Pawulo mí bbiydha Yerusalemu mí bba ò
21
1 Mà ddâ mà ndrǔ róddò ddiy dzzdjú, mà rà tdè ju-ddà òluw chěy Kos mí juw djò. Něyngá bbǔtss̀ ró mà rà Rodo mí juw djò, ndèymí fungá ddò Patara mí drǒngó ní bba ò. 2 Mà chùw tdè drǒngó ní ngǒ nì dǎ Foyiniki mí bba ò, mà djèy òmà ndèymí mà rà tdè drǒngó ní ngǒ nà ju-ddà òluw. 3 Kupro mí juw bbàdha nà gǔw òluw nì mà thokpa djòluw ddiy dzzdjú, mà dà bbiysángó nì tuw nà Shami mí bba ò ngǒ nà ju-ddà òluw. Mà dèy Turo mí bba ó, cha màdhí ngǒ kà ndèy thú nò mí nga ó. 4 Mà chùw Yesu kodjú kpa fungá ro, mà dêy ndrǔ nà ddu zarr̀gbòw nì dhò. Bblǒ Thíy òluw ndrǔ tdrà nzǐ Pawulo rǎ Yerusalemu mí bba ò. 5 Chú màdhí ddu fungá déydha mí sî ndèy ro, mà bbà fú nga ndèymí mà rà tdè màdhí bbiydha nà. Yesu kodjú kpa wá ndèymí ìdhí dhì nà ndèymí nzòw nà ndrǔ mbà mà djòtey drǒngó ní bba óddù, mà shì dda tsò ró cha mà kwò mà tdyòw-tey Drà nzz̀dha dhò mí nga ò. 6 Tdràdha nà nyì mà lǎní ddì-ddì ní li dhò ddiy dzzdjú, mà djèy drǒngó ní ngǒ ndèymí ndrǔ ngû ìdhí bba ò. 7 Mà rà tdè màdhí bbiydha nà Turo óddò mà shì Tolemayi mí bba ó, cha mà zù tdè mà-djú cha ì ùw Yesu nì rónga ndèymí mà dêy tdè ndrǔ nà ddu ddì nì dhò. 8 Bbǔtss̀ ró, mà shì Kayisariya mí bba ò ndèymí mà dêy Filipo ngà dzá cha ndèy tdè, zarr̀gbòw nì kpa kàó ddì li cha ka vû ì déy nyû ndǒ nì. 9 À tdè dhání nà tho nzá ì kòw ì nì cha ì tdrà nì lò děy ndèy rà shì nì lò djò nì.
10 Mà tdè fulè bíy ní ddu dhò ddiy dzzdjú, ndèy ró dho tdè Agaba nì nabi shì tdè Yuddeya mí ngòw óddò. 11 À shì mà dè ro, à tdûw tdè Pawulo chey nì ndanà ndèy vèytéy nì shí, à chèy ndanà ndèy thotèy ndèymí ndèy koko nà ndèymí à tdrà, “Bblǒ Thíy tdrà, ‘Í tuw òluw Yerusalemu mí bba ó Yahuddi-ddúw rà li vèytey shúdha mí shí dja chèy ndèymí ka rà à bbú Yunani-ddúw dè.’”
12 Mà rr̀ tdè í ddiy ro, mà ndèymí fungá ì tdè nì bbalè nà kwô Pawulo tsò-ró nzǐ à rǎ ru Yerusalemu mí drǒngó ní bba ò. 13 Pawulo kâ lò ngù, “Ddudhò nyì ná dzž ndèymí ma thíy pěy? Ma thì ma ngǎ shúdha dhò kpala-kpala, chú dhi dhò, Drǒngóli Yesu ró dho dhò ddí Yerusalemu mí drǒngó ní bba ò.” 14 Mà ddêy tdè kpéy à jùw lídha ro, mà bbà à, mà kâ tdrà, “Drǒngóli mí jǐ njěy ndèy.” 15 Í ddiy dzzdjú, mà tdûw tdè màdhí nò mà rà Yerusalemu mí bba ò. 16 Njàddí Yesu kodjú kpa rò Kayisariya mí bba óddò nì rà mà nà ddìnga ó, ndrǔ mbà mà Munason ngà dzá. Munason tdè ddì li Sipra ó ndèy lòw dey Yesu dzzdjò dyòw à nga ndèy cha Yesu ngà tdè ndèymí njí tsò mí nga djúddù.
