Pawulo nì Korinto mí bba ó
18
1 Í ddiy dzzdjú, Pawulo bbà Ateni mí bba ndèymí à rà Korinto mí bba ò. 2 Fúlè à njûw ndèy Yahuddi-ddùw nà ndèy ró dho tdè Akula nì. À tdè Ponto ó li cha ndèy shì tdè drá ní nga dzzdjú Italiya mí bba óddò nděyngá dza-yà Priskila nà, ddiydhò pey Klawudiyo jà tdè, Yahuddi-ddúw wá bbǎ Roma mí bba. Pawulo rà ndrǔ njà. 3 Pawulo děy ndèymí à njěy njí ndrǔ nà ddiydhò à tdè rù-dzà thìdha dja ndrǔ níchú. 4 Wánì Sabato ddù ró, à dêy Yahuddi-ddúw dhí njuwdha-dzà ó, í lò-ónga ddey, Yahuddi-ddúw ndèymí Yunani-ddúw chéydha nà.5 Sila ndèymí Timotewu nà shì tdè Makedoniya mí bba óddò ro, Pawulo bbû ndèy, ndèyníddò Kristo mí lò-gwíydha dhò ndèymí Yesu tdè Kristo ddiy mí lò kwódha nà Yahuddi-ddúw dhò. 6 Chú Yahuddi-ddúw gù tdè Pawulo nì tdrǎ nì lò ndèymí ndrǔ lòw dey dhúwdha dhùw ro, à njû ndèy thokpa ónga ndèy nì ndanà fú lò gǔ ndèymí à kâ tdrà ndrǔ dhò, “Nyìdhí jǔw déy nyì djú nyìníddò! Manì ngǎ lò rò nà nyì nà. À nga ndèy nja-nja nga djúddò ma rà rà Yunani-ddúw dè.”
7 Pawulo kâ Yahuddi-ddúw dhí njuwdha-dzà bbà ndèymí à rà tdè ddì nì kpatss̀-ngà dza ò ndèy ró dho tdè Tito Yusto nì, à tdè Drà nzz̀dha dja, ǎngá dza tdè chow njuwdha-dzà dè. 8 Krispo cha ndèy tdè Yahuddi-ddúw dhí njuwdha-dzà djùkpa ddàdha dja nì ndèymí nděyngà dzá bbalè nà wá ùw Drǒngóli; ndèymí bíy ní bbalè Korinto mí bba ó nì, cha ì rr̀ à nì tdrǎ nì lò nì ùw Drà mí lò ndèymí ndrǔ lòw bàtízò.
9 Ddì nì kúw ó, Drǒngóli tèy lò Pawulo dhò nyu tùw òluw, “Nzǐ do njěy nyi, ndrŕ nyi lò-tdràdha nà, nzǐ déy chíy. 10 Ddiydhò manì nyi nà, li rò nì ngǎ cha ndèy rà nyi-tsò tdèy, nyi rónga nyu nì ddiydhò manì bíy ní bbalè nà í drǒngó ní bba ó cha ì rà ma ùw nì.” 11 Fúddiy dhò Pawulo dêy fúlè cho ddì ndèymí bǐy nà za nì dhò, ndrǔ gwíydha nà Drà mí lò nà.
12 Galiyo tdè li djùkpa ddàdha dja Akaya mí ngòw ó nì ro, Yahuddi-ddúw ngbî ì Pawulo ró ndèymí ndrǔ mbà à lò-ndòdha mí thìynga tsò rò. 13 Ndrǔ kâ tdrà, “Í kpatss̀ nì bbalè chey ndaní ndrǔ nzž Drà nzá yǎdha ùw nì tuw nà.”
