26
1 Agripa kâ tdrà Pawulo dhò, “Ka ùw ŋà nyi těy nyi mí lò nyiníddò.”Fúddiy dhò Pawulo ddà ndèy thokpa ónga à kâ ndèy ró lò-tey tdrà, 2 “Ma dèddò hwî nì ma njèy, maníddù, Pey Agripa, manì màtsá lò těy ndu nyi nyú djú Yahuddi-ddúw bbòw ma dho mànì, 3 ndèymí ddiydhò nyi nì nyǔꞌwiy nà bbachá ndèymí lò dhíydha Yahuddi-ddúw kàó. Fǔchú ro, manì nyi kwo nyi rř ma shú ní thíy nà.
4 “Yahuddi-ddúw wá tsì màtsá déydha ó ma tdè ngba mí nga djú ddò, pbǔw ma dhìy ddiy ò à nga ndèy màdhí ngòw ó ndèymí Yerusalemu mí bba ò ddí. 5 Ndrǔ tsì ma ndruní nga djú ddò ndèymí ya ndrǔ ùw, ndrǔ rà kwo manì Farisayo-ddùw cha ndèy dyòw màdhí ndèy ndò ndèy klôw nà nì ddǐnì. 6 Ndèymí màtsá ddéydha cha Drà tdèy mà djá dhò nja-nja ma dèy ndaní ka ndǒ màtsá lò. 7 Í nì lò-tdèydha màdhí dri ndèy djú rwo nà nì pbúw cha ì nzz nì Drà ì ró ꞌwíy nì nà itsś ndèymí kúw ónga nà. Eee pey, à nì í ddeydha djú Yahuddi-ddúw nì ma bbǒw. 8 Ddudhò nzǐ nyì ní ǔw Drà dho ì dhì nì ndrǔ tduw dhi óddù?
9 “Ma tdrà dìychú maníddù à jì ma njěy wánì ddiy cha ndèy dà nì cha à gù Nazareti ó Yesu ró dho nì. 10 Fúnì cha ma njèy tdè Yerusalemu mí bba ó nì ddiy. Ma lêy bíy ní thí nì ndrǔ ngiy-dzà ò, mí lò-tdèydha ma chùw Drǎ ngá dyǎdjá mí ngúw djú bba-dja dèddò, ndèymí ka nì ndrǔ hwǐ ro, ma vû tdè ndrǔ. 11 Ma bbû ndrǔ dhò nzadha wánì Yahuddi-ddúw dhí njuwdha-dzà óddò bíy nì nga nà, ma lêy ndrǔ dhùw Kristo ddí ddiydhò ma tdè thǒw nà drǒ ndrǔ ró, ma bbû ndrǔ dhò nzadha njàddí ndrǔ dhí drǒngó ní bba ò luw ddí.
12 “Ddì nì bbiydha ó ma tdè rǎ Dameski ò Drǎ ngá dyǎdjá mí ngúw djú bba-dja dèddò nì lò-tdèydha ndèymí lò-léydha nà. 13 Sâ za itsś ónga mî, Eee pey, ma tdè tuw ó, ma njà kadha rakpa óddò, à dà itsś mí kadha djòluw, à î ma rónga gbrř ndèymí mà bbîy ì nà nì ndrǔ nà. 14 Mà wá chêy gudjò, ma rr̀ ddiy chuw nì ndèy tdrǎ ma dhò Ebraniya ló nà,a ‘Sawulo, Sawulo, nyi ní ma ró nzadha nya ddudhò? À nì ngǎ lǎní nyi njěy la ma jì nì ndèy njěy ndèy nì lò-tsò ró.’
15 “Ma kâ dhiy, ‘Nyi ná áyì, Drǒngóli?’
