Emitay di êbuy ejamaatay
7
Ban ATA EMIT naan Nowe: “Nowe jinebej di bukani di ebaarukay, mata di bukana'uke peh kata jaat, aw kaŋ keb nijuum jagawem jak. 2 Moo, uŋar encaamoocaam, ma siga sîinaasu hutok di sigaba, saaraasu poop hutok di sigaba, sawaasenumeyiim, sa înje emmi sijake katokoñ, uga dô. Nuŋar poop ênukureŋoonukureŋ, ma siga yîinaay yanor, di poop yaaraay yanor, sâwaasenumoriitim, sa înje emmi sijakut katokoñ, uga dô. 3 Ban nuŋar poop esuwawoosuwa, ma buga yanooyan hutok di sigaba, yîinaay, di yaaraay uga dô, ma mbi esepeyay yata bo yetuba êbuyo. 4 Mata ute be kukaku hutok di kugaba, mbi îwalenul mumelamu mâamak kukaku bukanaku egaba (40), tutulay di busonna ma îbuy wahaw peh wammi di etaam wayiihem.”5 Ña Nowe naga non ma ATA EMIT aloboom.
6 Be nownu na Emitay elubulom umu, Nowe ma aganom ujaañaw sîteemeerasu hutok di yanor (600). 7 Ña di kunebej di ebaarukay di apañoorool, di kuñoolool, di poop kûsampulool ma kumellh di mumela'umu. 8-9 Bânunkureŋabu poop, di uncaamaw wa Emitay yemmi ujake katokoñ, di waawu wa yemmi ujakut katokoñ, di basuwaabu, di poop bânukureŋ baabu bâhuuloorem, di bûkayil sigabagaba, yîinaay, di yaaraay ki bunebej di ebaarukay non ma Emitay eloom. 10 Ña na kuka'uku hutok di kugaba kugam kubawe, ña di êlubul.
11 Na hulheeŋahu hugabutahu hugam kukaku kunŋen di hutok di kugaba, hata na Nowe agam ujaañaw sîteemeerasu hutok di yanor (600), sîpungupungasu di sîpangulumul dâada di etaam, sîyiinumasu poop di sîbabulowul hatiya di emitay, 12 ma mumelamu mâamak mûlowul kukaku bukanaku egaba (40), tutulay di busonna.
13 Noo huka'uhu, no na Nowe kunebeem di ebaarukay koo di apañoorool, di kuñoolool Seŋ, di Kaŋ, di Japhe, di poop kûsampulool. 14 Uncaamaw poop peh, di bânunkureŋabu peh, di baabu bâhuuloorem peh, di basuwaabu peh, di wah kaŋ peh wâyitem, 15 di bukay ki bunebej di ebaarukay, ma buga yanooyan, yîinaay, di yaaraay. 16 Ña wahaw uwu peh, di unebej di ebaarukay, ma uga yanooyan, yîinaay, di yaaraay non ma Emitay eloom Nowe, ban di ebab êtingaay.
17 Be Emitay di yenken ma êlubul kukaku bukanaku egaba. Ña mumelamu di muyej noon, poopii ebaaruka'uyu di eyiil. 18 Ña mumelamu di muhaŋ to, ma ebaaruka'uyu ya eyiiloor. 19 Di mumeeŋ poopii di muhoojen kurimbiliŋaku peh kâraagiyaaku, 20 ma muhaŋ ko simeeterasu hutok di sigaba. 21 Ña wahaw peh wayiihem wammi di etaamay; ejamaatay, di uncaamaw, di bânunkureŋabu, di baabu bâhuuloorem, di poop basuwaabu peh di buket. 22 Ña wahaw peh walakonom di etaamay wayiihem di ûbuyo, 23 ma Nowe, di poop kaaku ka kulakonom di ebaarukay ko karommi. Be ejamaatay peh, di bânunkureŋabu, di baabu bâhuuloorem, di uncaamaw, di poop basuwaabu banebejutum di ebaarukay, di buket.
24 Ña mumelamu di muhoomen etaamay kukaku êteemeer di bukanaku egaba di kunŋen (150).