Pawulo Feliki nyú djú
24
1 Ddu mbu nì dzzdjú, Drǎ ngá dyǎdja djú bba-dja Ananiya rà tdè bbiy Kayisariya mí bba ò ndèymí njàddí bba-djá rò nà ndèymí lò-tdèydha-dja ndèy ró dho tdè Tertulo nì. Ndrǔ bbòw Pawulo li-djùkpa ddàdha dja dè. 2 Pawulo ka îy tdè dzá ro, Tertulo lòw Pawulo bbòw Feliki nyú djú, “Mà chùw drǒngó ní shú ní thíy nyi tdè mà djùkpa ddà mí ddu ó, nyǐngá lǎní lò tdéydha mbà màdhò lǎní ddiy í ngòw ó. 3 Drǒngó li Feliki, mà nì nyi kwo wánì nga òluw ndèymí wánì tuw nà, madha nà. 4 Chú ma jì nzá ma nzá nyi drǒ, manì kwo nyi tsò ró nyi rř màdhí drá ní í lò nyi thíy djòw ddiy nà.5 “Mà chùw í kpatss̀ nì lò nyádha dja, à nyâ lò Yahuddi-ddúw dhí dziylíy òluw wá. À nì Nazareti mí bbalè djùkpa ddàdha dja lò nyádha mî, 6 ndèymí à ddêy ndèy téy Yahuddi-ddúw dhí Drà-dzà ónga, fú ddiy dhò mà lòw à. 7 Chú, li-djùkpa ddàdha dja Lusiya shi, à ddâ à klôw nà mà thokpa óddò. 8 À mí lò ónga njàdha nà nyi rà tsì cha mà bbòw à mí lò wánì nì dìychú.” 9 Yahuddi-ddúw njûw ì mí lò ó, ndrǔ tdrà ddiy wá cha Tertulo tdrà nì dìychú.
10 Li-djùkpa ddàdha dja lî ndèy Pawulo dè à tdrǎ lò ro, Pawulo ngù lò-dzzdjò, “Ma tsì bíy ní cho dhò nyi tdè lò-ndòdha dja í ngòw ó nì, fú ddiy dhò manì màtsá lò tdrǎ. 11 Nyi kà nyi chǔw nzá ddu dri ndèy djú rwo nà nì dà ní, ma rà tdè Drà nzz̀ ru Yerusalemu mí bba ò. 12 Ma bbòwdha djá chùw ma nzá manì pàka njěy li rò nà Drà-dzà ó, ǐngí bbalè ónga ngbǔw Yahuddi-ddúw dhí njuwdha-dzà ó ǐngí njàddí drǒngó nì bba rò ó. 13 Ndrǔ dho ddí nzǐ cha ì bbòw ma mí lò-tey klo nyi dhò. 14 Chú manì tdrǎ nì lò nì dìychú, ma nzz nì cha mà bbúw nzz̀ tdè nì Drà, ngbè ndèy nì Yesu mí tuw dyǒw cha ndrǔ íy tdè mbwa ní nì. Ma ùw ddiy wá cha Musa ngá yǎdha ùw nì ndèymí cha ndèy ndîy ndèy nabi kpa dhí bǔkù ó nì. 15 Ma ddí nì ddì nì ùwdha nà Drà ó gbè í kpa níchú, djiy ní ngúdha dhi óddù nì rà tdè ney chǒw ndèymí ngǎjìní ddiy ì nì njěy nì bbalè dhò. 16 Fúddiy dhò, ma ji nì wánì nga nà ma déy lǎní ddeydha nà Drà nyú djú ndèymí bbalè nà.
17 “Bíy nì cho dzzdjú, ma rà Yerusalemu ò ma thokpa ó ddiy bbu màdhí ngá zòw nì ndrǔ kàó ndrǔ dhò ndèymí Drà ma, ma thokpa ó ddiy nà. 18 Ma ì bbòw nì kpa njà ma Yahuddi-ddúw dhí Drà-dzà ó cha ma tdè ma thìdha si ro, bíy ní bbalè-kpà tdè ngǎ ma nà, ǐngí ma tdè ngǎ ngéy ní lò nà. 19 Chú Yahuddi-ddúw rò tdè ney Aziya mí ngòw óddù, cha ì jì tdè ì děy nyi nyú djú ndèymí ndrǔ bbǒw ma, ya ney ndrǔ tdè ddiy rò nà ma ró. 20 Ǐngí ingá ì nì ndrǔ kà tdè ì tdrǎ ngǎjìní ddiy cha ì chùw ma njèy cha ma dèy tdè lò-tdèydha mí njuwdha nyú djú ro, 21 ya ngǎ à nì í ddì nì lò cha ma tdrà tdè rí nì ma chùw nà ma dèy tdè ndanà ndrǔ nyú djú ro, ‘À nì djiy ní ngúdha dhi óddù ddiy mí lò ka nì ndanà ndu ma bbǒw.’”
22 Feliki cha ndèy tsì tdè Yesu mi Tuw lǎní nì kâ fú njuwdha tsò dya drá nì nga dhò. À tdrà, “Lusiya cha ndèy nì la-dzàdha djá djùkpa ddǎ nì rà shì ro, ma rà nyìdhí lò ndò.” 23 À jà nděyngá la-dzàdha djá djùkpa ddàdha dja dhò à pbǒ Pawulo, chú à bbǎ à bbiy ndèy dho ndèymí à ùw à dyási bbú à dhò à nì jǐ nì ddiy.
24 Drá ní ddu rò dzzdjú Feliki shì nděyngá ɦìytss Drusila nà, à tdè Yahuddi-ddúw dhà. À îy Pawulo, à rř cha Pawulo nì tdrà Kristo Yesu ùwdha ró nì lò. 25 Cha Pawulo lòw dey chǒw ní lò njèydha mí lò tdrǎ, li-pbòdha ndèymí lò-ndòdha mí ddu rà shì ddiy, do lòw Feliki ndèymí à tdrà, “Nja-nja nga dhò fúnì kâ ŋà! Nyi dho rà. Ya ma chùw à nì lǎní ma dhò ro, ma rà nyi iy.” 26 Fúnga nà à dêy ddey Pawulo dho ney ndèy dho ddiy rò bbu ndèy dzž ndèy ndanà, fú ddiy lêy à dêy dyòw cho à kodjú wánì nga nà ndrǔ dêy lò tdrǎ à nà.
27 Cho rwo nì dà tdè ro, Porkiyo Festo nyù pey Feliki rr̀dja ó, chú Feliki jì tdè ndèy chǔw lǎní ddiy Yahuddi-ddúw nyú djú ddiydhò, à bbà Pawulo ngiy-dzà ò.