22
1 “Mà djá ndèymí mà-djú nà, nja-nja nyì rr manì tdrǎ nì lò.”
2 Ndrǔ rr̀ à nì lò těy Ebraniya ló nà ro, ndrǔ djú nga ddà chíy.
Pawulo kâ tdrà: 3 “Manì Yahuddi-ddùw, ma ka gòw Tarso Kilikiya mí bba ó, chú ka ngùw ma í drǒngó ní bba ó. Gamaliel kotéy, ka gwîy tdè ma màdhí pbúw ó yǎdha nà ndèymí Drà ꞌwíy njèy ma gbè nyì ró à nì ndu níchú. 4 Ma bbû nzadha ì Tuw ó bbalè ró pbǔw ndrǔ dhí dhi ò, kpa lówdha nà ndèymí dhi nà ndèymí ndrǔ ngbódha nà ngiy-dzà ò, 5 Drǎ ngá dyǎdjá djú bba-dja ndèymí njuwdha ddí tdrà ma ró lò. Ma chùw lò-ndíydha ndrǔ dèddò ndrǔ djú dhò Dameski ó nì ndèymí ma rà fúlè ndaní ma mbǎ mí bbalè fulè ngiy-dzà ò, Yerusalemu ò ndaní ka bbú nzadha.
6 “Sâ za nì ró, ma tdè chow-chow shìdha nà Dameski ò ro, gbrŕ ní kadha shì chǔ rakpa óddò ma rónga tdyi. 7 Ma chèy gudjò ndèymí ma rr̀ ddiy chuw nì tdrǎ ma dhò ‘Sawulo! Sawulo! Ddudhò nyi ná ma nza?’
8 “Ma dhîy, ‘Nyi ná áyì, Drǒngóli?’
“À ngù lò, ‘Ma nì Yesu Nazareti ó nì, cha nyi nì ndèy dho nzadha bbu nì.’ 9 Ma tdè bbiy ì nà nì ndrǔ njà kadha, chú ndrǔ tsì nzá ya ddu li-chuw tdè tdrǎ ma dhò ddiy.
10 “Ma kâ dhiy. ‘Drǒngóli, ma rà ná ddu njèy?’
“Drǒngóli kâ tdrà, ‘Ngbí nyi ru ra Damesiki mí bba ò. Fulè ka rà shì wánì ddiy cha ka nì jǐ nyi njěy nì tdrà nyidhò.’ 11 Mà tdè ì nà nì kpa ddà ma, ma thokpa nà ndrǔ mbà ma Dameski mí bba ò, ddiydhò kadha mí gbrŕ ní nga lêy ma nyú dêy nga njǎ nzǐ.
12 “Ananiya ní kpatss̀ rà ma njà. À tdè ndèy lêy ndèy jùw Musa ngá yǎdha dyòwdha ró nì li. Yahuddi mí bbalè cha ì tdè fungá nì dêy à dhò ndru bbu ddiydhò à jì tde lǎní. 13 À dèy tdè ma kàtéy, à kâ tdrà, ‘Sawulo, màtsá djûnì, nyi kà nyi njǎ nga ddíyàchú!’ Fúnga nà, ndùw ma lòw dey nga njà.
14 “À kâ tdrà, ‘Mà bbúw dhí Drà vû nyi ndaní nyi tsǐy ndèy jì nì ddiy ndèymí nyi njǎ Chǒw ní Li ndèymí nyi rř à kuw ó lò. 15 Nyi ra dey ndèy tsì fú lò ró lò nì li ní wánì bbalè dho cha ì njà ndèymí ì rr̀ fú lò nì. 16 Nja-nja nyi ní ddu pbǒ? Ngbí nyi ru! Low bàtízò, gbú nyìmí cherr Yesu ró dho íydha nà.’
17 “Ma ngû Yerusalemu mí bba ò ddiy dzzdjú, ma tdè Drà nzž Yahuddi dhí Drà-dzà ó ro, ddiy vîy ma nà. 18 Ma nja Drǒngóli nì lò tdrǎ. À tdrà madhò, ‘Zěy! Bba Yerusalemu mí bba, ddiydhò bbalè rà cha nyi nì tdrǎ ma djò nì lò ùw nzǐ.’
