Emitay di ega yaŋaayay di Nowe
9
Ban Emitay di eñaan Nowe koo di kuñoolool ma yeeniil: “Jibajoor ma jimeeŋen etaamay. 2 Be bânunkureŋabu peh, di baabu bâhuuloorem, di basuwaabu, di poop siwolasu, mbi ya sîkoliyuul, mata wahaw uwu peh wowu di uŋenaw watawuul. 3 Ban poop uncaamaw, di bânunkureŋabu, mbi buga huriyahu hatawuul non ma iwuluum wahaw wagiitenim di etaamay.4 “Be aatuba jitokoñ eluw yata wah waŋaalutim ma hûsimahu hûcaalh, mata hoo hukiim di uroŋ. 5 Ban poop an abuj jaa apaalool, manooman mbi irinkool. Be palimo ênunkureŋ, be mante encaam, ebuum an, mbi irink yo. Malhegen an peh abuum apaalool, mbi irinkool.
6 Mata ma Emitay ecookoorum ajamaataw anokoor di yo,
moo an abuj jaa apaalool,
aahu poop mbi abujool.
7 Be miwuul, jibajoor ma mbi sîbajoorumasu satawuul simeeŋen etaamay peh.”
8 Ban Emitay di yeen joon Nowe di kuñoolool: 9 “Mowme mbi ugawaal yaŋaayay, di sîbajoorumasu satawuul, 10 di poop wahaw peh wammi utu di miwuul: bânunkureŋabu, di uncaamaw, di basuwaabu bâcallhom di ebaarukay. 11 Yaŋaaya'uye ya mbi ugawaal, eetunki îbuyrerum mumel wahaw peh wayiihem wammi di etaamay. Mata emit eetunki êluburerul ma êbuy etaamay.”
12 Ban Emitay di yeen Nowe joon: “Ma iga êmanjumay yata yaŋaayay ya ugawaam, di poop wahaw peh wayiihem wa jemmi tanor, ya mbi elako to be nanoonan. 13 Mbi iga enabay hatiya di emitay ya mbi ega êmanjumay yata yaŋaayay yûmbaam di wahaw peh wammi di etaamay. 14 Na mbi îlaawul ma enabay êcaalhul di uwiiñaw, 15 ña niwollho yaŋaayay ya ugawaam, di poop wahaw peh wayiihem wammi di etaamay. Ña eetunki îluburerul ma êbuy wahaw peh wayiihem wammi di etaamay. 16 Na mbi enabay êcaalhul di uwiiñaw nijuu'yo, ña niwollho yaŋaayay yaatumbi ebawrer ya ugawaam, di poop wahaw peh wayiihem wammi di etaamay.”
17 Ban di elaañoo'mo joon yeenool: “Enabay mbi ega êmanjumay yata yaŋaayay ya ugawaam, di poop wahaw peh wayiihem wammi di etaamay.”
Nowe koo di kuñoolool
18 Kuñool Nowe kâcallhom di ebaarukay koo keemom, Seŋ, di Kaŋ, di Japhe. Kaŋ oo agam ampaw bukanaku kata Kanaaŋ. 19 Ña kuŋila'uku êhaajiyaay kata Nowe, ko kabaam bukanaku kawaasoorum ma kukin di etaamay peh. 20 Be Nowe ma aganom awañaaw, ña nagiiten muriyaayamu maaneyim ûuba. 21 Nâriiŋ huk haahu, najaken bunukabu bata ûuba nâkali, ña nakay ki aŋot barindiŋ di bûngungabu batawool. 22 Añoolool Kaŋ aamom ampaw bukanaku kata Kanaaŋ najuk barindiŋabu batawool, nakay ki añaaŋen kutiyool egabaay. 23 Ña kutiyool buku kaamom Seŋ koo di Japhe, di kuŋar humantaahu kuga di ucakaw watayiil ban di kureesum kujeeŋanda ki kumeten ampayiil, ma ketuba kujukool barindiŋ.
24 Be na bunukabu bugam bubawe di ampayiil, ña nâmir kaan añoolool âtitaw, mo ma agawoom. 25 Ña nañaanool kôji ma âanul:
“Kanaaŋ mbi apaawo! Ban mbi aga amiikeelaw ata kumiikeelaku kata kutiyool.”
26 Ban nâanul joon:
“ATA EMIT ata Seŋ mbi asali!
Be Kanaaŋ mbi aga amiikeelaw atawool.
27 Japhe, Emitay mbi ebaŋen etaamay yatawool;
be êbajoorumay yatawool mbi ekin tanor di yata Seŋ;
ma Kanaaŋ mbi aga amiikeelaw atayiil.”