23
1 Pawulo njà nga chěy ì nì njuwdha ó nì kpa dè ro, à tdrà, “Ma-djú cha ì ùw Yesu nì, ma njèy màtsá njí Drà dhò lǎní ddeydha nà pbǔw ndu nì ddu ò!” 2 Í ddiy à tdrà tdè ro, Ananiya, Drǎ ngá dyǎdjá djú bba-dja jà cha ì dèy Pawulo kàtéy nì kpa thǎ à tsò ónga. 3 Pawulo kâ tdrà à dhò, “Drà rà nyi thà, nyi sárŕ ní tdo nà ka klà nì dza! Nyi dòw fungá ndaní nyi tděy ma-djú lò cha yǎdha tdrà níchú, nyi kě, ddùdhò nyi ní dǎ fú yǎdha djòluw jàdha nà ndrǔ thǎ ma!”4 Cha ì dèy tdè Pawulo kàtéy nì bbalè tdrà tdè, “Nyi ní ddey nyi dhúw Drǎ ngá dyǎdja djú bba-dja?”
5 Pawulo ngù lò, “Ma-djú cha ì ùw Yesu nì, ma tsì tdè nzá fú li nì drǒngó ní dyǎdja ddiy, ddiydhò à ndîy ndèy: ‘Nzǐ tdra ngǎjìní lò ndèy nì nyìdhí bbalè djùkpa ddǎ nì li ró.’”
6 Chú Pawulo, tsìdha nà njàddí bbalè tdè Saddukayo ní kpa, njàddí ndrǔ tdè Farisayo ní kpa ro, à îy nga njuwdha ó, “Ma-djú Yahuddi-ddúw, manì Farisayo-dduw, Farisayo ní li mí ddùw-nì. Ma dèy lò-ndòdha nyú djú ddiydhò manì ùwdha nà ì dhì nì ndrǔ ngú nì djiy ní dhi óddù ddiy mí lò dhò.” 7 À tdrà tdè í ddiy ro, lò-rr̀dha nyâ Farisayó ní kpa ndèymí Saddukayó ní kpa kàó, ndùw njuwdha ónga ndò ndèy. 8 (Saddukayo ní kpa tdrà tdè djiy ní ngúdha dhi óddù nì ngǎ, ndeymí ǐngí malayika ǐngí djiy ddí nì ngǎ, chú Farisayo ní kpa ùw fú ddiy wá.)
9 Fungá tdè drǒngó ní ngbùwdha, yǎdha mí li-gwíydha-djá cha ì tdè Farisayo ní rò ngbîy ì ru ndèymí ndrǔ lòw dey lò pà klôw nà. Ndrǔ tdrà, “Mà chùw ngǎjìní lò nzá í kpatss̀ ró. Njàddí nga nà thíy ǐngí malayika rà tdè ndey, ndèy tdrà lò fú li dè.”
10 Lò-rr̀dha ngû tdè rí drǒ, à lêy tdè la-dzàdha mí kpa djú bba-dja do lòw ddiydhò à ddêy tdè fú kpa dho Pawulo ónga tha dù-dú. Fúddiy dhò, à jà nděyngá la-dzàdha mí kpa dhò, ndrǔ tsǔw dzá, ndrǔ rǎ Pawulo pa bbalè thokpa óddù. Fúnga nà, ndrǔ mbà tdè Pawulo ví la-dzàdha djá dhí ngiy-dzà ò.
11 Fú kúw nà, Drǒngóli dèy Pawulo kàtéy, à tdrà, “Léy nyi jùw déy klǒw! Cha nyi tdrà ma huwdjò Yerusalemu ó níchú, fú ddiydhò à kà nyi tdrǎ Roma ó ddí.”
Ndrǔ ddêy ì hwî Pawulo
12 Něyngá bbǔw-bbúw nga nà, cha ì drò tdè Pawulo nì Yahuddi-ddúw njûw tdè ì ddìnga ó ro, ndrǔ dêy ddey ya ŋǎchú ì dho Pawulo hwì ddiy, ndrǔ tdèy lò ì kàó, ì rà nyû nyù ǐngí dda mb nzǐ nzá ì hwì Pawulo ní. 13 Ì da drì-drí nga tho nì djòluw nì kpa tdè fú lò-ddéydha ó. 14 Ndrǔ rà Drǎ ngá dyǎdjá mí ngúw djú bba-dja dè ndèymí drò-dró ní kpa dè ro, ndrǔ kâ tdrà, “Mà tdèy lò, mà rà nzǐ ddiy nyù nzá mà hwì Pawulo ní. 15 Nja-nja, nyì ndèymí njuwdha mí njàddí lò-tdèydha-djá nà, tdey la-dzàdha djá djú bba-dja mbǎ à nyì nyú djò ddiydhò nyì nì í lò ró chěy ní lò vǐy. Mà thì mà, mà hwî fú li děy nzá fú li shì ingá ní.”
