ÊLIIBRAY ÊTIYAARAY YATA MOYSES YAANEYIM
HÛCUKUMAHU
Emitay di ecookoor hatiya di emitay di etaamay
1
Di hûcukumahu Emitay di ecookoor hatiya di emitay, di etaamay.2 Be noo etaamay ebajent maama yeenom, ban wah bâlee'do. Be yoo ma emuucemmi mib, ban Buynumabu bata Emitay ya burees hatiya di mumelamu. 3 Emitay di yêenul: “Majaaŋaamu ûcaalhul!” Ña di mûcaalhul. 4 Emitay di ejuk majaaŋaa'umu di yêenul mujake. Ña di êgiit majaaŋaamu di emuucenay. 5 Ban di êwool majaaŋaamu “tutulaaru,” di êwool emuucenay “busonnaaru.” Ña di ga no burendenabu, hata kajom, di ga hukahu hûtiyaarahu.
6 Emitay di yêenul: “Êwaaŋay ulako tutaru ma ûgiit mumelamu.” 7 Ña di ega êwaaŋa'uyu ma êgiit mo, ma muga maamu di etaam, maamu hatiya. Ña di ga mo. 8 Emitay di êwool êwaaŋa'uyu “hatiya di emitay.” Ña di ga no burendenabu, hata kajom, di ga hukahu hugabutahu.
9 Ban Emitay di yêenul: “Mumelamu mammi di etaam, mûmeboor tiŋ tanor ma kajim kaaku kulhaalh.” Ña di ga mo. 10 Emitay di êwool kajima'uku kalhaalhaaku “etaamay,” kaaku kagam mumelamu di êwoo'ko “mulhuwamu.” Ña di ejuk wahaw uwu wa ecookoom, di yêenul ujake.
11 Ban Emitay di yêenul joon: “Etaamaye ugiit mahosoohos, ban di mubaj bakoolabu bata mo; uyaajooyaaj di ugiit ma uwolh muriyaayamu mata wo.” Ña di ga mo. 12 Ña mahosoohos, di uyaajaw bawolhem bakoolabu non ma weenom, di waawu bawolhem muriyaayamu non ma weenom, di ûgiitul di etaamay. Emitay di ejuk wahaw uwu wa ecookoom, di yêenul ujake. 13 Ña di ga no burendenabu, hata kajom, di ga hukahu hûhaajutahu.
14 Ban Emitay di yêenul: “Sihikitenumasu sîcaalhul hatiya di emitay ma sîgiit tutulaaru di busonnaaru. Di siga poop ma mbi ya mîri kukaku, di ujaañaw, di poop hujamahu di hulhaahu.” 15 Be di yeen so: “Jilako hatiya di emitay ma mbi ya jihikiten etaamay.” Ña di ga mo. 16 Ña di ega sihikitenumasu sâamak sigaba: yaayu yahammi di ehikiten tutulaaru, yaayu yinŋetaay di ehikiten busonnaaru. Ban di ecookoor poop bootabu. 17 Emitay di ega so hatiya di emitay ma sihikiten etaamay, 18 ma sikil tutulaaru di busonnaaru, ma sîgiit majaaŋaamu, di emuucenay. Emitay di ejuk wahaw uwu wa ecookoom, di yêenul ujake. 19 Ña di ga no burendenabu, hata kajom, di ga hukahu hubakiirenahu.
20 Ban di yêenul joon: “Mulhuwamu oon huc siwolasu, di bânunkureŋabu; basuwaabu poop di bûyit hatiya di emitay.” 21 Ña Emitay di êwuwen siwolasu sâmakaasu, di bânukureŋ peh bata di mulhuwamu, di poop basuwaabu. Ma êwuwen bo ma beeno non ma beenom. Emitay di ejuk wahaw uwu wa êwwemmi, di yêenul ujake. 22 Ban Emitay di ewuu'bo hûpiiraahu ma yeen bo: “Jibajoor ma jeen mulhuwamu huc; basuwaabu poop di bubajoor di etaamay.” 23 Ban di ga no burendenabu, hata kajom, di ga hukahu hutokenahu.
24 Ban Emitay di yêenul joon: “Wah peh wayiihem ûwu di etaamay; uncaamaw, di bânunkureŋabu, di poop baabu bâhuuloorem; ma banooban, di bûwu non ma bunokoom.” Ña di ga mo. 25 Emitay di êwuwen bânukureŋ peh, di baabu bâhuuloorem, di poop uncaamaw. Ma êwuwen bo ma beeno non ma beenom. Emitay di ejuk wahaw uwu wa êwwemmi, di yêenul ujake.
26 Ban di yêenul joon: “Mbi ûwwenaal anaw non ulaal, a mbi anaamoor d'ulaal. Anaw umu oo mbi aga annahaanaw ata siwolasu, di basuwaabu, di uncaamaw, di bânunkureŋabu, di poop baabu bâhuuloorem.”
27 Ña Emitay di êwuwen anaw anokoorum di yo. Be di êwwenii'no ânniinaaw, di anñaakanaw.
28 Ban di ewuliil hûpiiraahu ma yeeniil: “Jibajoor meeŋ ma jimeeŋen etaamay, ma jiga yahaanay yata siwolasu, di jiga yahaanay yata basuwaabu, di uncaamaw, di poop bânukureŋ peh bammi di etaamay.”
29 Ban di yeeniil joon: “Muriyaay peh mata uyaajaw bawolhem bakoolabu, di waawu bawolhem muriyaayamu, niwuluu'mo jiri. 30 Bânunkureŋabu peh, di baabu bâhuuloorem, di basuwaabu, di wah peh wammi di etaamay wayiihem, mahosamu mbi muga huriyahu hata wo.” Ña di ga mo.
31 Ña Emitay di ejuk wahaw uwu wa êwwemmi di yêenul ujake. Ña di ga no burendenabu, hata kajom, di ga hukahu hagakom hutok di hanor.