Kâyiŋ koo di Abel
4
Adoŋ di kutal tanor di Eva, nâyabul harahu. Na agam nabajulo aŋilaw, nagawool kañaaŋaku kata Kâyiŋ,a ma nâanul: “Ata Emit naanemom ma ibaj aŋil îine.” 2 Ban piyo maa, nâbajul aahu aaneyim Abel. Ban Abel naga âtekenaaw ata sîgaraniinaasu, be Kâyiŋ naga awañaaw.3 Kûriiŋ huk haahu, Kâyiŋ naŋar miñ maamu ma awammi awul ophertab ATA EMIT. 4 Abel poop naŋar ujimaw wahammi mampuuñet wata sîgaraniinaasu sîtiyaarasu sabajim, awul opherta ATA EMIT. Ña ATA EMIT nâririgen ma ayab opherta yata Abel, 5 be âririgent di Kâyiŋ, ayabut poop opherta yatawool. Ña Kâyiŋ nabirik noon ma âŋiiken alako to.
6 Be ATA EMIT narinkool aanool: “Mata wa ma ûbrikummi, ma ûñiiken ume ulako to? 7 Kama ugawemmi jak, mbi eeneeni see? Be aw ugawutum jak. Ujaamo ma usoh bûyegetabu batayi, mata aw umu jamubaj hûbajumiñahu.”
8 Ban Kâyiŋ naan Abel: “Ukaya be butat.” Na kugam koku bo, Kâyiŋ nâlhaalowul di Abel, ma abujool.
9 Be ATA EMIT narink Kâyiŋ aanool: “Kama atiyi Abel ôomey?” Be Kâyiŋ naanool: “Înje îmirut. Kama înje ipooyewoom?”
10 ATA EMIT narinkool aanool: “Mata wa nuga umu? Utallhen ma, ma hûsimahu hata atiyi hulooŋooruwem di mo di etaam. 11 Moo, mowme mbi upaawo, mata ma ugam etaamay esiben hûsimahu hata atiyi a ubuum. 12 Na mbi uwañ, ootubi ubaj makeel. Ban mbi ya ureesoor babajut tiŋ ta mbi ukin.”
13 Ña Kâyiŋ naan ATA EMIT: “Balesera'ube ba ulesommi ume buhaŋom, eetubi iyetoor di bo. 14 Ma ucahum ban ume d'înje di etaama'uye, eetubi eeli ijuki joon. Mbi ya ireesoor babajut tiŋ ta mbi ikin. Ban an peh ajukommi, mbi abujom.” 15 Be ATA EMIT naanool: “Anaw a mbi abuji, mbi ilesool ñeemo hutok di ñagaba.” Ban ATA EMIT naga êmanjumay di Kâyiŋ ma anoowan a mbi ajukool, atukabujool. 16 Ña Kâyiŋ nâcaa'to ta ATA EMIT ya aloom d'oo ma akay ki akin tiŋatu taaneyim Noodi,c tammi karebaku ka jaley âcaalhumewuum di etaamay yata Edeŋ.d
17 Ban Kâyiŋ, apañoorool nâyabul harahu, na agam nâcallho di aŋilaw, nagawool kañaaŋaku kata Enooki. Ban Kâyiŋ nacookoor êsukay ya agam kañaaŋaku kata Enooki. 18 Ban Enooki nabaj Iradi, Iradi nabaj Mewjayel, Mewjayel nabaj Metusayel, Metusayel poop nabaj Lameeki.
19 Lameeki nayab magabaamu: aahu naaneyim Ada, aahu Zila. 20 Ada nabaj aŋilaw aaneyim Jabal, agam ampaw bukanaku kakimmi di ûngungaw, ban ya kukur uncaamaw. 21 Atiyool Jubal, naga poop ampaw bukanaku peh kâyimpem aarpa,e di kaaku kalhiitem silhiitasu. 22 Zila poop nabaj Tubal-Kâyiŋ, di âliinool aaneyim Naamaa. Be Tubal-Kâyiŋ, naga anaw ahaañem wah peh wahaañumi kûgebaayaku, di poop wata muhaañaayamu.
23 Huk haahu, Lameeki naan kupañoorool:
“Ada, di Zila, jitallhen;
jitallhen hurimahu ha mbi ilobuul.
Âynaaw acokommi, nibujool; ajaajuwaw nayokosom, nibujool.
24 Nokoor jaa non mbi kugalen di anaw abuum Kâyiŋ ñeemo hutok di ñagaba,
kama anaw a mbi abuj Lameeki, mbi kugalen d'oo ñeemo kîyyaku kûhaaji di kunŋen di hutok di ñagaba (77).”
25 Ban Adoŋ koo di Eva, di kubaj joon aŋil aahu. Nagawool kañaaŋaku kata Seeti,f ma âanul: “Emitay ewulom aŋil aahu a mbi aŋar hiŋahu hata Abel a Kâyiŋ abuum.” 26 Ban poop Seeti nâbajul aŋilaw, nagawool kañaaŋaku kata Enos.
Ña no na êsukay kûcukum ma kulhaw ATA EMIT.