Abroŋ di kuwaasoor koo di Loo
13
Ban Abroŋ di kûcaalh di êsukay yata Ejiptu koo di apañoorool, di poop Loo ma aŋar wahaw hatawool peh ma kukay be di êsukay yata Negebi. 2 Be Abroŋ oo ma asaanumonom noon, ma abaj uncaamaw, di praata, di poop ûuru.3 Ban Abroŋ nâcaalhumul Negebi, ma ya areesoor poopii nâriiŋ di êsukay yata Betel. Ña najaŋen be ta agawemmi bûngungabu tammi tutaru yata êsukay yata Betel di yata Ay. 4 Âriiŋ nakay be ta agam Altar ki âbinken ATA EMIT.
5 Loo a ya kureboorum di Abroŋ, nabaj poop sîgaraniinaasu lhay, di sibaasu, di poop ûngungaw. 6 Ña Abroŋ koo di Loo, ma kubaam uncaamaw wayejum, kubajut kulako tanor mata etaamay ta kulakom mahosamu muyejutiil. 7 Ña bûtekenaabu bata Abroŋ, di bucec di bata Loo. Be nownu kananewwii, di poop perisewwii, koo baroŋ ma kukimmi di etaama'uyu.
8 Ña Abroŋ naan Loo: “Loo! Ula mumulet bi ubajaal silob, ban poop bûtekenaabu batoola, mumulet bi bubaj silob, mata ula anaw anoraw. 9 Moo, etaamay yooye, mbi uwaasoora! Ôonu'jaa, ukay be karebaku kûriraku, înje nikay kaaku kumayaku. Be ôonu'jaa poop, ukay kaŋen kumay, înje nikay kaaku kûriraku.”
10 Ña Loo naga lhâar ma ajiker butondaabu poobo bata ba kaalaku kaaneyim Jordoŋ kemmi, bakayum be di êsukay yata Zowar. Ña najuk ma bujakum non ewoortaay yata ATA EMIT, non poop non etaamay yata Ejiptu. Be nownu ATA EMIT oo bâbuyorut êsukay yata Sodooma, di Gomoora. 11 Ña Loo, najot kareba'uku kata butondaabu bata kaalaku kata Jordoŋ, ña ban nakay be kareba'uku kata ba jaley âcaalhumewuum ma kuwaasoor di Abroŋ. 12 Abroŋ nakin di etaamay yata Kanaaŋ, ma Loo akay ki akin di butondaabu ñata di êsukay yata Sodooma. 13 Be bukanaku kata êsuka'uyu kujakut, mata ya kuga kûbajumiñaku kâamak di ATA EMIT.
14 Na Loo kuwaasoorum koo di Abroŋ, ATA EMIT naan Abroŋ: “Abroŋ! Uga lhâar ma ujiker ba jaley âcaalhumewuum, di ba alowem, ban nujiker kaŋeni kûrir, di poop kaaku kumayaku. 15 Etaama'uyu peh ya ujuum umu, mbi iwuli yo ma jiŋaa'yo di êbajoorumay yatayi be nanoonan. 16 Ban mbi iga êbajoorumay yatayi emeeŋ non balhuus. Non ma an aaliitum apin balhuus, moomu poop kaŋ ma êbajoorumay yatayi an aatubi aali apin yo. 17 Moo, ulhaalo ma ureesoor etaama'uyu peh mata niwuli yo ban.”
18 Ña Abroŋ narooc bûngungabu batawool ma akay ki akin ñata ununukenaw aaneyim karvaaju wata âynaaw aaneyim Manre ata êsukay yata Ebroŋ, ban nacookoor to Altar be bata ATA EMIT.