Pawulo mí shìdha Yerusalemu mí bba ò ddiy
17 Mà shì tdè Yerusalemu mí bba ò ro, cha ì ùw Yesu nì, mà-djú kwô tdè mà ì ró ꞌwíy nì nà. 18 Něyngá bbǔtss̀ ró, mà rà Pawulo mà nà Yakobbo njà, drò-dró ní kpa wá ddí tdè ney. 19 Pawulo zù ndrǔ rónga ndèymí à kâ tdrà ndrǔ dhò cha Drà njèy Yunani-ddúw kàó ndèy njèy nì njí òluw nì ddiy.
20 Ndrǔ rr̀ tdè í ddiy ro, ndrǔ bbû madha Drà dhò. Ndrǔ kâ tdrà Pawulo dhò: “Nja, màtsá djúní, Yahuddi dhí peytey thi nì ǔw ndey Drà mí lò, ndèymí ndrǔ wánì nì Musa ngá yǎdha ꞌwíy nà. 21 Yahuddi ddúw cha ì ùw Yesu nì cha ì nì Yerusalemu ó nì nì tdrǎ, nyi gwîy Yahuddi-ddúw wá cha ì nì Yunani-ddúw kàó nì, ndrǔ bbǎ Musa ngá yǎdha, ndrǔ tdrǎ kpa dhò nzǐ ndrǔ krř yâ ìdhí kpa ní nzòw ró ǐngí ndrǔ dyǒw màdhí bbalò. 22 Mà kà ná mà njěy ddu? Ndrǔ rà rr̀ nyi shì ŋà, 23 fú ddiydhò, njey cha mà tdrǎ nyi dhò nì ddiy. Bbalè tho nì ney mà nà cha ì wâ lò nì. 24 Tdúw í kpa, nyì ngǔ nyì thí ndrǔ nà ndèymí nyi ddá fú ndrǔ djú ddiy ndaní ndrǔ kpǎ ì djò-kpa ró ɦěy. Bbalè wánì rà tsì, cha ì rr̀ nyi ró nì lò nì ngǎ dìychú, chú nyi, nyi ní ddò nì bbiy chéy ní lò ó ndèymí nyi nì Musa ngá yǎdha rónga pbǒ. 25 Cha ì ùw nì Yunani-ddúw dhò níchú, mà ndîy fú ndrǔ dhò màdhí ddeydha, nzǐ fú ndrǔ nyǔ dziylíy djú gú dho ka bbû nì nyû, jǔw róddò, dyà ní ndèy dyà ndèy nì zǎ ndèymí bbǎlà njèydha róddò.”
26 Něyngá bbǔtss̀ ró, Pawulo tdûw fú kpa, ndrǔ ngù ì thí à mà nà. À kâ rà Drà-dzà ò ndaní ndèy bbú ddu cha li-ngùdha thí mí rà tdow mî, ndèymí ddiy bbúdha li-ngùdha thí mí rà ndèy njèy ǒmá nì ddu.
