Nownu, âyyaw ata Sinar aaneyim Anraphel, di ata Elasar aaneyim Ariyoki, di ata Elaŋ aaneyim Kedorlawomer, di ata Goyiŋ aaneyim Tidal, 2 di kukay ki kutiik di âyyaw ata Sodooma aaneyim Bera, di ata Gomoora aaneyim Birsa, di ata Adma aaneyim Sinabi, di ata Zeboyiŋ aaneyim Semeber, di poop ata Beela, aaneyim Zowar. 3 Kûyya'uku peh hutokay, di kukay ki kûmeboor di bûlahabu bata êsukay yata Sidiŋ, taaneyim Hulhuwahu Hahiraahu. 4 Mata, ujaañaw kuŋen di ugaba (12) na kûyya'uku ya kuyuupum Kedorlawomer, be na kugam ujaañaw kuŋen di ûhaaji, di kulat kayuupool.5 Di kajaañaku kagawom kunŋen di ubakiir, Kedorlawomer, di kîyyaku ka kugam yaŋaayay, di kutiik rephayiŋii, kammi Astaroti-Karnayiŋ, di jusiŋi kammi Kaŋ, di emiŋii kammi Save-Kiriyatiŋ, 6 di orewwi kammi di kurimbiliŋaku kata Sêyir, be kaŋ El-Paraŋ, tammi ñata ekinkay, ma kuwapiil. 7 Ban di kûlaañumuu'bo, ma kukay ki kutiik kata En-Mispati, baaneyim poop Kadis, ma kuwapiil ma kuŋar etaamay peh yata amalekiitayi, di yata amorewwii kakimmi Asasoŋ-Tamar.
8 Ña âyyaw ata Sodooma, di ata Gomoora, di ata Adma, di ata Zeboyiŋ, di ata Beela, baaneyim poop Zowar, di kûlhaalowul ma kujuum di bûlahabu bata Sidiŋ, 9 ma kutiik di âyyaw ata Elaŋ aamom Kedorlawomer, di ata Goyiŋ aamom Tidal, di ata Sinar aamom Anraphel, di ata Elasar aamom Ariyoki. Kûyya'uku ebakiiray, ko katiikum di buku kagam hutok. 10 Be hûlaha'uhu hata Sidiŋ, kusunaku dôo kata egodoroŋay. Ña na âyyaw ata Sodooma, di ata Gomoora na kugam kuteylo, di kulo di kusuna'uku. Bukan kaaku kamellhum di kutey be di kurimbiliŋaku. 11 Ña kûyya'uku ebakiiray kaheekiim, di kuŋar wahaw wata âyyaw ata Sodooma, di ata Gomoora, di poop wahaw peh wata huriyahu hatayiil, ma kukay di wo. 12 Di kukay poop di Loo akimbom, aamom añool atii Abroŋ, di wahaw watawool peh.
13 Be aahu amellhum, nâkayil ki añaaŋen mo Abroŋ agam êbrew, oo ma akinnom ñata di ununukenaw wata âynaaw agam amorew aaneyim Manre. Âynaaw umu koo di atiyool aaneyim Eskol, di poop Aner, buko bapaalaayabu di Abroŋ. 14 Na Abroŋ ajammi kaan añool atiyool omu ma asohim, ña nabandoor bukanaku kârimmi sîteemeer sîhaaji, di kunŋen di hutok di êhaaji (318) kabajim yanŋool kaalim hutiikahu, ma kusoolheniil be Daŋ. 15 Be na kugam kûriiŋe, Abroŋ naga bukanaku katawool waasaaw, ban nayawiil hukaru. Na ayawiim, naheekiil ma acah di buko ma kuhulh Damaasku be Obaa. 16 Ña nâyabul wahaw wata êsukay, nâyabul Loo aamom añool atiyool, di wahaw watawool, di yaaraay, di poop bukan kaaku.
17 Be na Abroŋ eheekulom âyyaw aamom Kedorlawomer, di poop kîyyaku ka kubomum, na agam ômalaañewuum, ña âyyaw ata Sodooma nakay ki kupam di bûlahabu bata Sabe, baaneyim poop bûlahabu bata Ây.
Melkisedeeki nañaan Abroŋ
18 Âyyaw ata Saleŋa agam poop amaaŋenaaw ata Emitay Yahammi Wahaw Peh aaneyim Melkisedeeki, nâkayil ki awul Abroŋ hûmburuwaahu, di bunukabu. 19 Ban nañaanool ma aanool:
“Emitay Yahammi Wahaw Peh,
yacookoorum hatiya di emitay, di etaamay,
ewul Abroŋ kâsuumaay.
20 Usalaal
Emitay Yahammi Wahaw Peh,
yagawim uheek kûsuumutaaku katayi!”
Ña Abroŋ nawulool dîisimub yata wahaw peh wa ayabulom wata kûyya'uku.
21 Ban âyyaw ata Sodooma naan Abroŋ: “Uwulom keb bukanaku, ma uŋar wahaw wa uyabulom.” 22 Be Abroŋ naanool: “Iyiy. Ma inuuri ATA EMIT, agam Emitay Yahammi Wahaw Peh, yacookoorum hatiya di emitay, di etaamay ma eeni, 23 eetubi iŋar wah watayi, palimo kal, palimo poop kaneew kata ekatab yatayi, ka mbi ôonul aw ugawommi isaanumo. 24 Moo, îkint makeel matayi, mante pîya wahaw keb wa bukanaku kûmbaam kurim ban. Be Aner, di Eskol, di poop Manre ka ukaayum, koo kaalim kuyab wah wakeel.”