14 Pawulo jì tdè ndèy tdrǎ ndèy djú lò ro, Galiyo tdrà Yahuddi-ddúw dhò, “Ya nyì Yahuddi-ddúw à tdě ngǎjìní lò ǐngí dhúwdha màdhí Roma mí yǎdha ro, ma kà tdè ŋà ma rř cha nyì nì jǐ nyì tdrǎ nì lò. 15 Chú, kpe à nì lò ró lò-dhíydha dho ndèymí nyìdhí yǎdha nà, nyì thi mí lò nú nyì. Ma rà dey nzǐ fǔchú nì lò-ndòdha dja ní.” 16 Fúddiy dhò, à dìy ndrǔ lò-tdèydha mí thìynga tsò róddù. 17 Ndrǔ kâ ì li Sostene ró, Yahuddi-ddúw dhí njuwdha-dzà mí bba-dja ndèymí ndrǔ dhèy à lò-ndòdha mí thìynga nyú djú. Chú Galiyo ddêy fú ddiy djú nzá.
Pawulo ngû Antiyokiya mí bba ò
18 Pawulo dêy Korinto mí bba ó drá ní ddu dhò. À kâ cha ì ùw Yesu nì kpa bbà, à rà dda ó tuw nà Shami mí ngòw ò, Priskila ndèymí Akula mà nà. Děy nzá à rà tdè ro, à lêy tdè ndèy djùkpa ró ɦěy ka krř Kenkreya mí bba ó ddiydhò à wâ tdè mí lò wádha ní. 19 Ndrǔ shì tdè Efeso mí bba ò cha Pawulo bbà Priskila ndèymí Akula nà mí nga. À ndèyníddò rà tdè Yahuddi-ddúw dhí njuwdha-dzà ò ndanì ì túw lò-ónga Yahuddi-ddùw nà. 20 Ndrǔ dhîy à ì déy à mànà lèy ní ddu dhò ro, à ùw nzá. 21 Chú, cha à bbà ndrǔ, à tdèy ndrǔ dhò, “Ma rà ngu nyì dè ya Drà ùw ro.” À kâ rà Efeso óddò dda tùw nà. 22 À shì tdè Kayisariya ò mí nga nà, à rà ru cha ì ùw Yesu nì kpa rónga zù ndèymí à kâ rà bbiy Antiyokiya mí bba ò.
23 Pawulo dêy Antiyokiya mí bba ó drá ní ddu dhò ddiy dzzdjú, à rà fungá ddù wánì bba òluw Galatiya mí ngòw ò ndèymí Furujiya nà klôw bbúdha nà Yesu kodjú kpa dhò.
24 Fúnga nà, Yahuddi-ddùw ndèy ró dho nà Apolo, ka gòw à Iskader mí bba ó, à shì tdè Efeso ò. À tdè ndèy gwîy ndèy nì li, Drǎ ngá ndíydha ní lò mí nyǔꞌwiy nà. 25 Ka gwîy tdè à Drǒngóli mí tuw nà, ndèymí à tdrà lò ndèy ró ꞌwíy nì nà, à gwîy Yesu mí lò thíy nà, yakpe à tsì tdè Yohana ngá bàtízò chú ddì. 26 À lòw dey tdrǎ Yahuddi-ddúw dhí njuwdha-dzà ó ngǎ do ní. Priskila ndèymí Akula nà rr̀ à ro, ndrǔ îy à rǎ ìdhí bba ò ndaní ì dhǒ à dhò Drà mí tuw lǎní drǒ.
27 Apolo jì tdè ndèy rǎ Akaya mí ngòw ò ro, cha ì ùw Yesu nì kpa bbû à dhò kpá-kpá ní thíy ndèymí ndrǔ ndîy lò Yesu kodjú kpa dhò fulè ndanì ndrǔ kwó à. À shì tdè ro, à kwô cha ì ùw ndru nà nì ndrǔ tso-tso. 28 Ddiydhò à gù Yahuddi-ddúw bbalè nyú djú nì lò-pàdha ó, à dêy dhǒ Drǎ ngá ndíydha ní lò nà Yesu nì Kristo.