Pawulo nì Efeso mí bba ó
19
1 Cha Apolo tdè Korinto mí bba ó ro, Pawulo dà bba kàòluw nì tuw nà à shì Efeso mí bba ò. Fúlè à chùw tdè Yesu kodjú kpa rò, 2 à dhîy tdè ndrǔ, “Nyì kwó tdè Bblǒ Thíy ŋà cha nyì ùw tdè Yesu ro?”Ndrǔ ngù tdè lò-dzzdjò, “Nzá, rr̀-dha ní kpe mà rr̀ nzá ya ney Bblǒ Thíy tde nì ddiy.”
3 Fú ddiydhò, Pawulo dhîy tdè, “Nyì lǒw tdè ŋǎchú nì bàtízò?”
Ndrǔ ngù tdè lò-dzzdjò, “Yohana ngá bàtízò.”
4 Pawulo tdrà tdè, “Yohana ngá bàtízò tdè li dhà rónga lídha mí bàtízò. À tdrà tdè bbalè dhò, ndrǔ ùw cha ndèy shì ndèy dzzdjú nì li, fú li nì Yesu.” 5 Í ddiy rr̀-dha ó, ndrǔ lòw tdè bàtízò Drǒngóli Yesu ró dho nà. 6 Pawulo lêy tdè ndèy thokpa ndrǔ djú ro, Bblǒ Thíy kâ shì tdè ndrǔ djò, ndrǔ kâ lòw tdè Drà mí lò tdrà ngéy-ngéy ní lò-tsò nà ndèymí ndrǔ tdrà lò cha ndèy rà shì nì lò djò. 7 Fungá, kpa tdè wá chow-chow ddri ndèy djú rwo nì nà.
8 Pawulo dêy tsǔw Yahuddi-ddúw dhí njuwdha-dzà ò ndèymí à tdrà tdè lò fungá bǐy gbow nì dhò ngǎ do ní, lò-pàdha nà ndèymí ndrǔ chéydha nà Drà mí pey mí nga dhò. 9 Chú, njàddí ndrǔ jùw ngûw tdè ndǐy, ndrǔ jì tdè nzá ì rř Pawulo nì tdrǎ nì lò. Ndrǔ sà Drǒngóli mí tuw ónga bbalè kpa nyú djú. Pawulo kâ ndrǔ bbà. À tdûw Yesu kodjú kpa ndèy kodjú, à dêy lò ndíydha ónga tuw wánì ddu ró Turano mí li-gwíydha dzà ó. 10 Fú ddiy njèy ndèy cho rwo nì dhò, ndaní Aziya mí ngòw ó Yahuddi-ddúw ndèymí Yunani-ddúw nà wá rř Drǒngóli mí lò.
11 Drà njèy drǒngó ní ddùw kpà Pawulo dè nì nga là djòluw, 12 ndaní à thokpa ó rù tsò ndèymí à ró rù nà cha ndèy mb à rónga nì, ndrǔ mbà dhi djá dè ndèymí fú ndrǔ ró dhi ndèymí che thíy nà bbà ndrǔ.
13 Njàddí Yahuddi-ddúw cha ì dêy bbiy che thíy ddádha nà nì, ndrǔ lòw dey Drǒngóli Yesu ró dho iy che thíy nà nì ndrǔ dhò. Ndrǔ dêy tdrǎ, “Yesu ró dho nà cha Pawulo nì ndèy ɦuwdjò tdrǎ nì, mà nì jǎ nyì dho nyì shi rúgò.” 14 Sekawa, drà ngá dyǎdjá mí ngûw djú bba-dja mí ddúwní zargbòw nì dêy í ddiy njěy. 15 Ddu ddìní, che thíy ngù lò-dzzdjò ndrǔ dhò, “Yesu ma tsì ŋà ndèymí Pawulo ddí ma tsì ŋà, chú nyì ná áyì?” 16 Che thíy nà nì kpatss̀ kâ ndèy ì ndrǔ djò ndèymí à kâ shì kpa djòluw. À dhèy ndrǔ, fú ddiy lêy ndrǔ kòw rúgò ndǔwluw ní ndèymí ì ró jǔw nà.
17 Í ddiy tsì tdè ndèy Yahuddi ddúw ndèymí Yunani-ddúw dè cha ì tdè dey Efeso mí bba ó nì ro, do lòw ndrǔ wá, fú ddiy lêy ndrǔ mâ Drǒngóli Yesu ró dho tǐ. 18 Bíy ní bbalè cha ì ùw nì shì ndèymí ndrǔ kwô ìdhí ngǎjìní njeydha tende. 19 Bíy ní bbalè cha ì dêy dyǎ ndrǔ nì mbà ìdhí bǔkù ddìnga ó ndèymí ndrǔ bêy bbalè-kpà kàó. Ndrǔ zòw ìdhí ddiy ró dzẑ ro, ndrǔ chùw à tdè peytey drì-drí nga mbu. 20 Í tuw òluw Drǒngóli mí lò nyâ kpá-kpá-nga nà wánì nga òluw.
