Pawulo rà tdè Makedoniya ndèymí Yunani mí bba ò
20
1 Li ngbùwdha sî tdè ndèy ro, Pawulo îy Yesu kodjú kpa ndèymí à bbû ndrǔ thíy dhò klôw ddiy dzzdjú, à tdrà nyì ma lǎní ndèymí à rà Makedoniya mí bba ò. 2 À bbîy tdè fú nga òluw, bíy ní lò-tdràdha nà bbalè thíy dhò klôw bbúdha nà ndèymí luwtéy à shì Yunani mí ngòw ó, 3 fulè à dêy bǐy gbow nì dhò. Yahuddi-ddúw ddêy tdè ngǎjìní lò à ró cha à tdè jǐ ndèy rǎ dda ó tuw nà Shami mí bba ò fú ddiy dhò à ddêy ndèy ngú luwtò Makedoniya mí bba òluw. 4 Ì rà tdè Pawulo mà nà Aziya mí ngòw ò nì ndrǔ tdè; Sopater cha ndèy tdè Puro mí dduw ní Beroya mí bba óddò nì, Tesalonika óddò ní ndrǔ tdè Aristarko ndèymí Sekundo ndèymí Gayo Derbe óddò ní ndèymí Timotewu, Aziya óddò nì, Tukiko ndèymí Trofimo nà. 5 Fú kpa da mà njìó ndèymí ndrǔ rà mà pbò Troya mí bba ó. 6 Chú mà rà tdè dda ó tuw nà Filipi mí bba óddò ngǎ ndèy ó thiy nà nì madha mí nyû dzzdjú ndèymí ddu mbu nì dzzdjú mà njǔw mà njàddí ndrǔ nà Troya mí bba ó cha mà děy ǒmá ddu zarr̀gbòw nì dho.Pawulo tdrà Trowa mí bba ó bbalè mǎ lǎní ddiy
7 Sabato mí ddu ddì nì ó mà njûw mà ddìnga ó nì njuwdha dhò mùkátì ónga pbrr̀-dha dhò. Pawulo tèy lò bbalè dhò, ddiydhò à tdè rǎ ngu něyngá bbǔtss̀ ró, à ndrr̂ ndèy lò tèydha nà sǔw pbǔw kúw ó nga nà. 8 Tǎlà kpà tdè bíy cha mà njûw tdè mà ǒmá nì dza djú dza ó. 9 Dza nyú ó ddì nì kpatss̀ ní ngbà cha ndèy ró dho tdè Ewutuko nì dòw tdè, ddu tdè à lǒw cha Pawulo dêy ndèy ndrr lò tèydha nà sǔw ro. À tsùw tdè kpliy ní ddu ò, à chèy dziylíy djò dza djú ka ss̀ nì gbow ní mí gìy óddò ndèymí ka tdûw à ŋà à dhì ní. 10 Pawulo thû tdè bbiy, à kwò ndèy fú kpatss̀ ní ngbà kàtéy ndèymí à kâ ndèy thokpa ley à rò luw gbrǔ. À tdrà, “Nzǐ nyì ó nga tdǒw, à nì ney dji ní!” 11 À kâ rà ru ddíyàchú ndèymí à kwò mùkátì à kâ nyù njàddí bbalè nà. À tdrà lò pbǔw bbǔw bbúw ngá djò ddiy dzzdjú, à rà. 12 Bbalè mbà fú kpatss̀ ní ngbà bba ò djiy ní ndèymí ndrǔ jùw djòw.
Pawulo njûw ndèy Efeso mí bba ó drò-dró ní kpa nà
13 Mà rà tdè njitsó ngǒ dè ndèymí mà kǎ rà dda ó tuw nà Aso mí bba ò, mà tdè rǎ Pawulo tdúw mí ngà. À thì tdè ndèy ddiydhò à tdè rǎ fulè ndèy koko nà, 14 À njûw ndèy mà nà fulè Aso mí bba ò ro, mà rà ddìnga ó ndrǔ nà Mitulene mí bba ò. 15 Nêyngá bbǔtss̀ ró mà rà tdè ngǒ nà ju-ddà òluw, mà dà Kiyo mí juw rò luw. Fú ddu dzzdjú mà dà Samo mí juw djò ndèymí nêyngá bbǔtss̀ ró mà shì tdè Mileto mí bba ò. 16 Pawulo jì tdè ndèy rǎ ngǒ nà ju-ddà óluw dàdha ní Efeso ròluw nzánà ndèy sǎ sâ Aziya mí ngòw ó, ddiydhò à tdè jǐ ndèy bbíy zěyzěy ndaní ndèy shǐ Yerusalemu mí bba ò Pentekote mí ddu nà.
