Zofari wi sɛnyoro koŋgbannda:
11
1 Kona, Zofari ŋa wìla yiri wa Naama tara wì si sɛnrɛ ti lɛ, mɛɛ Zhɔbu wi pye fɔ:2 Naga yɛn ma, yɔn sogomɔ si daga mbe kan ki sɛnlɛgɛrɛ nda tì yo ti na wi le?
Naga yɛn ma, yɔn tangawa po mbe ya mbe tanga kan lere yeri wi le?
3 Naga yɛn ma, ma sɛnlɛgɛrɛ to kala na leele pe daga mbe pyeri wi le?
Ma yɛn naga lakoo leele sanmbala poro na, ko lere ka ka mboro tifaga wi le?
4 Mà yɛrɛ ki yo maga filige ma yo ma nagawa sɛnrɛ ti yɛn ma sin,
fɔ ma yɛn fyɔngɔ fu Yɛnŋɛlɛ li yɛgɛ na.
5 E! Ndɛɛ Yɛnŋɛlɛ li mbe ja yɛnlɛ mbe para,
ndɛɛ li mbe ja yɛnlɛ mbeli yɔn ki yɛngɛ mbɔɔn yɔn sogo,
6 ndɛɛ li mbe ja li kajɛnmɛ larawa kagala ke naga ma na,
koro ŋgele kè wɛ sɛnwee tijinliwɛ pi na,
pa ma jɛn naga jɛn fɔ Yɛnŋɛlɛ lɔɔn kajɔgɔrɔ ta yan, mari kala yaga ma na.
7 Naga yɛn ma, ma mbe ya mbe Yɛnŋɛlɛ li larawa kagala ke sɛgɛsɛgɛ mbe ke jɛn wi le?
Ma mbe ya mbe lo na yawa pi ni fuun fɔ li kagala ke ni fuun ke jɛn mbe ke kɔ wi le?
8 Ke yɛn ma yagara ma wɛ naayeri wi na, yiŋgi ma mbe ya pye?
Ke yɛn ma jugo ma wɛ kuulo tara ti tijuguwo pi na, yiŋgi ma mbe ya jɛn wa ko ni?
9 Ke titɔnlɔwɔ pi wɛ tara ti titɔnlɔwɔ pi na,
ke gbemɛ pì wɛ kɔgɔje wi gbemɛ pi na.
10 Na Yɛnŋɛlɛ li kaa tooro, mbe si lere wa yigi mbeli le kaso,
na li ka lere wa yeri kiti kɔnsaga, ambɔ wi mbe ya mbeli yɛgɛ kɔn?
11 Katugu lì leele fanlafɛnnɛ pe jɛn,
li ma kambasinŋge ki yan, laa cɛn laga saga jaa tetete.
12 Ɛɛn fɔ lembige ki se ya mbe kajɛnmɛ ta fyew,
fɔ ndɛɛ pilige ŋga ni yan sofile wi ka ca sofile se ko lembige ki yaa kajɛnmɛ ta†.
13 Mboro wo na, na maga ma jatere wi kanŋga mboo wa Yɛnŋɛlɛ li na,
na maga ma kɛyɛn yi yirige wa naayeri mbeli yɛnri,
14 na maga ma kɛɛ ki wɔ kapege pyege ki ni,
na mɛɛ yere ki na kambasinŋge ki koro wa ma go,
15 pa kona ma yaa ma yɔlɔgɔ ki yirige caw, jɛrɛgisaga se pye ma na;
ma yaa yeresaga ta, ma saa fyɛ yaraga ka na.
16 Pa ma yaa fɛgɛ ma tege ki na;
ma yaa la nawa tuun ki na paa yɛgɛ ŋga na tɔnmɔ ma kaa fo ma kari we.
17 Ma yinwege ki yaa ka yanwa ta mbe laga mbe wɛ yɔnlɔfunŋgbanga yanwa pi na;
diwi wi yaa pye paa lalaaga yanwa yɛn ma kan.
18 Pa ma yaa taga ma yɛɛ na, katugu jigi tagasaga yaa pye ma yeri;
kala li ni fuun li yaa yɔn ma kan, ma yaa la sinlɛlɛ yɛyinŋge na pɔw.
19 Ma yaa ka sinlɛ mbaa wogo, lere kpɛ se pan mbɔɔn jɔlɔ;
lelɛgɛrɛ yaa kaa paan mbaa ma yɛnri ma pe saga.
20 Ɛɛn fɔ lepeele pe yaa ka wele mbe te, yɛngɛlɛ ke sa wɔ sagawa wogo na;
larasaga kpɛ se ka ta pe na,
jigi tagasaga nuŋgba ŋga ki yaa ka koro pe yeri, ko ki yaa pye kunwɔ we.