༄༅། །སྐུ་ཚབ་ཡོ་ཧ་ནཱན་གྱིས་བྲིས་མི་ཡི་གུ་གཉིས་པ་བཞུགས་སོ།།
ཡོ་ཧ་ནཱན་གཉིས་པ་ལེའུ་
1
བཀྲ་ཤིས་བདེ་ལེགས་ཞུ་བའི་སྐོར།
1 ང་ཆོས་ཚོགས་ཀྱི་འགོ་འདྲེན་པ་ལས་ གཙོ་བོ་གིས་བཙག་འཐུ་མཛད་གནང་མིའི་ཨམ་དང་ མོ་རང་གི་ཨ་ལོ་ཚུ་ལུ་a ཨ་ནི་ཡི་གུ་འདི་འབྲིཝ་ཨིན་ ང་གིས་ཁྱེད་ལུ་བདེན་པ་ནང་བྱམས་བརྩེ་བསྐྱེད་དེ་ཡོད་ ང་རྐྱངམ་གཅིག་གིས་མ་ཚད་པར་ ལྷག་པར་དུ་ བདེན་པ་ལུ་ངོ་ཤེས་མི་ག་ར་གིས་ཡང་ དེ་བཟུམ་སྦེ་རང་ཁྱེད་ལུ་འབད་དེ་ཡོད། 2 ག་ཅི་སྨོ་ཟེར་བ་ཅིན་ ང་བཅས་ག་ར་གི་ནང་ན་བདེན་པ་གནས་ཏེ་ བདེན་པ་འདི་ཨ་རྟག་རང་ ང་བཅས་དང་གཅིག་ཁར་སྡོད་ནི་ཨིན། 3 ང་བཅས་བྱམས་པ་དང་བདེན་པ་གི་ཐོག་ལས་སྡོད་ནི་གི་དོན་ལུ་ ཡབ་དཀོན་མཆོག་དང་ཁོ་རང་གི་སྲས་ ཡེ་ཤུ་ཁིརཱིས་ལས་བྱུང་མིའི་ ཐུགས་རྗེ་དང་ སྙིང་རྗེ་ དེ་ལས་ཞི་བདེ་ང་བཅས་ནང་ན་གནས་བཅུག།
གཅིག་གིས་གཅིག་ལུ་བྱམས་པ་འབད་དགོ་པའི་བཀའ་རྒྱ་གི་སྐོར།
4 ཁྱོད་ཀྱི་ཨ་ལོ་ལ་ལུ་དང་གཅིག་ཁར་འཕྱདཔ་ད་ ང་བཅས་ལུ་ཡབ་ལས་གནང་མི་བཀའ་རྒྱ་དང་འཁྲིལ་ཏེ་ བདེན་པ་གི་ནང་ན་གནས་ཡོདཔ་མཐོང་སྟེ་ ང་གནམ་མེད་ས་མེད་སེམས་དགའ་ཡི། 5 ད་ཨམ་ ང་བཅས་གཅིག་གིས་གཅིག་ལུ་བྱམས་པ་འབད་དགོ་ཟེར་ ང་གིས་ཁྱོད་ལུ་ཨུ་ཚུགས་རྐྱབ་དོ་ ཁྱོད་ལུ་ ང་གིས་བཀའ་རྒྱ་གསརཔ་འབྲིཝ་ཨིན་རང་མེན་ དེ་འབདཝ་ད་འགོ་དང་པ་ལས་ ང་བཅས་ལུ་གནང་སྟེ་ཡོད་མི་བཀོད་རྒྱ་འདི་རང་ཨིན། 6 དེ་ལས་ཁོ་གི་བཀའ་རྒྱ་བསྒྲུབ་ནི་གི་དོན་ལུ་ ང་བཅས་ཀྱིས་ ཨ་ནི་བཟུམ་གྱི་བྱམས་པ་འབད་དེ་སྡོད་དགོ་ དེ་དང་འཁྲིལ་ཏེ་འབད་དགོ་ཟེར་ འགོ་དང་པ་ལས་རང་ ཁྱེད་ཀྱི་གོ་མིའི་བཀའ་རྒྱ་དེ་ ཨ་ནི་རང་ཨིན།།
