Ajamaataw nalo di hûbajumiñahu
3
Nownu elunay ehaŋ no majaalho bânunkureŋabu peh bata bujalabu ba ATA EMIT âwwemmi. Ña di ekay ki erink añakanaw ma yeenool: “Kama malhegen kaan Emitay yeene, jeetubi jiri muriyaayamu mata uyaajaw peh wa êwwemmi ûde di etoolay?”2 Be anñaakanaw umu naan yo: “Yeene, nooliye uri muriyaayamu peh mammi ûde di etoolay, 3 be mata buyaajabu bammi tutaru, ootubi uri mo, ootubi ugoo'mo poop, ka mbi uket.”
4 Be elunay di yeenool: “Jiri mo jaa, jeetubi jiket, 5 mata Emitay êmire kaan, hukahu na mbi jiri mo keb, kûkilaku katawuul mbi kuga haa, ma jîmir majakaamu di majakutaamu non yoo.”
6 Ña anñaakanaw umu najuk muriyaaya'umu, di mujak d'oo, ña nayond mo kari. Ña nâkin ari mo ma mbi mugawool poop ajaalho. Nâbajul ari, ban nawul poop apañoorool ari. 7 Ña kûkilaku katayiil di kuga haa, ña di kunamulen kaan kukokowut. Ña di kuŋar utojaw wata buyaajabu baaneyim phigeera kumah ma kukoko.
8 Be na kujammi ATA EMIT ma areesoorem di etoola'uyu burendenabu, ña di kutey ki kûñooro di uyaajaw. 9 Be ATA EMIT nâwool Adoŋ ma aanool: “Adoŋ aw umu ûtey?”
10 Adoŋ naanool: “Înje ijamulim ûde di etoolay nîkoli, ban ma ikokowutum, nikay ki îñooro.”
11 Ña ATA EMIT narinkool aanool: “Aymoom âyisim kaan ukokowut? Kama aw urim muriyaayamu mata buyaajabu ba eenim aatuba uri?”
12 Adoŋ naanool: “Anñaakanaw a uwulommi, oo ma awulommi muriyaayamu mata bo iri.”
13 ATA EMIT narink anñaakanaw umu aanool: “Mata wa ma ûgawummom?” Anñaakanaw umu naanool: “Elunay yoo yabuntenommi ma iri mo!”
14 Ña ATA EMIT naan elunay:
“Ma ugam umu,
mbi upaawo uhaŋ uncaamaw,
di bânunkureŋabu peh.
Ban poop mbi ya ûhuuloorum harahu ma mbi ya umer
kaporaku be nanoonan.
15 Ban mbi igawi ma aatuba jîsuumoor di anñaakanaw,
sîbajoorumasu satawuul poop setubi sîsuumoor,
ma yatawool mbi eyokosi di hûkuwahu,
yatayi di erumool di hutonjahu.”
16 Ban ATA EMIT naan anñaakanaw umu: “Mbi ibaŋeni
hûsonjaahu na mbi ulet tîkoori;
ban mbi uroŋ nûsonji noon.
Be mbi ûkin apañoori,
be oo mbi aga annahaanaw atayi.”
17 Ban Emitay di yeen Adoŋ:
“Ma ulatum hurimahu hûmbaam ma uga non ma apañoori alobim, ma uri muriyaayamu mata buyaajabu ba eenim aatuba uri,
mbi iga etaamay di kapaawaaku; ban mbi ûlaam di bugoroorabu nanoonan,
ban inkit bi ubaj wah wata huri.
18 Ma etaamay mbi ega uyaajaw wata undiiŋaw, di poop mahosamu mayawem;
moo, wahaw wata bujalabu, mbi uga huriyahu hatayi.
19 Mbi upucuk, ma nkit bi ubaj wah wata huri;
mo ma mbi uga be kaŋ na mbi uket, ma ulaañ be
di etaam da ûcaalhelim, mata aw bukapabu nûcookoorumim;
moo, mbi ulaañ joon uga balhuusabu.”
20 Ban Adoŋ naga apañoorool kañaaŋaku kata Eva,a mata oo agam iñaaw âmbasuk peh.
21 Ña ATA EMIT nacookoor wañaw wata ubaŋaw ma aga Adoŋ koo di apañoorool kukoko. 22 Ban ATA EMIT nâanul: “Ajamaataw jaat nâmire ban majakaamu, di majakutaamu noon ulaal. Moo, mumulet bi uwalhaalool bo ma ari muriyaayamu mata buyaajabu bagawem an aroŋ, mata ari mo jaa, mbi aroŋ be nanoonan.” 23 Ña ATA EMIT nâcaalhenool di etoola'uyu yaaneyim Edeŋ, ma akay ki awañ etaamay ya acookoormim. 24 Be na egam êcaalhenoo'dô, di ega kumalaakaku kaaneyim kêrubiŋi,b ma kujuum dô di kajimaku ka jaley âcaalhumewuum. Di ega poop kajaasiyaaku kata sambunasu ma ya kuŋomoor dô ma kupooy buruŋabu bata be ta buyaaja'ubu bagawem an aroŋ bemmi.