Ndrǔ lòw Pawulo Drà-dzà ó ddiy
27 Ddu zarr̀gbòw nì tdè chow-chow ndèy sídha nà ro, Yahuddi-ddúw rò cha ì tdè Aziya mí ngòw óddò nì njà tdè Pawulo Drà-dzà ó. Ndrǔ njûw bíy ní bbalè ndèymí ndrǔ lòw à, 28 swádha nà, “Israeli ó kpa nyì kwó mà tso-tso! Í nì kpatss̀ cha ndèy gwíy nì bbalè wánì nga òluw màdhí bbalè ró, màdhí yǎdha ndèymí í nga ró. Fú ddiy guw ó, à mbà Yunani-ddúw Drà-dzà mí nga ò ndèymí ndrǔ sà í thí ní nga.” 29 (Njitsò djú ndrǔ njà tdè Trofimo, Efeso mí bba óddò nì li Drà-dzà ó Pawulo nà ndèymí ndrǔ ddêy tdè Pawulo mbà à Drà-dzà mí nga ò.) 30 Nga ngbùwdha tdè fú wánì drǒngó ní bba ó, ndèymí bbalè-kpà kòw ngéy-ngéy ní tuw nà wánì nga là djú ddò. Ndrǔ lòw Pawulo, ndèymí ndrǔ drr̀ à Drà-dzà óddù, ndùw-ndùw kaley-tsò ì tdè ndèy. 31 Ndrǔ tdè ddey ì hwî à ro, lò-ɦéy shì tdè Roma mí la-dzàdha mí kpa djú bba-dja dè, Yerusalemu mí drǒngó ní bba tdè ndèy ngbùwdha nà. 32 Ddì ngà nà à tdûw la-dzàdha djá djú drò-dró ní kpa ndèymí njàddí la-dzàdha djá nà ndèymí ndrǔ kòw tdè bbiy bbalè dè. Ì nì nga ngbǔw nì kpa njà la-dzàdha dja djú bba-dja ndèymí ǎngá la-dzàdha djá nà, ndrǔ bbà tdè Pawulo dhèydha.
33 La-dzàdha djá djú drǒngóli shì tdè ndèymí à jà ka lòw Pawulo ndèymí ka chěy à rwo nì nyòrr̀ nà. À kâ dhiy áyì fú li nì ddiy ndèymí ddu à njèy ddiy. 34 Njàddí bbalè fú njuw kàó nì dêy ngéy ní lò swâ, njàddí bbalè ddí dêy njàddí lò swa ndèymí fú ddiy lêy la-dzàdha djá djùkpa ddàdha dja mèy lò-tey kpéy ddiydhò nga ngbùwdha mí lò dhò, à jà ndrǔ mbǎ Pawulo la-dzàdha djá déy nì mí nga ò. 35 Pawulo shì tdè ka djey nì ndanà dzá nì ddiy djú ro, la-dzàdha djá tdûw à tdúwdha ní bíy nì bbalè kà-óddù ddiydhò bbalè dhí nga ngbùwdha tdè drǒ. 36 Bíy ní bbalè dyòw à swádha nà, “Nyì hwi à, nyì hwi à!”
Pawulo tdrà ndèymí lò bbalè-kpà dho
37 Cha la-dzàdha djá tdè chow-chow Pawulo mbàdha nà la-dzàdha djá dhí kaley ò ro, à kâ ddiy dhiy la-dzàdha djú drǒngóli tsò-ró, “Nyi dhó ùw ney ma dhò ma tdrà nyi dhò lò rò?” “Nyi tdra nì ney Griki ló?” La-dzàdha djú drǒngóli kâ Pawulo dhiy. 38 “Nyi ní ngǎ Misiri ó kpatss̀ cha ndèy ngà la tsò nì ndèymí ndèy ddà tdè bbalè djùkpa peytey tho ꞌwìydha nì nga ò nì?”
39 Pawulo ngù lò, “Manì Yahuddi-ddùw Tarso óddò Kilikiya ónì, manì ngǎ drá ní bba ó li. Bba ma tdrǎ lò bbalè dhò.” 40 La-dzàdha djú drǒngóli kâ ùw Pawulo dhò à tdrǎ lò bbalè dhò, ddiydhò, Pawulo kâ ndèy ngbíy ru, à kâ dèy ru ndèy ngbîy ndèy nì nga tsò ró, à kâ lò tdrà bbalè dhò. Ndrǔ djúnga ddà tdè hiy ro, à kâ lò tdrà ndrǔ dhò Ebreniya ló nà.