༄༅། །སྐུ་ཚབ་ཡོ་ཧ་ནཱན་གྱིས་བྲིས་མི་ཡི་གུ་གསུམ་པ་བཞུགས་སོ།།
ཡོ་ཧ་ནཱན་གསུམ་པ་ལེའུ་
1
སྐུ་གཟུགས་བཟང་པོ་ཞུ་བའི་སྐོར།
1 ང་ཆོས་ཚོགས་ཀྱི་འགོ་འདྲེན་པ་གིས་ ངེ་གི་ཆ་རོགས་ གའི་ཡཱུས་ལུ་ དོན་ལས་རང་ བདེན་པ་ནང་བྱམས་པ་བསྐྱེད་ཡོདཔ་ལས་ ཨ་ནི་ཡི་གུ་འདི་འབྲིཝ་ཨིན། 2 ངེ་གི་བྱམས་པའི་ཆ་རོགས་ ཁྱོད་ཀྱི་སེམས་སྐྱིད་ཏོང་ཏོ་ཡོད་དོཝ་བཟུམ་སྦེ་ གཟུགས་ཁམས་ཡང་ བདེ་ཏོག་ཏོ་དང་དགའ་སྤྲོ་འོང་ནིའི་དོན་ལུ་ ང་སྨོན་ལམ་ཞུ་སྟེ་ཡོད། 3 མ་གཞི་ སྤུན་ཆ་ལ་ལུ་ནཱ་འོངས་ཏེ་ ཁྱོད་ཀྱིས་བདེན་པ་འདི་ནང་ ན་འཐན་ཏོག་ཏོ་སྦེ་སྡོད་དེ་ བདེན་པ་གི་ནང་ན་འགྱོ་ཡོདཔ་ ཁོང་གིས་ཁྱོད་ཀྱི་འཛོམ་དཔང་བཤདཔ་ད་ ངེ་གི་སེམས་ཁར་ གནམ་མེད་ས་མེད་དགའ་སྤྲོ་ཐོབ་ཅི། 4 ངེ་གི་ཨ་ལོ་ཚུ་བདེན་པ་གི་ནང་ན་གནས་ཡོདཔ་གོཝ་ད་ ང་ལུ་དེ་ལས་ལྷག་པའི་དགའ་སྤྲོ་གཞན་ག་ནི་ཡང་མེད།།
གཙོ་བོ་གི་ཕྱག་ལཱ་ནང་འགན་ཁག་འབག་དགོ་པའི་སྐོར།
5 ངེ་གི་བྱམས་པའི་ཆ་རོགས་ ཁྱོད་ཀྱིས་སྤུན་ཆ་ཚུ་ལུ་ ཁོང་ངོ་མ་ཤེས་མི་ཨིན་ཏེ་འབད་རུང་ དམ་ཚིག་བསྟེན་ཏེ་ ལེགས་ཤོམ་འབདཝ་ཨིན་མས། 6 ཁྱོད་ཀྱིས་ཁོང་ལུ་བྱམས་པ་འབད་བའི་སྐོར་ལས་ ཁོང་གིས་ཆོས་ཚོགས་ནང་བཤད་སླབ་ནུག་ ཁོང་འགྲོ་འགྲུལ་འབད་བའི་སྐབས་ལུ་ ཨ་ནི་བཟུམ་འབད་བྱིན་ཚུགས་པ་ཅིན་ དཀོན་མཆོག་གི་ཐུགས་དགྱེས་པའི་ལཱ་ལེགས་ཤོམ་ཨིན། 7 ག་ཅི་སྨོ་ཟེར་བ་ཅིན་ ཨ་ནི་མི་དེ་ཚུ་ཡེ་ཤུ་ཁིརཱིས་aཀྱི་དོན་ལུ་ལམ་འགྲུལ་འབདཝ་ཨིན་ ཁོང་གིས་དཀོན་མཆོག་ངོ་མ་ཤེས་མི་ཚུ་ལས་ཆ་རོགས་ག་ནི་ཡང་མི་འཚོལ། 8 དེ་འབདཝ་ལས་ ང་བཅས་ཀྱིས་ཨ་ནི་བཟུམ་གྱི་མི་ཚུ་ལུ་ ཆ་རོགས་འབད་ནི་གི་འགན་ཁག་འབག་དགོ་ དེ་ལས་ང་བཅས་ཀྱིས་བདེན་པ་གི་དོན་ལུ་ ཁོང་དང་གཅིག་ཁར་ལཱ་འབདཝ་ཨིན།
