Pawulo rà Rumi mí bba ò dda ó tùw nà
27
1 Pey tdèy tdè mà rà rà Italiya mí bba ò dda ó tùw nà ro, ndrǔ bbû Pawulo ndèymí njàddí ngiy-dzà ó kpa nà la-dzàdha mí bba-dja thokpa ó cha ndèy ró dho tdè Yuliyo nì, à tdè Pey ddúw djú bba-dja Agusto ngá la-dzàdha mí ngúw. 2 Mà djèy Adramutiyo mí drǒngó ní bba óddù ndèy shì nì drǒngó nì ngǒ ò cha ndèy tdè rǎ dèy Aziya mí ju-ddà tsò ró nì. Aristarko, Makedoniya-ddùw Tesalonika óddò nì tdè mà nà.3 Něyngá bbǔtss̀ ró mà dèy Sidon mí bba ó; Yuliyo njèy lǎní Pawulo dhò, à ùw à rǎ ndèy dyási njà ndaní ndrǔ bbú à dhò à nì jǐ nì ddiy. 4 Fungá ddò mà rà tdè dda ó tuw nà Kupro mí juw djò cha vi tdè vu bbò mí nga là djòluw ddiydhò vi shì tdè mà nyú djú ddò. 5 Mà dà Kilikia ndèymí Pamfuliya mí ju-ddà tsò rò luw, mà shi Mura mí bba ó cha ndèy ní drǒngó ní bba Lukia mí ngòw ó nì. 6 Fungá la-dzàdha djú bba-dja chùw Iskaderiya óddù ndèy shì nì drǒngó ní ngǒ cha ndèy nì rǎ Italiya mí ngòw ò nì, à kâ mà ley òmà. 7 Mà rà tdè bbò bíy ní ddu dhò ndèymí mà shì tdè kpá-kpá-nga nà Knido mí bba ó ddiydhò vi tdè mà rř rr̀dha ní. Vi tdè mà rr ddiydhò, mà rà Krete mí njàddí juw gitèy djòluw cha nzǐ vi tdè shǐ mí nga òluw, Salmone mí juw mí tděy djò. 8 Mà rà ju-ddà tsò rò luw kpá-kpá-nga nà ndèymí mà shi cha kà íy nì Lǎní Dda tsò rónga ó, cha ndèy nì chow Lasaya mí drǒngó ní bba nà nì.
9 Bíy nì ddu dà tdè, bbiydha ngû tdè klǒw, ddiydhò nyû bbàdha mí ddu dà tdè ŋà.a Fúddiy dhò Pawulo drr̀ tdè ndrǔ gi ónga, 10 “Í kpa, ma njà màdhí i bbiydha nì rà dey tdrr nà ndèymí à rà drǒngó ní sàdha mbà màdhí ngǒ ró ndèymí nò na, ndèymí màdhí djiy ró ddí.” 11 Chú la-dzàdha djú drǒngóli, ngû ngǒ nyú-tey mbàdha dja ndèymí ngǒ dja mí lò rr̀ à da Pawulo mí lò. 12 Fú ju-ddà tsò tdè ngǎ lǎní drǒngó ní ngǒ dhò à děy ǒmá ndèymí bbalè dho ndrǔ déy ǒmá grr̀ mí nga nà, bíy nì bbalè ddêy tdè ì rǎ gu dda ó tuw nà ya ney ì dho shì Foyiniki mí bba ò ndaní ì déy fungá grr̀ mí nga nà. Fú ju-ddà tsò tdè Krete njà bbiysángòluw ndèymí rusángòluw nga là djòluw.
