Emitay di ega ma bukanaku kujamoorut balober
11
Bûtiyaar bukanaku peh kalakonom di etaamay, elob yanor kulobeenem. 2 Be na kûcaalhumulom ba jaley âcaalhumewuum, di kujuk tiŋatu di etaamay yata Babilooniya tarem kerebeb, ña di kukin to.3 Ña di kulob kêenul: “Mbi ucookooraal kûluubaaku kata bukapabu, ban nubolaa'ko jak.” Ña di kucookoor ko, ban di kuŋar egodoroŋay kûteepum.
4 Ban di kêenul: “Mbi ucookooraal êsukay yâamak, ban nuteepaa'dô eluupay yâraagim be hatiya di emitay, ma mbi ubajaal êriibiinaay ma aatuba uwasooraal di etaamay.”
5 Ña ATA EMIT nâwalowul ma nki ajuk êsuka'uyu, di poop eluupa'uyu ya kucookoorem di yo. 6 Ña nâanul: “Bukana'uke bukanaku kanoraku, ban ya kulob elob yanor. Moo, ma kugawem di ume, iwalhii'bo jaa, wahaw wa mbi kûkin kuga, manooman mbi kuga wo. 7 Uwaluwaal ma nki ûguulhaal elobay yatayiil, ma keetubi kujamoor balober.”
8 Ña ATA EMIT nawaasiil tiŋa'utu, ma kuwaa'bo kateepa'uku ma kuwaasoor di etaamay peh. 9 Momakiimom êsuka'uyu di keen yo Babel,a mata to ta ATA EMIT agam bukanaku ma keetubi kujamoor balober ma agawiil kuwaasoor di etaamay peh.
Êbajoorumay yata Seŋ
10 Êbajoorumay yata Seŋ mo ma egam. Na Emitay êbuyummi mumelamu wahaw peh, ban ga ujaañaw ugaba, Seŋ naga no ujaañaw êteemeer (100), ña nabaj Arphasadi. 11 Ban nalako to ujaañaw sîteemeerasu hutok (500), nabaj kuŋil kaaku kîinaaku, di kaaku kaaraaku. 12 Na Arphasadi agam ujaañaw anabawo di kunŋen di hutok (35), nabaj Salaa. 13 Ban Arphasadi nalako to ujaañaw sîteemeerasu sibakiir, di ûhaaji (403), nabaj kuŋil kaaku kîinaaku di kaaku kaaraaku.
14 Na Salaa agam ujaañaw anabawo di kunŋen (30), nabaj Eber. 15 Ban nalako to ujaañaw sîteemeerasu sibakiir, di ûhaaji (403), nabaj kuŋil kaaku kîinaaku, di kaaku kaaraaku.
16 Na Eber agam ujaañaw anabawo di kunŋen di ubakiir (34), nabaj Pelegi. 17 Ban nalako to ujaañaw sîteemeerasu sibakiir di anabawo di kunŋen (430), nabaj kuŋil kaaku kîinaaku, di kaaku kaaraaku.
18 Na Pelegi agam ujaañaw anabawo di kunŋen (30), nabaj Rewu. 19 Ban nalako to ujaañaw sîteemeerasu sigaba di hutok di ubakiir (209), nabaj kuŋil kaaku kîinaaku di kaaku kaaraaku.
20 Na Rewu agam ujaañaw anabawo di kunŋen di ugaba (32), nabaj Serugi. 21 Ban nalako to ujaañaw sîteemeerasu sigaba di hutok di ugaba (207), nabaj kuŋil kaaku kîinaaku di kaaku kaaraaku.
22 Na Serugi agam ujaañaw anabawo di kunŋen (30) nabaj Nawor. 23 Ban nalako to ujaañaw sîteemeerasu sigaba (200), nabaj kuŋil kaaku kîinaaku di kaaku kaaraaku.
24 Na Nawor agam ujaañaw anabawo di hutok di ubakiir (29), nabaj Tera. 25 Ban nalako to ujaañaw êteemeer di kunŋen di hutok di ubakiir (119), nabaj kuŋil kaaku kîinaaku di kaaku kaaraaku.
26 Na Tera agam ujaañaw bukanaku êhaaji di kunŋen (70) nabaj balaabu êhaaji: Abroŋ, di Nawor, di Araŋ.
27 Be êbajoorumay yata Tera mo ma egam. Ma abaam Abroŋ, di Nawor, di Araŋ. Ban Araŋ nabaj Loo. 28 Be Araŋ naga ban naket di êsukay ta abajim yaaneyim Ur, di etaamay yata Babilooniya, ampawool Tera oo baroŋ to. 29 Abroŋ nayab añakanaw aaneyim Saray. Nawor poop nayab aahu aaneyim Milka aamom atii Iska, kuñool Araŋ. 30 Be Saray ajamut huhaana.
31 Ban Tera naŋar añoolool Abroŋ, di ebajulankenay yatawool Loo, aamom añool Araŋ, di poop âsampulool Saray aamom apañoor Abroŋ, ma kûcaalh di êsukay yata Ur di etaamay yata Babilooniya, ma kukay be di etaamay yata Kanaaŋ, kûriiŋ di kukin di êsukay yaaneyim Araŋ.
32 Be na Tera agam ujaañaw sîteemeerasu sigaba, di hutok (205), ña nakee'bo di êsuka'uyu.