Zhɔbu wi yɔn sogomɔ sanmba:
10
1 Yinwege kì la ki kɔ na na!Koni mi yaa na kayaŋga ki yɛgɛ yo,
mi yaa para mbe yala na nawa pì tanga yɛgɛ ŋga na ki ni.
2 Mi yaa ki yo Yɛnŋɛlɛ li kan fɔ maga ka kiti kɔn na na mbanla le jɔlɔgɔ,
ɛɛn fɔ maa na jɛrɛgi go ŋga na ki yo na kan!
3 Naga yɛn ma, mbaa na jɔlɔ ko ki yɛn mɔɔ ndanla wi le?
Mbe je yaraga ŋga mà gbegele ma kɛɛ ki ni,
konaa mbe ti lepeele pe kɛɛ tunndo tila yɔngɔ pe kan, ko ki yɛn mɔɔ ndanla.
4 Naga yɛn ma, sɛnwee yɛngɛlɛ ke yɛn ma na wi le?
Naga yɛn ma, ma yaara yanlɔmɔ po naa sɛnwee yanlɔmɔ pi ni, pi yɛn ja wi le?
5 Naga yɛn ma, ma yinwege piliye yi were paa sɛnwee woyo yi yɛn wi le?
Ma yɛgɛlɛ yɔn kì were paa sɛnwee wogo ki yɛn wi le?
6 Yiŋgi na, a ma nɛɛ na puŋgosaga ki jaa mbege jɛn?
Yiŋgi na, a ma nɛɛ na kapege ki sɛgɛsɛgɛ mbege jɛn?
7 Ma si yala maga jɛn makɔ ma yo fɔ mi woro jɔgɔfɔ,
fɔ lere kpɛ se ya mbanla shɔ ma kɛɛ.
8 Yɛnŋɛlɛ, mboro màla da, ma kɛyɛn yo yìlan wire lombondo ti fanri;
ɛɛn fɔ koni ma yɛn na jaa mbanla tɔngɔ!
9 Ki yaga mɔɔ jatere wi tɛgɛ ki na fɔ màla fanri paa pe ma kaa yaraga ka fanri joro ni we;
naga yɛn ma, ma yɛn na jaa mbanla tɔngɔ mbanla sɔngɔrɔ wa taambugɔ ki ni wi le?
10 Màa na fyɛnli paa nɔnɔ yɛn mala gbegele,
a mà ti mì simbi paa nɔnɔ nara yɛn.
11 Kona, a mà si sɛlɛgɛ naa wire kara le na ni,
mɛɛ na sogolo yɛɛ na kajeere naa kapannda ni.
12 Mà yinwege kan na yeri, ma kagbaraga pye na kan,
mɔ̀ɔ jatere wi tɛgɛ na na, nala yinwege ki go singi.
13 Ma si yala, ma yɛn na larawa kala la lara wa ma kotogo na,
ɛɛn fɔ ŋga ki yɛn wa ma nawa, mìgi jɛn.
14 Màa pye na jaa mbaa na kɔrɔsi mbe ta mbanla yigi kapege pyege ka go na;
kona ma se yɛnlɛ mbanla puŋguwɔ pi kala yaga na na.
15 Na kaa pye mi yɛn jɔgɔfɔ, jɔlɔgɔ yɛn na wogo!
Na kaa si pye mi yɛn sinŋɛ, mi se ya mbanla go ki yirige,
fɛrɛ tìlan yigi matoro, na fyɔnwɔ pì kɛɛ toro.
16 Na mi ka yo mi yaa na go ki yirige, ma maa na puro paa jara yɛn;
ma maga ŋgban na na jɛŋgɛ ma fanŋga fyɛrɛ wogo ki ni.
17 Ma yɛn na yinrigi na kɔrɔgɔ naga tagala ki yɛɛ na,
ma naŋgbanwa pi yɛn na seregi na ni;
ma maliŋgbɔɔnlɔ pe yɛn na tuun na na naga waa na pe yɛɛ kaan.
18 Yiŋgi na màa si ti, a mì yiri wa na nɔ wi lara?
Ndɛɛ mìla ku, lere kpɛ se jɛn nala yan yɛnlɛ ni.
19 Mi jɛn na pye paa lere ŋa wi sila yiri laga dunruya wi ni;
na nɔ wi mbaa na se mì ku, pe sila kee na ni teere wa fanga ki ni.
20 Na yinwege piliye yì koro jɛnri.
Koni Yɛnŋɛlɛ lilan yaga ma.
Li laga na na, mbe ta mbe wɔn mbe tigi jɛnri;
21 sanni mbe sa kari wa laga ŋga mi se sɔngɔrɔ mbe pan naa,
wa tara nda diwi gbɔlɔ lo naa kunwɔ pi diwi wi yɛn.
22 Diwi gbɔlɔ tara ri, ki laga kì wɔ conjonjo paa yembinɛ wɔlɔ yɛn;
kunwɔ pi diwi wowi, laga ŋga kala pyew lì gbɔn ma piri wa;
ki laga ki yɔnlɔ yanwa pi yɛn paa yembinɛ wɔlɔ yɛn.