Ju-ddà djú rí ní vi
13 Bbò nì vi lòw vu ro, ndrǔ ddêy tdè ì chùw ŋà cha ì jǐ tdè nì ddiy, fú ddiydhò ndrǔ klô ngǒ ndrǔ rà Krete mí ju-ddà tsò rò luw. 14 Děy nzá ndrǔ rà tdè ndìy ní, rí nì vi tà juw djú ddò. Mí vi ka îy Ewurakulo.b 15 Vi lòw tdè ngǒ, ràdha nà njitsò djò ddí ngû kpá-kpá, fú ddiydhò mà bbà à rǎ mà nà cha à jì mí nga ò. 16 Mà kòw cha vi tdè vu bbò mí nga là djòluw ka íy nì Klawuda ní juw gitéy ró, mà mb mà mbdha ní drá ní ngǒ cha ndèy kwó nì li tso-tso tǔwtǔw nga mí nga nà à děy. 17 Ndrǔ tdûw drá ní ngǒ ru drǒngó ngǒ djò ro, ndrǔ shùw ngiy drǒngó ní ngǒ tss̀tò ndèymí ndrǔ chèy drá ní ngǒ ngbiy-kpiy drǒngó ní ngǒ djú, ddiydhò ndrǔ tdè do nà ràdha nà cha dda tss̀tey tdè chow mí nga ò Libiya mí ju-ddà tsò rò cha ndèy tdè Sarti ó nì. Fúddiy dhò ndrǔ thû kyele ní djuw dda tss̀tò, ndrǔ bbà vi déy à tdya fungá. 18 Mà mbr̀ mà kpéy vi nà ro, nêyngá bbǔtss̀ ró ndèy nì ngǒ nyú tey mbǎ nì li lòw dèy nò ngbo ngǒ óddù ju-ddà ò. 19 Ddu gbow nì ó ndrǔ lòw dey ngǒ ró tǔwtǔw ní ddiy ndèymí ngǒ thìdha mí ddiy ngbo ngǒ óddò. 20 Itsś ǐngí lùlú ddí kâ tdè nzá mà-djú bíy ní ddu dhò ro, rí ní vi dêy ndèy ndrr sǔw, fú ddiy dhò mà ddâ mà jùw pádha mí ddéydha djúddò.
21 Kpa nyù tdè ddiy nzá bíy ní ddu dhò ddiy dzzdjú, Pawulo ngbîy ndèy kpa nyú djú à tdrà, “Í kpa, nyì rř tdè ma tdrà nì lò, nyì ngbǐy tdè nyì nzá Krete óddò, nyì kà tdè nzá nyì chǔw í tdrr ndèymí nzadha nà. 22 Chú maní tdrǎ nyì dho, nyì léy nyì jùw déy klǒw, nyì kàó ddì li rò nì ngǎ cha ndèy rà viy; ngǒ chú ddì rà ndèy sà. 23 I ndèy dà nì kúw nà, Drà cha manì nděyngâ nì ndèymí cha ma nzz nì nì ngá malayika dèy ma gitéy, 24 à tdrà, ‘Pawulo, nzǐ do njěy nyi. Kayisari kà ndèy rř nyi ka bbòw mí lò pbǔw; ndèymí njà Drà bbûw nyi dhò ndru nà wá ní ndrǔ dhí djiy cha nyi nì bbiy ì nà nì.’ 25 Fúddiy dhò, í kpa, nyì jùw déy kpá-kpá, ddiydhò manì ùwdha nà Drà ó, ddiy wánì rà ndèy njèy cha à tdrà ma dhò níchú. 26 Chú, mà rà shì pbǔw njàddí juw djò.”
