Emitay di êwool Abroŋ
12
Huk haahu, ATA EMIT naan Abroŋ: “Ûcaalh di eluupay yata ampayi di êsukay yatayi ta bukani kemmi, ma ukay be êsukay yaayu ya mbi îyisi.2 Be Mbi iga êbajoorumay yatayi ega yâamak,
mbi iwuli hûpiiraahu
ma uga an âamak,
ban mbi êsukay ebaj hûpiiraahu matayi.
3 Mbi iwul hûpiiraahu bukanaku kâkimmi ubaj hûpiiraahu.
Niga bukanaku kâkimmi upaawo, ma kupaawo.
Êbajoorumay peh kammi di etaamay,
mbi kubaj hûpiiraahu matayi.”
4 Ña Abroŋ nakay non ma ATA EMIT aloboom. Be na ammi akay, di kukay di Loo. Na Abroŋ âcaam di êsukay yata Araŋ, oo ma abaanom ujaañaw bukanaku êhaaji di kunŋen di hutok (75). 5 Na akayum, nakay di apañoorool Saray, di añool atiyool aamom Loo, di wahaw watawool peh, di poop emiikeelay yatawool ka abaambom, ma ajaŋen be di êsukay yata Kanaaŋ.
6 Âriiŋ na akay be tiŋatu tâñoyyaatu taaneyim More, ta bununukenabu bâmakaabu bemmi baaneyim karvaaju, di êsukay yata Sikeŋ. Nownu bukanaku kata Kanaaŋ koo dô ma kukimmi. 7 Be na agam oo boo, ATA EMIT nâcallhool ma aanool: “Mbi iwul etaama'uye êbajoorumay yatayi.” Ña Abroŋ nacookoor to Altar be bata ATA EMIT âcallhoom.
8 Ban nâcaalhumuu'to ma akay be karebaku kata kurimbiliŋaku, âriiŋ nabet êsukay yata Betel ba jaley alowem, nabet poop yata Ay ba jaley âcaalhumewuum, najuumen to bûngungabu batawool. Ban nacookoor to joon Altar, ma âbinken to ATA EMIT. 9 Ban nâcaa'to joon ma ya ajaŋen kotiit kotiit ma ajooŋoor di êsukay yata Negebi.
Abroŋ nakay be Ejiptu
10 Nownu bacaarabu di bûlowum êsukay yata Kanaaŋ, ña Abroŋ nakay ma nki alako Ejiptu. 11 Be na kugam kuhuute kâriiŋ, naan apañoorool: “Nîmire kaan aw anñaakanaw ajakum, 12 ban mbi yîinaay kata Ejiptu kujuki di kêenul aw apañoorom, ban mbi kubujom ma kuŋari. 13 Moo, mbi ooniil aw âliinom, ma mbi ooliyaal ubaja kâsuumaay ma keetubi kubujom.”
14 Be na kugam kûriiŋe Ejiptu, bukanaku kata dô di kujuk non ma Saray âjakikoorum. 15 Na yahaanay yata di kâyyaku kujukoom, ña ya kûrijool ta ây ammi. Ña di kuŋarool be di eluupay yata âyyaw. 16 Ña âyyaw umu nacookoor Abroŋ jak mata Saray, ban nawulool sîgaraniinaasu, di sibaasu, di simbaamasu, di kameelusii, di poop emiikeelay.
17 Be ATA EMIT naga âyyaw, di poop bukanaku kammi yanŋool ma kûjuut lhînŋa mata Saray aamom apañoor Abroŋ. 18 Ña âyyaw nâwoolul Abroŋ ma arinkool aanool: “Kama mata wa ma ugawumommi ume? Mata wa ma oonumutommi añakanaw ume apañoori? 19 Mata wa noonom oo âliini, ma ugawom iŋarool iyab? Ña apañoori oome, uŋarool ma ukay.” 20 Ña âyyaw nalob bukanaku katawool ma kuga Abroŋ ma aŋar apañoorool, di wahaw peh watawool ma âcaa'dô Ejiptu.