ཆོས་རྫུས་མ་སྟོན་མི་ཚུ་གི་སྐོར།
7 ཡེ་ཤུ་ཁིརཱིས་འདི་ མིའི་ལུས་ལུ་བྱོན་ཡི་ཟེར་འཛོམ་དཔང་མ་འབད་བར་ མགུ་བསྐོར་རྐྱབ་མི་ལེ་ཤ་རང་ འཛམ་གླིང་ནང་འཐོན་ཏེ་ཡོད་ དེ་བཟུམ་འབད་མི་ མི་ག་ར་ཨིན་རུང་ མགུ་བསྐོར་རྐྱབ་མི་དང་ ཡེ་ཤུ་ཁིརཱིས་ཀྱི་དགྲ་ཨིན། 8 ང་བཅས་ཀྱིས་དཀའཝ་སྤྱད་དེ་ གྲུབ་འབྲས་བཏོན་ཚར་མི་དེ་ མ་འབྱང་བར་ གསོལ་རས་ག་ར་ཐོབ་ནིའི་དོན་ལུ་ ཁྱེད་ཀྱིས་དྲན་པ་བཏོན་ཏེ་སྡོད། 9 ག་ར་འབད་རུང་ ཁིརཱིས་ཀྱི་སྟོན་མི་ལུ་འཕྲོ་མཐུད་དེ་མ་གནས་མི་དང་ སོ་སོ་སྦེ་ཧེ་མ་འཐོན་འགྱོ་མི་གི་ནང་ན་ དཀོན་མཆོག་མི་བཞུགས་ དེ་འབདཝ་ད་ ག་ར་ཨིན་རུང་ ཁིརཱིས་ཀྱིས་སྟོན་མི་ནང་རང་ འཕྲོ་མཐུད་དེ་གནས་མི་ནང་ ཡབ་དཀོན་མཆོག་དང་ཁོ་གི་སྲས་བཞུགསཔ་ཨིན། 10 དེ་ལས་ག་ར་ཨིན་རུང་ ཁྱེད་སྡོད་སར་ལུ་འོང་མི་ཚུ་གིས་ ཨ་ནི་སློབ་སྟོན་འདི་ལས་སོ་སོ་གཅིག་ སྟོན་འོང་པ་ཅིན་ ཁོ་ཁྱེད་ཀྱི་ཁྱིམ་ནང་འཁྱིད་མ་སོང་ ཡང་ན་ཕེབས་བསུ་ཡང་མ་ཞུ། 11 དེ་ལས་ ག་ར་འབད་རུང་ ཁོ་ལུ་ཕེབས་བསུ་ཞུ་བ་ཅིན་ ཁོ་གི་ལཱ་ངན་པ་ནང་ བཅའ་མར་གཏོགས་དོཝ་བཟུམ་སྦེ་རང་ཨིན།།
མཐའན་མཇུག་གི་བསླབ་བྱ་ཞུ་བའི་ཚིག་གི་སྐོར།
12 ང་གིས་ཁྱེད་ལུ་ལོ་རྒྱུས་ལེ་ཤ་འབྲི་ནི་ཡོད་རུང་ ད་ལྟོ་ཤོག་ཀུ་དཀརཔོ་གུ་གནགཔོ་བཀལ་ཏེ་མི་འབྲི་ དེ་བ་འདི་ ཁྱེད་སྡོད་སར་འོང་ཞིནམ་ད་ གདོང་སྐོར་བརྐྱབས་ཏེ་ བློ་སླབ་ནིའི་རེ་བ་ཡོད་ དེ་གིས་ ང་བཅས་ག་ར་ལུ་དགའ་སྤྲོ་ ཡོངས་སུ་རྫོགསཔ་སྦེ་འབྱུང་ནི་འོང་། 13 གཙོ་བོ་གིས་བཙག་འཐུ་མཛད་གནང་མིའི་ཨ་ཞེམོ་གི་ཨ་ལོ་ཚུ་གིས་ ཁྱེད་ལུ་སྐུ་གཟུགས་བཟང་པོ་ཟེར་སླབ་གཏང་དེས་ཟེར་ཞུ་ནི་ཨིན།། །།