Ju-ddà djú gbu-djá
27 Ddu dri ndèy djú tho nì nà kâ ro, rí ní vi dêy mà mbǎ Adriya mí ju-ddà ò, kúw chirr nà, ngǒ ó njí-djá tdè chow-chow shìdha nà dziylíy djò. 28 Ndrǔ bblà nga ddéydha mí ngiy dda tss̀tò ro, ndrǔ chùw à shì chow-chow mítà drì-drí nga tho, drá ní nga dzzdjú ndrǔ bblà ddíyàchú, ndrǔ chùw à shì chow-chow mítà drì-drí nga rwo ndèy djú zargbòw nà. 29 Do lòw mà, mà ddêy mà rà mà pbèy djuw ró, ndrǔ bblà nyòrr̀ tho ngǒ tss̀tò mà pbò ndanà cha ndèy nì vu nì vi. 30 Ngǒ ó njí-djá cha ì tdè jǐ ì í ì ngǒ óddù ju-ddà ò nì, ndrǔ thûw li-pádha mí ngǒ ju-ddà ò, gbè ndrǔ tdè jǐ ì ngbǒ tǔw-tǔw ní chǒwmà fú ngǒ ndèy tsò djúddò dda ò. 31 Pawulo kâ tdrà la-dzàdha mí kpa djú bba-dja ndèymí la-dzàdha djá nà, “Ya fú kpa dêy nzá ngǒ ò li rò nì ngǎ ndèy rà pa nì.” 32 Fúddiy dhò la-dzàdha mí kpa tdèy ngiy cha ndèy lòw tdè li-pádha mí ngǒ nì ndèymí ndrǔ bbà à chěy dda ò. 33 Cha nga lǒw dêy ndèy bbu ro, Pawulo kwô ndrǔ wá ndrǔ nyǔ nga rò. À kâ tdrà, “Ddu dri ndèy djú tho nì nà cha nyì pbò nyì bbǎ ndanà nyû nì, cha nyì nyù ǒmá ddiy rò nzá nì. 34 Nja-nja manì nyì kwo, nyì nyǔ nyû rò: fúnì nì nyìdhí pádha mî, li rò nì ngǎ ndèy djùkpa ró ɦěy rò ddì nì rà viy ndeyli djùkpa róddò.” 35 À tdrà fú lò ddiy dzzdjú, à tdûw fú nyû, à bbû madha Drà dhò ndrǔ nyú djú wá; à kâ ǒnga pbrr̀, à lòw dey nyù ddí. 36 Ndrǔ jùw wá tdè klǒw ndèymí ndrǔ ddí zz̀ ka nyù. 37 Mà wá cha mà tdè fú ngòw ó nì mà tdè 276. 38 Ndrǔ ónga kì ro, ndrǔ ngù ngǒ vukávu ngǎnù bbládha nà ju-ddà ò.
39 Nga tûw ndèy ro, ndrǔ tsì nzá ì tdè mí nga, chú ndrǔ njà cha ndèy lùw ndèy nì dda tsò ndèy ó sǒwrr nà nì, ndrǔ dděy lò yà ney ì dhò ngǒ ley à děy djòmà ddiy. 40 Ndrǔ klô djuw, ndrǔ bbà ngǒ dda ò, ndrǔ klô cha ka chey tdè mí ngiy, ndrǔ tdûw ngǒ ndèy-tsò djú rù vi dhò, ndrǔ kâ rà ju-ddà tsò rò. 41 Chú ndrǔ shi tdè cha rwo nì ju-ddà njûw tdè ì mí nga ó ro, ngǒ dùw ndèy ngbiy-kpiy sǒwrr ò. À ndèy-tsò pbà nzǐ à dho ndèy dda, ndèymí à tey-tsò lòw dey ndèy kpa dda mí klôw dhò.
42 La-dzàdha djá ddèy tdè ì hwî ngiy-dzà ó kpa gudjò ndani nzánà ndrǔ pěy dda ndèymí ndrǔ kǒw gudjò. 43 Chú bba-dja la-dzàdha djá dhî cha ndèy jì tdè ndèy pá Pawulo nì, à tsâ ndrǔ ró cha ndrǔ tdè jǐ ì njěy nì ddiy ró. À jà cha ì dho dda pèy nì ndrǔ dhò ndrǔ í ì dda ò ndaní ndrǔ shǐ nji dziylíy djò, 44 cha ì gògò mànì ndrǔ pbà bǎw djú, ǐngí ndèy kwò ndèy nì ngǒ djú. Fú tuw òluw bbalè wánì shì ngòw tsò rò lǎní.