“Drǒngóli ngù lò dzzdjò, ‘Manì Yesu, cha nyi nì nzadha bbu ndèy dhò nì.’ 16 ‘Nja-nja ngbí nyi ru ndèymí dèy nyi koko djú. Ma dhò ma nyi dhò, ma léy nyi nokpa ní ndèymí ndèy tsì i nyi njà nì màtsá lò ró lò nì li ní ndèymí cha ma ra dhò nyi dhò nì ddiy nà. 17 Ma rà nyi pa nyìmí bbalè Yahuddi-ddúw thokpa óddù ndèymí Yunani-ddúw kpa dèddò. Manì nyi cho ndrǔ dè 18 nyi pǔ ndrǔ nyú ndèymí nyi lí ndrǔ kúw ni nga óddò kadha ò, ndèymí setani ngá klôw óddò Drà dè, ndaní ndrǔ kwó cherr bbàdha ndèymí ndrǔ ngǔ ì thí ma ó ùwdha nà.’
19 “Fú ddiydhò, Pey Agripa, ma tsâ tdè nzá rakpa óddò nì ddùw ró. 20 Fú lò rónga pbòdha dhò, nji mà tdrà lò Dameski ó nì ndrǔ dhò, fú ddiy dzzdjú Yerusalemu ó nì bbalè dè ndèymí Yuddeya óluw wá, ndèymí Yunani-ddúw ddí, ndrǔ lí ì dhà rónga ndèymí ndrǔ lí ì Drà dè, ndrǔ dhǒ ìdhí ì dhà rónga lídha ìdhí njeydha nà. 21 Fú ddiy lêy Yahuddi-ddúw lòw ma Yahuddi-ddúw dhí Drà-dzà mí bbay djú ndèymí ndrǔ ddêy tdè ì hwî ma. 22 Chú ma chùw Drà mí li thotsò kwódha pbǔw ndu nì ddu ò, fú ddiy dhò ma dèy ingá ndaní ma tdrǎ fú lò-ɦéy dù-dú ndèymí drò-dró ní bbalè dhò ddì-kà-ddì. Manì nzǐ ngéy ní lò tdrǎ cha ndèy da nabi ndèymí Musa ngá yǎdha tdrà ndèy rà ndèy njèy nì ddiy, 23 ddiydhò Kristo rà ndèy nza ndèymí cha nji nì li ní à rà ngu djiy ní dhi óddò, à rà kadha dhò ndèy mí bbalè dhò ndèymí Yunani-ddúw dhò.”
24 Í nga nà Festo kâ Pawulo tdè tdrǎ nì ndèy mí lò ónga tdèy, “Pawulo, nyi nì ngòwtsá, nyì mí drǒ ní lò-tsìdha nì nyi tsa ngòwtsá ní.”
25 Pawulo ngù lò-dzzdjò, “Manì ngǎ vǐy, bba-dja Festo. Manì tdrǎ nì ddiy nì dìychú ndèymí chǒw. 26 Pey tsì í ddiy-kpà ŋà, ma dho lò tdrǎ à dè ngǎ do ní. Ma tsì ŋà ddiy rò nì ngǎ ndèy rù ndèy fú li róddò, ddiydhò à njèy ndèy nzá rùdha ní nga ò. 27 Pey Agripa, nyi ûw ŋà nabi kpa ndîy nì ddiy? Ma tsì nyi ùw ŋà.”
28 Agripa kâ tdrà Pawulo dhò, “Nyi ní ddey í drá nyi tdrà nì lò nà, nyi dho nà nèy ma chey ma ngú Kristayo ní?”
29 Pawulo ngù lò-dzzdjò, “Drá ní sâ ǐngí ndì ní sâ, manì Drà nzž ngǎ nyidhò ddǐ-ddi ní, chú bbalè wánì dhò cha ì nì manì tdrǎ nì lò rř ndu nì, ndrǔ ngú maní, chú ngǎ shúdha ní.” 30 Pey ngbî ndèy ru ndèymí li djùkpa ddàdha dja nà ndèymí Berenike ndèymí ndrǔ dêy ì nà nì kpa nà ddí. 31 Ndrǔ shì dza óddù ndèymí cha ndrǔ dêy lò těy ì kàó ndrǔ tdrà, “Í li njèy ddiy rò nzá cha ndèy ka dhi nà nì ǐngí fú li shúdha nà nì.” 32 Agripa tdrà Festo dhò, “Í li kà tdè ŋà ka bbǎ ya nzá à tdrà tdè Kayisari dho ro.”