Mâlhapitamu mata ejamaatay
6
Na êsukay egam emeeŋe di etaamay, di kubaj kuŋil kaaku kaaraaku. 2 Be kuŋilaku kata Emitay di kujuk ma kuŋila'uku kujakum, ña di kuŋar kaaku ka kûkimmi kuyab. 3 Ña ATA EMIT nâanul: “Eetubi iwaa'bo buynumabu bûmbaam ma bulako di ajamaataw ma aroŋ be nanoonan, be mbi agawool ma abaj keb ujaañaw êteemeer di anabawo, naket (120).”4 Nownu, na kuŋilaku kata Emitay kuyaboorum di kata ejamaatay, di kubaj bukanaku kâmakaaku kalakonom di etaamay. Bukana'uku di kuga no bukanaku kata sembaasu kajamom noon.
5 Ña ATA EMIT najuk non ma mâlhapitamu muhahum di etaamay, mata ma bukanaku peh ya kunongum keb kôji. 6 Ña di mulaañool noon mata ma âwwemmi ajamaataw. 7 Momakiimom nâanul: “Mbi îbuy ejamaatay peh ka îwwemmi di etaamay. Mbi îbuy poop uncaamaw, di bânunkureŋabu, be di baabu bâhuuloorem, di poop basuwaabu, mata mulaañom ma îwwenumbom.” 8 Be Nowe, ATA EMIT nâririgen d'oo.
Nowe nacookoor ebaarukay
9 Moma Nowe agam. Nowe naga no anaw alhegenumaayaw âgaworiitum miñ makojuwe, ma âbuti di bukanaku peh kata no. Mata ya aga wahaw wa Emitay eloom. 10 Be nabaj kuŋilaku êhaaji kagam kîinaaku: Seŋ, di Kaŋ, di Japhe.
11 Be Emitay di ejuu'no non ma malesamu muhahum di etaamay, mata bukanaku peh ya kuga no wahaw wajakutaaw. 12 Ña na mbi ejiker etaamay, di ejuk keb malesamu, mata ma bagawerabu bata bukanaku peh bujakutum.
13 Ña di yeen Nowe: “Mbi îbuy ejamaatay peh, mata etaamay yoyu ma yemmi huc malesamu. Mbi îbuyiil, nîbuy poop etaamay. 14 Be mbi ucookoor ebaarukay yata utaaguwaaw wajakum, ban nuga dô sîwaanaatasu. Ban nuŋar egodoroŋaya ma unaacu yo tîyaŋ di poop dâada. 15 Be mbi ucookoor yo, nuga yo: maballhamu, simeeterasu êteemeer di anabawo di kunŋen di sîhaaji (133), mawuŋamu, simeeterasu anabawo di sigaba (22), mâraagiyaamu, simeeterasu kunŋen di sîhaaji (13). 16 Ban mbi uga yo sitaahasu sîhaaji, ban nûniigen yo. Ban nuwaa'bo êwaaŋay ya mbi ebaj sentimetrub bukanaku egaba di sibakiir (44) ya mbi elako tutaru tata ubilaw wata yo, di banehenerabu. Ban nuga êtingaay kajim. 17 Mata mbi îwalenul mumelamu mâamak ma mbi muhoomen etaamay pooyo, ma mbi îbuy miñ kaŋ peh mammi di etaam mayiihem. 18 Be mbi ugawa yaŋaayay. Mbi miwuul di apañoori, di kuñooli, di poop kupañoor kuñooli, jinebej di ebaarukay. 19 Nuŋar uncaamaw, di bânunkureŋabu, sigabagaba, yîinaay di yaaraay uga dô. 20 Bânukureŋ peh, di baabu bâhuuloorem, di basuwaabu, mbi bûkayil sigabagaba be baabu d'aw ma uga bo dô. 21 Ban mbi uŋar poop miñ peh mariyeyim uga dô, ki jiri di uncaamaw, di bânunkureŋabu.”
22 Ña Nowe naga peh non ma Emitay eloboom.