21 Í ddiy wánì njèy ndèy ddiy dzzdjú, Pawulo jì tdè ndèy thíy nà ndèy rǎ Yerusalemu mí bba ò, dàdha nà Makedoniya ndèymí Akaya mí bba òluw. À kâ tdrà, “Cha ma tdè fulè ddiy dzzdjú, ma jì tdè ma shǐ Roma ò ddí.” 22 Cha à tdè Aziya mí ngòw ó drá nì ddu dhò ro, à chô ndèy tso-tso kwódha mí kpa rwo, Timotewu ndèymí Erasto nà Makedoniya mí bba ò.
Li ngbùwdha ngà ndèy Efeso mí bba ó ddiy
23 Fú nga na, drǒngó ní nzádha nga ndèy ì tdè Drǒngóli mí tuw ó nì bbalè ró. 24 Sárŕ ní órr̀ thìdha dja ndèy ró dho nà Demetriyo nì, cha ndèy dêy Artemi mí drà mí órr̀ nà nì gú thǐ nì, à mbà drǒngó ní mb cha ì tsí li-thokpa mí njí nì kpa dhò. 25 À îy cha ì tdè fú njí jǐ nì kpa ddìnga ó, à kâ tdrà, “Í kpa nyì tsì mà chuw nì lǎní mb í njí óddù. 26 Nyì nja, nyì rr̀ ddí, Pawulo lî bbalè thíy ndèymí à ddà bíy ní bbalè ngǎjìní nga ò ingá Efeso mí bba ó ndèymí Aziya mí ngòw nà. À tdrà bbalè tdyà nì gú nì ngǎ dìychú ní gú. 27 Ngǎjìní ddiy nì, màdhí njí rà ngǎ ndèy ró dho sà ndèy kpala-kpala, chú rù-dzà ó ɦìytss ní drǒngó ní gú ddí cha ka íy nì Artemi nì mí klôw rà ngu ngǎ, mí ɦìytss ní gú ndèy rónga nà cha ndèy ka nzz nì Aziya mí ngòw òluw ndèymí dziylíy nà wá ka rà à nzz̀.”
28 Ndrǔ rr̀ í ddiy ro, thǒw lòw ndrǔ, ndrǔ lòw děy swa, “Efeso mí Artemi nì drǒngó!” 29 Ndùw-ndùw drǒngó ní bba kì ndèy ngbùwdha nà. Ndrǔ kòw kéy-kéy li tsò njúwdha mí nga ò, ndrǔ lòw Gayo ndèymí Aristarko nà cha ì tdè bbiy Pawulo mànà Makedoniya mí bba òluw nì. 30 Pawulo jì tdè ndèy shǐ bbalè kpa nyú djò, chú cha Yesu kodjú kpa ùw nzá. 31 Njàddí drò-dró ní kpa fú bba ó nì ddí cha ì tdè Pawulo mí dyasi ní nì chwô dyòw nzǐ Pawulo shǐ li tsò njúwdha mí nga ò.
32 Bbalè mí njuwdha sà ndèy, njàddí ndrǔ dêy njàddí ddiy tdrǎ njàddí ndrǔ dêy ngéy ní ddiy tdrǎ. Bíy ní bbalè ddí tsì tdè nzá ya ddudhò ìnì fungá ddiy. 33 Yahuddi-ddúw djìy Iskader njitsò djò ndèymí njàddí ndrǔ bbû lò à ò. À tdrà bbalè dhò ndrǔ déy chíy ndèy thokpa nà ndaní ndèy tdrǎ lò-tey bbalè dhò. 34 Chú cha ndrǔ tsì tdè à tdè Yahuddi-ddùw ro, ndrǔ wánì swâ ì chuw ddì nì nà sawa rwo nì dhò, “Efeso mí Artemi nì drǒngó!”
35 Drǒngó ní bba ó lò ndíydha dja dòw kpa ro, à kâ tdrà ndrǔ dhò, “Efeso ó bbalè, dziylíy wánì tsì ná nzá Efeso mí drǒngó ní bba pbo nì Artemi ní tdyàdha ní gú rónga cha ndèy chèy gudjò rakpa óddù nì? 36 Fúddiy dhò, yakpe í ddiy dho ndèy ddòw nzǐ, à jì nyì déy bbò nzǐ nyì njěy lò gbè nzá ì tsì lò nì ndrǔ níchú. 37 Nyì mbà í bbalè ingá, ndrǔ nì ngǎ cha ì dhùw nga Drà-dzà ó nì, ǐngí ì sà màdhí tdyàdha ní gú ró dho nì kpa. 38 Ya Dametriyo ndèymí ndèy dyási nà cha ì nì ndèy dè nì, nì lò rò nà í li ró, dwǎnì mí nga nì pùdha ní, dwǎnì tèydha djá ddí nì ney, bba fú ndrǔ bbǒw ì. 39 Ya ddiy ro nì ney cha nyì nì jǐ nyì mbǎ í li ró nì, à jì ka njǎ ǒnga cha yǎdha ùw nì njuwdha ó. 40 Cha à nì níchú, mànì ngǎjìní nga ó mà bbòwdha na nga ngbùwdha mí lò dhò, ddiydhò ndu ndèy njèy ndèy nì ddiy dhò. Fúddiy dhò, mà rà tdè ngǎ lò rò ní cha mà kà mà tdrǎ í lò ró nì, mí lò-tey nì ngǎ níchú.” 41 Í ddiy à tdrà tdè ddiy dzzdjú, à kâ njuwdha dha.