Pawulo Festo nyú djú
25
1 Ddu gbow Festo shì tdè ndanà fú ngòw ó nì dzzdjú, à rà tdè ru Yerusalemu mí bba ò Kayisariya mí bba óddù, 2 cha Drǎ ngá dyǎdjá mí ngúw djú bba-dja ndèymí Yahuddi-ddúw djùkpa ddàdha djá shì tdè à nyú djú ndèymí ndrǔ lêy lò Pawulo ró. 3 Zěy-zěy ndrǔ kwô Festo tsò ró à njěy ì dhò lǎní, à mbǎ Pawulo Yerusalemu mí bba ò, ddiydhò ndrǔ ddêy tdè ì shǐ à tsò tdèy, ì hwǐ à tuw ó. 4 Festo ngù lò, “Pawulo ka lòw Kayisariya mí bba ò, ma, maníddù nì rǎ fulè nja-nja. 5 Nyì léy mà rǎ nyì kàó njàddí bba-djá rò nà, ndèymí ndrǔ bbǒw à fulè, ya fú li njèy ngǎjìní ddiy rò ddí.”6 Déydha ndrǔ nà ddu rù ǐngí dri nì dzzdjú, à rà bbiy Kayisariya mí bba ò ndèymí nêyngá bbǔtss̀ ró, à îy lò-ndòdha mí njuwdha ndèymí à jà ka mbǎ Pawulo ndèy nyú djò. 7 Pawulo shì tdè ro, Yahuddi-ddúw cha ì shì tdè Yerusalemu óddò nì dèy à ròluw, ndrǔ dêy bíy ní lò shúwdha mbǎ à ró, cha nzǐ ì dho tey nì klo nì.
8 Pawulo kâ ndèy ka bbòw mí lò klo: “Ma njèy nzá ngǎjìní ddiy Yahuddi-ddúw dhí yǎdha ró ǐngí fú Drà-dzà ró ǐngí Kayisari ró.”
9 Festo cha ndèy jì tdè ndèy njěy lǎní ddiy Yahuddi-ddúw dhò nì, tdrà Pawulo dhò, “Nyi ní jǐ nyi rǎ Yerusalemu mí bba ò ndaní nyi ká cha nyi ndrǔ bbòw mí lò tdrà ma nyú djú fulè?”
10 Pawulo ngù lò, “Ma dèy nja-nja Kayisari ngá lò-ndòdha nyú djú, cha ka njǎ màtsá lò ónga mí nga ó. Ma njèy ngǎjìní ddiy rò nzá Yahuddi-ddúw dhò, cha nyi, nyiníddò tsì lǎní níchú. 11 Ya ma njèy ngǎjìní ddiy rò cha ndèy kà dhi nà nì, ma gù nzá nzǐ ma dhǐ. Chú ya ma Yahuddi-ddúw bbòw ma mí lò nì ngǎ dìychú, li rò nì ngǎ tuw nà cha ndèy dho ma bbu Yahuddi-ddúw thokpa ò nì. Ma jì Kayisari rř mà tsá lò!”
12 Festo mà njà lò-ónga nděyngá njuwdha nà nì dzzdjú, à tdrà: “Nyi jì Kayisari njǎ nyìmí lò-ónga. Nyi rà rà Kayisari dè!”
Pawulo, Agripa ndèymí Berenike nà nyú djú
13 Drá nì ddu dzzdjú Pey Agripa ndèymí vînì, Berenike nà shì Kayisariya mí bba ò Festo dò njèydha dhò. 14 Cha ndrǔ tdè bíy ní ddu si fungá níchú, Festo mà kâ Pawulo ka bbòw tdè mí lò-ónga njà Pey nà. À kâ tdrà, “Li rò nì ney ingá cha Feliki bbà tdè ngiy-dzà ó nì. 15 Ma rà tdè Yerusalemu mí bba ò ro, Drǎ ngá dyǎdjá mí ngúw djú bba-dja ndèymí Yahuddi-ddúw dhí bba-djá lêy lò Pawulo ró ndèymí ndrǔ dhîy ka tděy lò Pawulo djù.
16 “Ma tdrà ndrǔ dhò, à nì ngǎ Roma mí bbalò ka bbú ndèy ka bbòw nì li nzá ndrǔ tdrà lò ndèy bbòw ndèy nì li nà ní, chú à kà ka bbǔw ndèy ka bbòw nì li tdrǎ ndèy ro lò tey. 17 Ì bbòw à nì ndrǔ shì tdè ingá ma nà ro, ma pbò nga nzá fú lò nà, chú nêyngá bbǔtss̀ ró, ma dòw lò-ndòdha mí thìynga djò, ma jà ka mbǎ fú kpatss̀. 18 À bbòwdha djá ngbî ì ru ì tdrǎ à ró lò ro, ndrǔ tdrà nzá à ró ngǎjìní lò cha ma ddêy tdè nì. 19 Fú ddiy rr̀djá, ndrǔ tdè lò-rr̀dha mí lò rò nà à dè ìdhí dǐnì ndèymí ndèy dhì nì kpatss̀ ndèy ró dho nì Yesu cha Pawulo nì tdrǎ ndèy nì djiy ní mǐ. 20 Ma ddí tsì tdè nzá ya ŋǎchú ma dho fú lò-ónga tuw; fú ddiy dhò ma dhîy tdè ya à dho rà Yerusalemu mí bba ò ndaní ka ndò à djú lò fulè. 21 Pawulo lêy tdè ndèymí lò ka bbú ndèy Pey ddúw djú bba-dja Agusto mí lò-ndòdha dhò ro, ma jà ka pbǒ à pbǔw ka rà à chó Kayisari dè ddiy ò.”
22 Agripa kâ tdrà Festo dhò, “Manì jǐ ma rř í kpatss̀ mí lò maní ddò.”
À ngù lò, “Nyi rà fú li mí lò rr̀ bbǔtss̀djú.”
Pawulo pey Agripa nyú djú
23 Něyngá bbǔtss̀ ró Agripa ndèymí Berenike nà shì tdè drǒngó ní li kwódha nà, ndrǔ tsùw cha lò ka rr nì mí nga ò, drò-dró ní la-dzàdha djú kpa nà ndèymí njàddí drò-dró ní kpa nà fú drǒngó ní bba ó nì nà. Festo mí lò jàdha nà ka mbǎ Pawulo dzà ò. 24 Festo tdrà, “Pey Agripa, ndèymí wá cha ì nì ney mà nà nì ndrǔ nà, nyì nja í kpatss̀! Yahuddi-ddúw dhí ngòw ó bbalè wá bbòw ma àmí lò djú Yerusalemu mí bba ó ndèymí ingá Kayisariya mí bba ó, swádha nà nzǐ fú kpatss̀ déy djiy ní díyàchú. 25 Ma chùw fú li njèy lò nzá cha ndèy kâ dhi nà nì, chú gbè à lêy ndèymí lò rǎ Roma mí drǒngó ní pey Agusto dè níchú, ma ddêy ma chó à Roma mí bba ò à dè. 26 Chú manì ngǎ ddiy ní cha ma dho ndiy à ró Pey ddúw djú drǒngóli dhò nì. Fúddiy dhò ma mbà à nyì wánì nyú djú, nú nyi nyú djú Pey Agripa, ndaní í lò dzzdjú ma déy ddiy nà ma dhò ndiy à ró nì. 27 Ddiydhò ma ddêy à nì ngǎ déy ka chó ka chèy nì li nzá ka tsì à ka chèy mí lò-tey ní.”