Mumelamu di mulhaalh
8
Be Emitay di enongoor mata Nowe, di bânunkureŋabu, di poop uncaamaw walakom di ebaarukay. Ña di êgawul ehentelaay êtekul ma mumelamu mulhaalh. 2 Ña sîyiinumasu da mumelamu ya mûcallhom hatiya, di sibab, sîpungupungasu poop salakom di etaam, di silhook, ña emitay di ewalh kalubaku. 3 Ña mumelamu ya mulhaalh jinŋet, jinŋet. Na kukaku êteemeer di bukanaku egaba di kunŋen (150) kugam kûriiŋe, ña moo ma muŋasom ban. 4 Be na hulheeŋahu hagakom hutok di kugaba, hugam kukaku kunŋen di hutok di kugaba, ña ebaarukay di esiis di kurimbiliŋaku kata Araraa. 5 Ban mumelamu di menkem ma ya mulhaalh be na mugam kulheeŋaku kunŋen. Di hukahu hûtiyaarahu hata hulheeŋa'uhu, ña kurimbiliŋaku di kûyuugenul hatiya.6 Na kukaku bukanaku egaba (40) kugam kubawe, Nowe nâbabul eyinumay yata ebaarukay, 7 ban naga egaanaaraay ma êcaalh. Ña di êyit ma ya ekay, di êlaañul, be kaŋ na mumelamu mulhaalhum di etaamay. 8 Ban nawalhen joon êpaakiitay ma nki êjukul mante mumelamu mulhaalhe ban. 9 Be ma mumelamu murommi ma muhoomemmi etaamay pooyo, ña ejukuloot tiŋatu ta mbi elen, di êlaañul. Ña Nowe nañuur kaŋenaku ma aga yo di ebaarukay. 10 Ban nakob kukaku hutok di kugaba, nawalhen joon êpaakiitay. 11 Be na egam elallo baheperabu, di êŋarul katojaku kata buyaajabu baaneyim oliveyra. Ña Nowe nanamulen kaan mumelamu mulhaalhe ban. 12 Ban nakob joon kukaku hutok di kugaba, nawalhen êpaakiitay joon, be haahe elalloot.
13 Na Nowe agam ujaañaw sîteemeerasu hutok di yanor, di kajaañ kanor (601), mumelamu di mubawo jalhaalhaju. Na hulheeŋahu hûtiyaarahu hugam huk hanor, ña nâcaalhen bâniigenerabu bata ebaarukay ma ajiker, najuk ma etaamay elhaalhum. 14 Na hulheeŋahu hugabutahu hugam kukaku anabawo (20), ña etaamay di elhaalh janj.
Nowe di kûcaalhul di bukanool di ebaarukay
15 Ña Emitay di yeen Nowe: 16 “Ûcaalhul di ebaarukay miwuul di apañoori, di kuñooli, di poop kûsampuli. 17 Nûcaalhenul poop wahaw peh wândom; basuwaabu, di uncaamaw, di bânunkureŋabu, di poop baabu bâhuuloorem, ma nki bubajoor ma bumeeŋ di etaamay.”
18 Ña Nowe, di apañoorool, di kuñoolool, di poop kûsampulool, di kûcaalhul di ebaarukay. 19 Uncaamaw poop, di bânunkureŋabu, di baabu bâhuuloorem, di basuwaabu, di poop wah waawu peh wareesem di etaam wâlakodom, di ûcaalhul.
20 Ban Nowe nacookoor Altar be bata ATA EMIT, ban naŋar uncaam waawu, di poop basuwa baabu ba Emitay emmi bujake, abuj areemen ma awuu'yo opherta. 21 Ña ATA EMIT najam ma putum sûum, nâanul: “Eetubi igawurer joon etaamay di kapaawaaku mata ajamaat, palimo ma ajamaat peh, buynumabu batawool bûjaakoriitum oo baroŋ di aŋil. Moo, eetunki îbuyrer joon wahaw wammi di etaamay non ma igam ume.
22 Moo, kukaku peh ka mbi etaamay elako to,
jagiiten miñ, di poop ejalay, yeetubi ebawrer;
kukaku kata êhaahay, di poop kata ñonkañu, keetubi kubawrer;
hûyookahu, di poop hulhaahu, heetubi hubawurer;
tutulay, di poop busonna,
yeetubi ebawrer.”