2
Ña Emitay di eban jacookooraju jata hatiya di emitay, di etaamay, di poop wahaw peh wândom.2 Na ebammi jacookooraju jata wahaw di huka'uhu hagakom hutok di hanor, ña di ehepulen di haahu hagakom hutok di kugaba. 3 Ban di êñoyyen ho, ban di ega ho ma huga hukahu hata kâsuumaayaku, mata huka'uhu no na ehepulemmi jacookooraju jata wahaw.
Emitay di êwuwen anaw âtiyaaraw
4 Mo ma ATA EMIT acookoorum hatiya di emitay, di etaamay: Na ATA EMIT acookoorum hatiya di emitay, di etaamay, 5 bajut no buyaaj, di poop mahos, mata Emitay yoo baluboruloot, ban poop bajent an a mbi awañ dô. 6 Be empuuhay eyookenem etaamay. 7 Ban ATA EMIT naŋar bukapabu âcookoorum anaw,a ban nâhuutenool di sîŋindaasu ma agawool huyiihahu ma aroŋ. Ña anaw umu na aroŋ.
8 Ban ATA EMIT nacookoor etoolay tiŋatu taaneyim Edeŋ ba jaley âcaalhumewuum, ban naŋar anaw umu a ecookoorum ega to. 9 Be nâwwen tiŋa'utu buyaajoobuyaaj, waawu wajakum kajiker wa muriyaayamu mata wo mujakum huri. Ban nâwwen dô tutaru buyaaj baabu, bagawem an aroŋ, di poop baabu bagawem an âmir majakaamu, di majakutaamu.
10 Be dô Edeŋ, kaalaku di kûcaalhumuu'dô ka ya kapaasemmi etoola'uyu. Be kaala'uku di kûgiitoor ma kuga waalaw ubakiir. 11 Kaaku kûtiyaaraku, ya keene Pisoŋ. Kaala'uku koo kuŋoomemmi etaamay yata Avilaa baamom ba ûuru yemmi. 12 Ûuru yata etaama'uyu ejakujak noon. Ban poop etaama'uyu di ebaj muheeñamu, di poop kuwaaliisaku kajakaaku kaaneyim Sardoonika. 13 Kaaku kugabutaku ya keeni Jiyoŋ, kokaŋoomemmi etaamay yata Kusi. 14 Kaaku kûhaajutaku ya keeni Tigri, kaamom kakayum be di etaamay yata Asiiriya, baamom ba jaley âcaalhumewuum. Kaaku kabakiirenaku, ya keeni Ewphratis.
15 Ña ATA EMIT naŋar anaw umu a acookoorum aga di etoola'uyu yata Edeŋ, ma mbi ya apooy yo, nawañ dô poop. 16 Ban ATA EMIT naan anaw umu: “Nooliye uri muriyaayamu peh mammi ûde, 17 be mata buyaaja'ubu bagawem an âmir majakaamu, di majakutaamu aatuba uri mo, mata hukahu na mbi uri mo, mbi uket.”
Emitay di ecookoor anñaakanaw
18 Ban ATA EMIT nâanul: “Jakut ma anaw alako to diyoonool, mbi igawool anaw aahu a mbi aga apaalool a mbi ya aanenool.”
19 Be na ATA EMIT aŋaam bukapabu âcookoorum bânunkureŋabu peh, di basuwaabu peh, ban na aŋaa'bo be baabu Adoŋ ma nki ajuk maama mbi âwoo'bo. Ña ênukureŋoonukureŋ ya Adoŋ agam kañaaŋaku kata yo, di yêemi non ma âwooyom. 20 Malhegen Adoŋ naga uñaaŋaw peh wata uncaamaw, di wata basuwaabu, di poop wata bânunkureŋabu. Be noo oo babajorut apaalool a mbi aanenool.
21 Ña ATA EMIT naga âynaaw umu ma aŋot nâm, ban nâcaalhen koolaku kata kaheehaku katawool, ban naŋar eluway aga to. 22 Ban naŋaa'ko âcookoorum anñaakanaw, ban naŋarool ki awulool.
23 Ña Adoŋ nâanul:
“Ume koolaku kata
di woolaw wûmbaam,
eniilay yata di
eniilay yûmbaam.
Moo, mbi aani anñaakanaw,b
mata di ânniinaaw nâcaalhellim.”
24 Momakiimom ma ânniinaaw mbi âcaalhum di kaŋenaku kata ampawool di iñaawool, ma kuyaboor di apañoorool, ma buko egabaay kuga eniilay yanoray.
25 Be nownu âynaaw umu koo di apañoorool kukokowut, ma kulako to way be kupuñuwoorut.