9 ང་གིས་ཆོས་ཚོགས་ལུ་ཨ་ནི་མི་དེ་ཚུ་གི་སྐོར་ལས་ ཡི་གུ་ཆུང་ཀུ་གཅིག་བྲིས་བཏང་ཡི་ དེ་འབདཝ་ད་ དི་ཨོ་ཏྲེ་ཕཱེས་འདི་ ཁོང་ཆ་ཁྱབ་ཀྱི་སྦུག་ལས་དང་པ་འཐོན་ནི་ལུ་སྤྲོ་བ་བསྐྱེད་དེ་ ང་བཅས་ཀྱི་དབང་ཚད་ལུ་ཆ་མི་བཞག་པས། 10 དེ་འབདཝ་ལས་ང་འོངམ་ད་ ཁོ་གིས་ ལཱ་ངན་ ང་བཅས་ཀྱི་སྐོར་ལས་ཟོགཔོ་སླབ་མི་ དེ་གི་སྐོར་ལས་ཁ་སླབ་ནི་ཨིན་ དེ་གིས་མ་ཚད་པར་ དི་ཨོ་ཏྲེ་ཕཱེས་ཀྱིས་ ལམ་འགྲུལ་པ་སྤུན་ཆ་དེ་ཚུ་ལུ་ ཁྱིམ་ནང་ཞུ་ནི་ལུ་སྣང་མེད་བརྩིས་ཏེ་མ་ཞུཝ་མ་ཚད་ གཞན་ལུ་ཡང་ཆ་རོགས་འབད་མ་སྟེར་བས་ ད་རུང་སྤུན་ཆ་ལུ་ཆ་རོགས་འབདཝ་ད་ ཆ་རོགས་འབད་མི་ཚུ་ལུ་ ཆོས་ཚོགས་ལས་ཕྱི་ཁར་བཏོན་གཏངམ་ཨིན་མས། 11 ངེ་གི་བྱམས་པའི་ཆ་རོགས་ ཨ་ནི་བཟུམ་གྱི་ལཱ་ངན་པ་ལུ་དཔེ་མ་བལྟ་ དེ་འབདཝ་ད་ ལཱ་བཟང་པོ་ལུ་དཔེ་བལྟ་ ག་ར་འབད་རུང་ ལཱ་བཟང་པོ་འབད་མི་དེ་ དཀོན་མཆོག་གི་སྲས་སྲསམོ་ཨིན་མིའི་ཁུངས་དང་ ག་ར་འབད་རུང་ ལཱ་ངན་འབད་མི་དེ་གིས་ དཀོན་མཆོག་དང་གཞན་འབྲེལ་མེད་པའི་ཁུངས་ཨིན།
12 དེ་འབདཝ་ད་ དེ་མེ་ཏྲཱོས་ཀྱི་སྐོར་ལས་ མི་ག་ར་གིས་ཁོ་ལེགས་ཤོམ་འདུག་ཟེར་སླབ་སྟེ་ཡོད་ འདི་བཟུམ་སྦེ་རང་ བདེན་པ་གིས་ཡང་འཛོམ་དཔང་འབདཝ་ཨིནམ་མ་ཚད་ ང་བཅས་ཀྱིས་ཡང་འཛོམ་དཔང་འབད་མི་དེ་ བདེན་པ་ཨིནམ་ཁྱེད་ཀྱི་ཤེས།།
མཐའན་མཇུག་གི་བཀྲིས་སྨོན་ལམ།
13 ང་གིས་ཁྱོད་ལུ་ལོ་རྒྱུས་ལེ་ཤ་རང་འབྲི་ནི་ཡོད་རུང་ ད་ལྟོ་ཤོག་ཀུ་དཀརཔོ་གུ་གནགཔོ་བཀལ་ཏེ་མི་འབྲི། 14 ག་ཅི་སྨོ་ཟེར་བ་ཅིན་ ང་མགྱོགས་པར་འོང་ནི་ཨིན་ དེའི་སྐབས་ལུ་ གདོང་སྐོར་བརྐྱབས་ཏེ་ ཁ་སླབ་ནི་རེ་བ་ཡོད། 15 ཡེ་ཤུ་ཁིརཱིས་ཀྱི་ཞི་བདེ་ ཁྱོད་དང་གཅིག་ཁར་བཞུགས་བཅུག་ ནཱ་གི་ཆ་རོགས་ཚུ་གིས་ ཁྱོད་ལུ་སྐུ་གཟུགས་བཟང་པོ་ཟེར་སླབ་གཏང་དེས་ དེ་ལས་ཆ་རོགས་ཚུ་རེ་རེ་བཞིན་དུ་ལུ་ ང་ལས་སྐུ་གཟུགས་བཟང་པོ་ཞུ་བྱིན་ཟེར་ཞུ་ནི་ཨིན།། །།