19 “Ma ngù lò, ‘Drǒngóli, í kpa tsì ma, ma dêy rǎ ddì nì Yahuddi-ddúw dhí njuwdha-dzà óddù njàddí ò ndaní ma lów cha ì ùw Drà nì bbalè. 20 Nyìmí thí ní li Stefano mí jǔw tdîy ndèy ro, ma ddí dèy tdè à kàtéy ka hwì à ddiydhò à tdrà tdè nyi ró dho nà lò bbalè dhò. Ma dèy tdè fungá dey ndrǔ nì njěy nì ddiy njǎ ndèymí ma dêy ddí ndrǔdhí rù rónga pbǒ.’
21 “Drǒngóli kâ tdrà, ‘Ra; bba Yerusalemu, manì rǎ nyi cho ndì, Yunani-ddúw dè.’”
Pawulo Roma mí dziylíy ó li
22 Bíy ní bbalè dêy lò rř Pawulo dè pbǔw à tdrà ndanà í ddiy. Ndrǔ kâ ì chuw ngbí ndèymí swádha nà, “Nyì hwi à gu í dziylíy djú ddò! Í kpatss̀ kà nzá ndèy déy djiy ní!”
23 Ndrǔ dêy swa sǔw ndèymí ìdhí rù bbládha nà ndèymí hôw tdíydha nà vi ò.
Pawulo ndèymí Roma ó la-dzàdha dju bba-dja nà
24 La-dzàdha djá djú bba-dja jà ka mbǎ Pawulo la-dzàdha djá déy nì mí nga ò. À tdrà ka rà fú li mí lò-ónga njà à dhěy dha nà ndaní fú li tsǐ ddudhò bbalè nì swa ndèy djú fǔchú ddiy. 25 Cha ndrǔ chèy tdè à ndaní ì dhěy à shí nà ro, Pawulo tdrà la-dzàdha djá mí bba-dja dhò, “Yǎdha ùw nà ŋà ka dhěy Roma mí ngòw ó li cha nzá ka chùw ndèy ró ngǎjìní lò ní?”
26 Fú bba-dja rr̀ fú lò ro, à rà ndèy nì la-djùkpa ddǎ nì li dè ndèymí à ngù mí lò. À tdrà, “Nyi ní rǎ ddu njěy?” “I kpatss̀ nì Roma mí dziylíy ó li.”
27 La-djùkpa ddàdha dja kǎ rà Pawulo dè ro, à kǎ Pawulo dhiy, “Tdra madhò, nyi ná Roma mí ngòw ó li?” À ngù lò, “Òní, manì.”
28 La-dzàdha mí kpa djùkpa ddàdha dja kâ tdrà, “Ma bbǔ mb ho drǒ ndaní ma ngú ndanà Roma mí dziylíy ó li ní.”
Pawulo ngù lò, “Chú ma ka gòw Roma ó li ní.”
29 Cha ì tdè chow-chow Pawulo dhíydha ró nì kpa kâ ì dda ndùw njuwdha óddù. La-dzàdha dja djú bba-dja ndèyníddò tdè do nà cha à tsì tdè Pawulo nì Roma ó li cha ndèy chèy tdè nyòrr̀ nà nì.
Pawulo ka mbà lò-ndòdha djá dè
30 Nêyngá bbǔtss̀ ró la-djùkpa ddàdha dja jì tdè ndèy tsǐ dìychú ní lò cha Yahuddi-ddúw bbòw ndanà Pawulo nì tey ndaní ndèy ddá ndanà Pawulo. À kâ Drǎ ngá dyǎdjá mí ngúw djú bba-djá ndèymí njuwdha mí njàddí lò-tdèydha mí drò-dró nì kpa tsò njuw ddìnga ó. À kâ ley ka mbǎ Pawulo ro, ndrǔ kâ à ley à děy ì djìy ó.