༄༅། །སྐུ་ཚབ་ཡོ་ཧ་ནཱན་གྱིས་བྲིས་མི་ཡི་གུ་དང་པ་བཞུགས་སོ།།
ཡོ་ཧ་ནཱན་དང་པ་ལེའུ་
1
ཚེ་གནང་མི་གསུང་གི་སྐོར།
1 འགོ་དང་པ་ལས་རང་བཞུགས་ཡོད་མི་ ཚེ་གནང་མི་གསུང་འདི་a ང་བཅས་ཀྱིས་རྣ་བ་གོ་ མིག་གིས་མཐོང་ ལགཔ་གིས་ཡང་འདོགས་བལྟ་སྟེ་ འདི་གི་སྐོར་ལས་ ང་བཅས་ཀྱིས་ཁྱབ་བསྒྲགས་འབདཝ་ཨིན། 2 འདི་ག་དེ་སྦེ་སྨོ་ཟེར་བ་ཅིན་ ཧེ་མ་ལས་ཡབ་དཀོན་མཆོག་དང་གཅིག་ཁར་བཞུགས་ཡོད་མིའི་ ཚེ་མཐའ་མེདཔ་འདི་ ང་བཅས་ཀྱི་གདོང་ཁར་ མངོན་སུམ་སྦེ་མཇལ་ཁ་གནང་སྟེ་ ཁོ་ལུ་ང་བཅས་ཀྱིས་མཇལཝ་ལས་ ཚེ་དེ་གི་སྐོར་ལས་འཛོམ་དཔང་བཤདཔ་ཨིནམ་མ་ཚད་ འདི་གི་སྐོར་ལས་ ཁྱེད་ལུ་ཁྱབ་བསྒྲགས་ཡང་འབདཝ་ཨིན། 3 ང་བཅས་ཀྱིས་ག་ཅི་མཐོང་མི་དང་ རྣ་བ་གོ་མི་ཚུ་ ཁྱེད་ལུ་ཁྱབ་བསྒྲགས་འབད་དགོ་པའི་དོན་དག་འདི་ ང་བཅས་ཀྱི་ཡབ་དཀོན་མཆོག་དང་ ཁོ་གི་སྲས་ཡེ་ཤུ་ཁིརཱིས་ནང་མཐུན་འབྲེལ་གཅིག་སྦེ་ཡོད་དོཝ་བཟུམ་ ཁྱེད་ཡང་ང་བཅས་དང་གཅིག་ཁར་ མཐུན་འབྲེལ་གཅིག་སྦེ་སྡོད་ཚུགས་པའི་དོན་ལུ་ཨིན། 4 དེ་ལས་ དེ་ཚུ་ག་ར་ཁྱེད་ཆ་ཁྱབ་ལུ་བྲིས་མི་འདི་ ང་བཅས་ཀྱི་དགའ་སྤྲོ་ཡོངས་སུ་རྫོགསཔ་སྦེ་བྱུང་བའི་དོན་ལུ་ཨིན།།
འོད་ཟེར་གྱི་ལམ་ནང་འགྱོ་དགོ་པའི་སྐོར།
5 ཨ་ནི་གཏམ་བཟང་འདི་ ང་བཅས་ཀྱིས་ཁོ་ལས་རྣ་བ་གོ་སྟེ་ ཁྱེད་ཆ་ཁྱབ་ལུ་ཁྱབ་བསྒྲགས་འབདཝ་ཨིན་ དཀོན་མཆོག་འདི་འོད་ཨིནམ་ལས་ ཁོ་གི་ནང་ན་ གནག་དུང་དུ་རྩ་ལས་རང་མེད། 6 ག་དེམ་ཅིག་སྦེ་ ང་བཅས་ཀྱིས་ཁོ་དང་གཅིག་ཁར་ མཐུན་ལམ་ཡོད་ཟེར་སླབ་སྟེ་ ང་བཅས་གནག་དུང་ནང་རང་འགྱོ་སྡོད་པ་ཅིན་ ང་བཅས་ཀྱིས་ཤོབ་བརྐྱབས་ཏེ་ བདེན་པ་ནང་མ་འགྱོ་བར་སྡོདཔ་ཨིན། 7 དེ་འབདཝ་ད་ ཁོ་འོད་ནང་རང་བཞུགས་ཡོདཔ་ལས་ ང་བཅས་ཡང་འོད་ནང་འགྱོ་བ་ཅིན་ ང་བཅས་རང་གི་སྦུག་ལུ་ མཐུན་ལམ་ཡོདཔ་མ་ཚད་ ཁོ་གི་སྲས་ཡེ་ཤུ་ཁིརཱིས་ཀྱི་སྐུ་ཁྲག་གིས་ ང་བཅས་ཀྱི་སྡིག་པ་ག་ར་ནང་ལས་བཀའ་དྲིན་བསྐྱང་གནང་འོང་། 8 ང་བཅས་ཀྱིས་ རང་གིས་རང་ལུ་ སྡིག་པ་མེད་ཟེར་སླབ་པ་ཅིན་ རང་གིས་རང་ལུ་མགུ་བསྐོར་བརྐྱབས་མ་ཚད་ ང་བཅས་ཀྱི་ནང་ན་ བདེན་པ་མེད། 9 ང་བཅས་ཀྱིས་རང་གི་སྡིག་པ་ལུ་ ཁ་བཟེད་བ་ཅིན་ ཁོ་གིས་ང་བཅས་ཀྱི་སྡིག་པ་དེ་ བཀའ་དྲིན་བསྐྱང་གནང་འོང་ དེ་ལས་མ་གཙངམ་ཚུ་གི་ནང་ལས་ ཁོ་གིས་ང་བཅས་ལུ་གཙང་ཏོག་ཏོ་སྦེ་མཛད་གནང་འོང་ ག་ཅི་སྨོ་ཟེར་བ་ཅིན་ ཁོ་ན་འཐན་ཏོག་ཏོ་དང་ཁྲིམས་ཕྲང་སྟེ་ཕྱེ་མིའི་དཀོན་མཆོག་ཨིན། 10 ད་ང་བཅས་ཀྱིས་སྡིག་པ་འབད་འབདཝ་མེད་ཟེར་སླབ་པ་ཅིན་ ང་བཅས་ཀྱིས་ཁོ་ལུ་ ཞལ་རྫུན་གསུངས་མི་བཟུམ་སྦེ་བཟོཝ་ཨིན་ དེ་ལས་ཁོ་གི་གསུང་དེ་ ང་བཅས་ཀྱི་ནང་ན་མི་བཞུགས།