ATA EMIT nalob kaan Saara mbi abaj aŋil
18
Ban huk haahu, baleyabu ma bûhaahum cûm, ATA EMIT nâcaalhul Abrawoŋ, oo ma aleehom di êtingaay yata bûngungabu batawool ñata di ununukenaw wata Manre waaneyim karvaaju. 2 Na Abrawoŋ agalom hâat, najuk yîinaay êhaaji ma kujummi kujooŋoor d'oo. Ña Abrawoŋ nalhaalo to di êtingaay, ma atey ki kupam. Âriiŋ nâtiigen ma âsik be di etaam, ban nâanul: 3 “ATA EMIT, uñankiitom jaa, aatuba uhulh yanŋom, mata înje agorooraaw atayi. 4 Jikobom ma iwullul jimel ma jikulhen ûkandumaw, ban di jihepulen ute deh di bununukena'ube, 5 mata jaat jîrillo ute yanŋom. Niŋalluul poop jîmburuwa jitokoñ ma siniilasu satawuul sîtik, ban di jihulh.” Ña di keenool: “Jake, uga non ma uloom.”6 Ña Abrawoŋ nañaah cab ki atoo'dô Saara di bûngungabu âriiŋ naanool: “Uga cab ma uliik ukoopaaw ûhaaji wata baporabu bagawaabu kururur ma ubol kûmburuwaaku.” 7 Ban natey joon cab be di bubababu bata sibaasu, âriiŋ nâŋarul jibaaju jâlagum ki awul agorooraaw atawool. Ña agorooraaw umu nacookoor jo cab. 8 Ban Abrawoŋ nâŋarul manteega, di miilhamu, di poop eluway yata jibaa'uju ki awalenii'to. Ban na kugam kokariyem di bununukena'ubu, Abrawoŋ najuum hûg ñata ta kemmi.
9 Di kurinkool keenool: “Kama apañoori Saara ôomey?” Naaniil: “Omma di bûngungabu.”
10 Ña ATA EMIT naanool: “Mbi îlaañul timo maame bulay be ute. Be apañoori Saara, mbi abaj aŋilaw.” Be Saara oo kujeeŋanda Abrawoŋ di êtingaay ma ajamem. 11 Nownu buko ma kuhallemmi ban, ban poop Saara matawool ma mubawom ban. 12 Ña Saara nâlhu di buynumabu batawool ma âanul: “Ma ûli di apañoorom uhallemmi ban ume, bu mbi sûumom ma ûhugoor di apañoorom?”
13 Ña ATA EMIT narink Abrawoŋ aanool: “Kama mata wa ma Saara âlhuwummi, ma âanul aaliit abaj aŋil ma ahallemmi ban? 14 Kama wahaw wowu to wa ATA EMIT aaliitum aga? Timo maame bulay înje ma ilallom be ute, mo timo maame bulay apañoori Saara, oo di aŋilaw.”
15 Be mata ma Saara âkolim, nañoosoor ma âanul âlhuwut. Be Ata Emit naanool: “Ootuba ulob umu, mata nûlhulhum.”
Abrawoŋ nalhaw mata Sodooma di Gomoora
16 Ban kûynaa'uku di kulhaalo ma kukay kujooŋoor di êsukay yata Sodooma. Ña Abrawoŋ nasiseniil.
17 Ban ATA EMIT nalob âanul: “Mata wa ma mbi îñooroorum Abrawoŋ wahaw wa îkimmi iga?” 18 Ban Abrawoŋ mbi aga anaw âamak ata êbajoorumay yâamak yabaam sembe, ban mbi âmbasuk peh kubaj hûpiira matawool. 19 Mata oo anaw a înje ijotum ma mbi aga kuñoolool, di ebajulankenay yatawool ma kusoh buruŋabu bata ATA EMIT ma kuga wahaw wa âkimmi, ma oo mbi egawool wahaw wa eloboom mata wo.
20 Ña ATA EMIT naanool: “Maama lobeyim di mo mata Sodooma di Gomoora muhahe, kûbajumiñaku katayiil kûkoliyeniye ha. 21 Moo, ma ikay ki îjukul wahaw wa ijammi walobeyim di wo matayiil mante malhegen; be gawut jaa malhegen, nîmir.”
22 Ña egabaay di kujaŋen ma kukay be Sodooma, be Abrawoŋ di kujunto di ATA EMIT. 23 Ña Abrawoŋ nâhugool ma arinkool aanool: “Kama mbi ûbuy bukanaku kagawem jak di manor, di kaaku kâgaworiitum jak? 24 Kama nokoor jaa non di êsuka'uyu, bukanaku kagawem jak koku dô kârimmi bukanaku egaba di kunŋen (50), mbi ûbuy yo? Ootubi uwaa'yo bo mata bukana'uku kagawem jak? 25 Ootuba uga umu. Mbi ubuj bukanaku kagawem jak di manor di kaaku kâgaworiitum jak! Kama maama mbi uga anaw âgaworiitum jak, nuga mo poop aahu agawem jak? Mumulet bi uga umu. Aw jagam atallenaaw ata etaamay peh, nuga umu?”
26 Ña ATA EMIT naanool: “Îjuu'dô jaa bukanaku kârimmi bukanaku egaba di kunŋen (50) kagawem jak, mbi iñankiit êsuka'uyu matayiil.”
27 Abrawoŋ naanool: “ATA EMIT, palimo ma igawutum an, be ma imuntemmi ma uloba, ubonket ma irinki joon. 28 Kama ga jaa noon bukanaku hutok kuleem di bukana'uku kagam bukanaku egaba di kunŋen, mbi ûbuy êsuka'uyu peh mata bukana'uku hutokay kuleem?” Be ATA EMIT naanool: “Nokoor jaa non înje îjuudom bukanaku kârimmi bukanaku egaba di hutok (45), eetubi îbuy yo.”
29 Abrawoŋ narinkool joon aanool: “Ma ga jaa noon aw ûtoodom bukanaku kârimmi bukanaku egaba (40) kagawem jak, nûbuy yo?” Naanool: “Eetubi iga yo makeel, mata bukana'uku.”
30 Abrawoŋ naanool joon: “ATA EMIT, aatuba ubirik d'înje mata ma irinki joon. Kama nokoor jaa non aw ûtoodom bukanaku kârimmi anabawo di kunŋen (30), nûbuy yo?” Naanool: “Eetubi iga yo makeel, înje bâjukee'dô bukana'uku kârimmi anabawo di kunŋen.”
31 Abrawoŋ naanool joon: “ATA EMIT, ma imuntemmi ma uloba, uñankiitom. Kama nokoor jaa non aw ûtoodom bukanaku kârimmi anabawo (20), nûbuy yo?” Be ATA EMIT naanool: “Ga mo jaa, eetubi îbuy yo matayiil.”
32 Abrawoŋ nalaañ aanool joon: “ATA EMIT, ootuba ubirik d'înje ma irinki hanor bamiñaa. Ma nokoor jaa non aw ûjuudom bukanaku kârimmi kunŋen (10), nûbuy yo?” Be ATA EMIT naanool: “Iyiy, eetubi îbuy yo matayiil.”
33 Na ATA EMIT kuloom di Abrawoŋ ban, ña najaŋen ma akay. Abrawoŋ nâlaañul be yanŋool.