17 Chú mà shì tdè Mileto ó ro, Pawulo chô li rò à rǎ Efeso ó Drà-dzà ó drò-dró ní kpa iy ndaní ì njúw ì ndrǔ nà. 18 Ndrǔ shì à dè ro, à tdrà ndrǔ dhò, “Nyì, nyìníddò, nyì tsì ŋà ya ŋǎchú ma dêy nyì kàó ddiy wánì nga nà cha ma chîy tdè ma koko Aziya mí ngòw ó mí nga djú ddò. 19 Ma njèy njí Drǒngóli dhò ma thíy nà wá ndèymí mà nyú ó dzz̀-ddà nà, ndèymí mbdha nà cha ma dêy dǎ òmà luw Yahuddi-ddúw thokpa óddò nì. 20 Nyì tsì ma pbò nga nzá wánì ddiy gwíydha nà cha ndèy dho nyì tso-tso kwo nì chú ma gwîy tdè bbalè-kpà kàó ndèymí dzá-tsò djòluw. 21 Ma tdrà Yahuddi-ddúw dhò ndèymí Yunani-ddúw nà ndrǔ lí ì dhà rónga Drà dè ndèymí ndrǔ děy ùwdha nà màdhí Drǒngóli Yesu Kristo ó.
22 “Nja-nja, ma djùkpa ddǎ Bblǒ Thíy nì ddiy nà, manì rǎ Yerusalemu ò chú ma tsí nzá ddu rà ndèy njèy mà ró fulè ddiy. 23 Bblǒ Thíy dhò ma dhò nì ddiy nì, wánì drǒngó ní bba òluw ma ró ndèy rà ndèy njèy nì ddiy nì ngiy-dzà ò ma shúdha ndèymí kpá-kpá-nga òluw dàdha. 24 Chú, ma njà màtsá djiy nì ngǎ lǎní madhò ndaní ma sí màtsá déydha ndèymí cha Drǒngóli Yesu bbû madhò nì njí nà. Drà mí ndru mí Hwî mí lò-ɦéy tdràdha bbalè dhò.
25 “Nja-nja nyì nja, ma tsì nyì wá, ma bbîy nyì kàó luw Drà mí pey mí nga mí ló tdràdha nà, nyì rà ma njà ddíyàchú nzǐ. 26 Fǔchú ro, manì tdrǎ nyi dho ndu, bbalè wá dhí jǔw mí lò nì ngǎ ma-djú. 27 Ddiydhò do njèy ma nzá tdràdha nà nyì dhò Drà nì ddey nì wánì ddiy. 28 Nyì déy nyì nyú na nyìníddò ndèymí Bblǒ Thíy lêy nyì ndèy rónga ní ddiy nà.a Nyì bbú nyû ì ùw Drà nì kpa dhò cha à dzz̀ ndèy ró jǔw nà nì. 29 Ma tsì ŋà, ma rà ma ngbí ddiy dzzdjú, ngǎjìní ì jì nà nì bbalè rà tsùw nyì kàò, ndrǔ rà bbalè rò bbà nzǐ nzá ì sà ní. 30 Nyì kà-óddù njàddí bbalè rà shì, ndèymí ndrǔ rà lǎní lò sà ndaní ì líy Yesu kodjú kpa ndrǔ dyǒw ì. 31 Fúddiy dhò, nyì pbo nyì ró! Nyì tsi í ddiy, cho gbow nì dhò, ma bbà nzá lò-tdràdha nyì dho kúw ndèymí itsś nà ma nyú ó dzz̀-ddà nà.
32 “Nja-nja ma bbû nyì Drà dhò ndèymí àmí lò-ɦéy mí ndru dè cha ndèy kà ndèy bbú nyìdhò klôw nì, cha ndèy dho nyìdhò bba nyùdha bbu cha ì ka ngù thí nì bbalè kàó. 33 Li rò nì ngǎ cha ma njà nì ndèymí sárŕ nì órr̀ ǐngí ngbú ní órr̀ ǐngí rù lǎní ma nyú djú. 34 Nyì, nyìníddò tsì í ma thokpa njèy njí madhò cha ndèy bbû madhò cha ma jì nì ddiy ndèymí ma dyási jì nì ddiy nà. 35 Ddiy wá ma njèy tdè nì ó, ma dhò tdè nyì dho í klǒw ní dhǐy nà à jì mà kwó ngǎ ìdhí klôw nà nì bbalè tso-tso, mà ddéy ndanà cha Drǒngóli Yesu tdrà nì lò, ‘Hwî nì drǒngó tǐ bbúdha ó à da kwódha ó.’”