Zhɔbu wi yɔn sogomɔ:
12
1 Kona, a Zhɔbu wì si Zofari wi yɔn sogo ma yo fɔ:2 Kaselege ko na, sɛnwee piile pe jɛnmɛ pi ni fuun pi yɛn yoro yeri,
na yoro ka ku, kona kajɛnmɛ po pì ku.
3 Konaa ki ni fuun, mi fun tijinliwɛ yɛn na ni paa ye yɛn,
ye woro ma mbɔnrɔ na na,
nda yè yo, lere pyew ti jɛn.
4 Mì pye titɛgɛrɛ yaraga na wɛnnɛ pe yeri,
mi ŋa mi ma Yɛnŋɛlɛ li yɛnri, jaŋgo lilan yɔn sogo,
mi ŋa mi yɛn lesinŋɛ, a na nawa pi yɛn ma filige na na,
mì pye pe yeri titɛgɛrɛ yaraga.
5 Lere ŋa wi yɛn tege na, wo wi ma tifagawa ta,
ko ki yɛn lere ŋa wi yɛn fɛrɛwɛ na wi sɔnrimɔ we.
Lere ŋa ka kurugo mbe to, ko fɔ wo daga mbe tifagawa ta.
6 Ma si yala beŋganri pyefɛnnɛ poro yɛn yɛyinŋge na wa pe yinrɛ ti ni;
mbele pe maa Yɛnŋɛlɛ li yinjere jaa, poro yɛn ma cɛn yɛyinŋge na pɔw,
poro mbele pe ma pe yɛɛra fanŋga ki pye pe yɛnŋɛlɛ le.
7 Ɛɛn fɔ yaayoro ti yewe, ti yaa ma naga;
naayeri sannjɛgɛlɛ ke yewe, ke yaa ka yo ma kan.
8 Para tara na yaara ti ni, ti yaa ma kara,
kɔgɔje ŋgbanra ti yaa ki yɛgɛ yo ma kan.
9 Ki yaara nda ti ni fuun ti ni, kikiin ki sigi jɛn
mbe yo fɔ Yawe Yɛnŋɛlɛ lo lìgi kagala ŋgele ke pye?
10 Yaara yɛnwere ti ni fuun ti yinwege ki yɛn lo kɛɛ,
sɛnwee wi yinwege wɔnwɔn pi yɛn lo kɛɛ.
11 Pe maa ki sɛnrɛ nda ti yuun ma yo fɔ:
«Nuŋgbolo li ma sɛnrɛ ti logo ma wali ti na,
paa yɛgɛ ŋga na yɔn ki ma suro ti tanwa pi jɛn maa wɔ pi yɛɛ ni we.
12 Kajɛnmɛ yɛn lelɛŋgbaara ti yeri,
kagala kɔrɔ jɛnmɛ yɛn yinwetɔnlɔgɔ fɛnnɛ pe yeri.»
13 Ɛɛn fɔ kajɛnmɛ naa fanŋga to yɛn Yɛnŋɛlɛ lo woro,
mbe kala kɔn mbeli tɛgɛ mbeli yɔn konaa tijinliwɛ, to yɛn li woro.
14 Yɛnŋɛlɛ li ka yaraga ŋga jɔgɔ, lere se ya mbege gbegele naa,
na li ka kɔrɔ ki tɔn lere ŋa na, lere se ya mbege kɔrɔ ki yɛngɛ wi na.
15 Na li ka tisaga ki yerege, yaraga pyew ki ma waga,
na li ka tɔnmɔ pi yaga pila paan, pi ma tara ti jɔgɔ.
16 Fanŋga naa kapyɔ jɛnmɛ pi yɛn lo ni;
lere ŋa wì puŋgo konaa lere ŋa wì pele puŋgo, pe ni fuun pe yɛn li woolo.
17 Li ma ti tara ti yɛgɛfɛnnɛ pe maa tanri tɔɔrɔ wara†,
li ma tara teele pe jatere wi jɔgɔ pe na.
18 Li ma wunlumbolo pe kurusijaraye mbele mɛgbɔgɔ woolo pe sangala pe na,
mbe si pe pɔ kulowo maŋgala ni wa pe sɛnŋgɛlɛ ke na†.
19 Li ma ti saraga wɔfɛnnɛ* pe maa tanri tɔɔrɔ wara,
mbele pe fanŋga ki gbegele ma cɛn, li ma pe fanŋga ki jan le yɔnlɔ nuŋgba li ni.
20 Leele pe jigi wi yɛn leele mbele na, li ma sɛnrɛ ti kɔ wa pe yɔn,
mbe kagala yɛgɛ jɛnmɛ pi shɔ lelɛŋgbaara ti yeri.
21 Li ma tifagawa kan mɛgbɔgɔ fɛnnɛ pe yeri,
mbe fanŋga fɛnnɛ pe fanŋga ki kɔ le yɔnlɔ nuŋgba li ni.
22 Li ma diwi kagala ŋgele ke yɛn ma lara ke yirige funwa na,
mbe kunwɔ pi diwi wi yirige funwa na.
23 Li ma cɛngɛlɛ ke jiti, kona mbe si ke tɔngɔ,
li ma ti cɛngɛlɛ ke ma lɛgɛ, ko puŋgo na, li mɛɛ ke jaraga.
24 Li ma tijinliwɛ pi shɔ tara woolo pe teele pe yeri,
mbe pe yaga paa yanri paa toro faa wa gbinri* wi ni, wo ŋa konɔ woro wa.
25 Pe maa talitali na tooro wa diwi wi ni yanwa fu;
li ma pe yaga pe maa gbali na tooro paa sinndire fɛnnɛ yɛn.