16 Chú Pawulo ngá dhangba rr̀ tdè fú lò ro, à rà fú lò tdrà Pawulo dho la-dzàdha djá dhí ngiy-dzà ò.
17 Pawulo kâ ddì nì la-dzàdha mí kpa djú bba-dja iy, à tdrà, “Nyì mba í kpatss̀ ní ngba la-dzàdha mí bba-dja dè, à nì lò rò nà cha ndèy tdrǎ la-dzàdha mí bba-dja dhò nì.” 18 La-dzàdha mí li mbà mí kpatss̀ ní ngba la-dzàdha mí bba-dja dè.
La-dzàdha mí bba-dja tdrà, “Pawulo cha ndèy nì ngiy-dzà ò nì, îy ma ndèymí à tdrà ma mbǎ í kpatss̀ ní ngba nyi dè ddiydhò à nì lò rò nà cha ndèy tdrǎ nyi dhò nì.”
19 La-dzàdha mí kpa djú bba-dja mbà fú kpatss̀ ní ngba nga gidjò, à kâ à dhiy, “Ddu ní ndey cha nyi nì jǐ nyi tdrǎ ma dhò nì?”
20 Pawulo ngá dhangba kâ tdrà, “Yahuddi-ddúw ùw tdè ìdhíy nyi ndaní nyi mbǎ Pawulo lò-tdèydha mí njuwdha nyú djò bbǔtss̀ djú mbwa mí lò nà cha ì nì jǐ ndanà ì tsǐ à ró dìychú ní lò nì. 21 Nzǐ bbú à ndrǔ dè ddiydhò kpa drì-drí nga tho nì rù ì à dhò. Ndrǔ tsô ju, ì rà nzǐ ddiy nyù ǐngí ddiy mb nzá ì hwì à ní. Nja-nja ndrǔ thì ì, ndrǔ tdè ndanà àmí ddéydha pbǒ ìdhí dhíydha ró.”
22 La-dzàdha mí bba-dja bbà fú kpatss̀ ní ngba rǎ ndèymí à jà àdhò, “Nzǐ tdra ŋá li dhò nyi tdrà í ma dhò nì ddiy.”
Pawulo ka chô Kayisariya dè ddiy
23 La-dzàdha mí bba-dja kâ la-dzàdha djá djùkpa ddàdha mí kpa rwo nì rò iy ndèy dè ro, à kâ tdrà kpa dhò, “Ndu nì kúw mí sâ gbo nì ró, chuw la-dzàdha djá 200 ndèymí kànà djá nà drì-drí nga zarr̀gbòw, ì koko nà nì la-dzàdha djá 200 ì thokpa ó lěy nà nì ndrǔ rǎ Kayisariya mí bba ò. 24 Chuw kànà Pawulo dhò ndaní ka mbǎ à lǎní Li-djùkpa ddàdha dja Feliki dè.”
25 La-dzàdha mí bba-dja ndîy ndíydhaní-lò ǐchú:
26 Ma Klawudiyo Lusiya, Drǒngó li Li-djùkpa ddàdha dja Feliki dhò:
Zudha.
27 Í kpatss̀, Yahuddi-ddúw lòw tdè, ndrǔ tdè chow-chow à hwìdha nà, chú ma shì tdè mà tsá ngá la-dzàdha djá nà ndaní ma pá à, ddiydhò ma tsì tdè à nì Roma ó li. 28 Ma jì tdè ma tsǐ ddudhò ndrǔ tdè à bbǒw, fú ddiydhò ma mbà à ndrǔdhí lò-tdèydha mí njuwdha ò. 29 Ma chùw ndrǔdhí lò tdè yǎdha mí lò dhíydha, chú ma chùw lò rò nzá à hwìdha ǐngí à léydha ngiy-dzà ò nì mî. 30 Ka tdè ddey fú kpatss̀ ró nì lò shì tdè ma dè ro, ma chô à ngbír nyi dè. Ma ddí jà ì tdè à bbǒw nì ndrǔ rǎ ìdhí lò nà nyi dè.
31 Fúddiy dhò la-dzàdha mí kpa rr̀ tdè cha ka jà tdè nì lò ro, ndrǔ mbà tdè Pawulo Antipatri mí bba ò fú kúw nà. 32 Něyngá bbǔtss̀ ró, ndrǔ lêy kànà djá rà tdè à nà, ndrǔ ngǔ la-dzàdha djá dêy nì mí nga ò. 33 La-dzàdha djá, Kànà djá ndèymí ì koko nà nì ndrǔ shì tdè Kayisariya mí bba ò ro, ndrǔ bbû tdè ndíydhaní-lò ndèymí Pawulo nà Li-djùkpa ddàdha dja dè. 34 Li-djùkpa ddàdha dja zòw tdè ndíydhaní-lò ro, à dhǐy ŋá drǒngó ní ngòw óddù à shì. À chùw Pawulo shi Kilikiya mí bba óddù ro, 35 à tdrà tdè, “Ma rà nyi mí lò rr̀ ya ì bbòw nyi nì ndrǔ shì ingá ro.” À kâ jà ka pbǒ Pawulo rónga Herodde ngá kaley ò nì ngiy-dzà ò.