Pawulo mà ndèy dyási nà chùw nzàdha Tesalonika mí bba ó
17
1 Pawulo ndèymí Sila nà kâ dà Amfipoli mí drǒngó ní bba òluw ndèymí Apoloniya mí drǒngó ní bba nà ro, ndrǔ shì Tesalonika mí drǒngó ní bba ò, cha Yahuddi-ddúw dhí njuwdha-dzà tdè ǒmá nì. 2 Cha ndrǔdhí bbalò tdè níchú, Pawulo rà tdè Yahuddi-ddúw dhí njuwdha-dzà ò ndèymí gbow nì Sabato dhò, à dêy Drǎ ngá ndíydha ní lò ónga njǎ ndrǔ nà, 3 à tûw ǒnga ndèymí à dêy Masiya kà ndèy nzá ndèy ndèymí à ngú djiy ní dhi óddù ddiy dhǒ. À tdrà, “Í Yesu manì ndèy ɦuwdjò tdrǎ nyì dhò nì, à nì Kristo.a” 4 Njaddí Yahuddi-ddúw ka chêy tdè, ndèymí ndrǔ rà Pawulo ndèymí Sila mà kodjú, gbè bíy ní Yunani-ddúw ndèymí njàddí drò-dró ní dhì cha ì ɦuwdjò drr̀ nì dêy Drà nzž níchú.5 Chú Yahuddi-ddúw tdè dyǎ nà, fú ddiydhò ndrǔ njûw ngǎjìní ì jì nà nì bbalè, ddiy ónga dzźdha mí nga óddò, ndrǔ njûw bbalè-kpà ndèymí, ndrǔ lòw dey nga ngbùw drǒngó ní bba ó. Fúddiy dhò, ndrǔ rà ngbír Yason bbâ Pawulo ndèymí Sila nà mèy ndaní ì mbǎ ndrǔ rúgò bíy ní bbalè-kpà dè. 6 Chú nzá ndrǔ chùw tdè kpa ro, ndrǔ drr̀ tdè Yason ndèymí njàddí cha ì ùw Yesu nì kpa nà fú drǒngó ní bba ó nì drò-dró ní bba djùkpa ddàdha djá dè, swádha nà, “Í kpa cha ì nyâ nì lò í dziylíy òluw wánì shì nja-nja i ngá, 7 ndèymí Yason kwô ndrǔ nděyngà dzá. Ndrǔ wánì kwò Kayisarib mí yǎdha, ndrǔ nì tdrǎ ngéy ní pey nì ney ndèy ró dho nà Yesu nì.” 8 Ndrǔ rr̀ í ddiy ro, bíy ní bbalè mí drǒngó ní bba ó nì ndèymí drò-dró ní li djùkpa ddàdha mí kpa nà thíy ónga sà ndèy. 9 Ndrǔ kâ Yason ndèymí njàddí kpa nà klô cha ndrǔ bbà tdè mb ì rr̀dja ó fú drò-dró ní kpa dè ro, ndrǔ kâ bbà kpa rǎ.
Pawulo ndèymí Sila nà Beroya mí bba ó
10 Fú kúw nà, cha ì ùw Yesu nì kpa chô Pawulo ndèymí Sila nà Beroya mí bba ò. Ndrǔ shì fungá ro, ndrǔ rà Yahuddi-ddúw dhí njuwdha-dzà ò. 11 Beroya mí bba ó bbalè dhí njeydha tdè lǎní drǒ à da Tesalonika mí drǒngó ní bba ó bbalè djòluw, ndrǔ ùw Drà mí lò ì ró ꞌwíy nì nà. Ddu wánì ró, ndrǔ dêy Drǎ ngá ndíydha ní lò ónga njǎ, ya Pawulo tdè tdrǎ nì lò tdè dìychú ddiy. 12 Bíy ní Yahuddi-ddúw ùw, gbè Yunani-ddúw ì ɦuwdjò drr̀ nì dhì ndèymí kpa nà níchú.
13 Tesalonika mí drǒngó ní bba ó Yahuddi-ddúw tsì tdè Pawulo nì Drà mí lò tdrǎ Beroya mí bba ó ro, ndrǔ rà fulè ddí ndaní ì nyá lò Pawulo mà ró, bbalè kàó ndèymí ì bbú nzádha Pawulo mà dhò. 14 Ndùw-ndùw cha ì ùw Yesu nì kpa kâ Pawulo mà cho ju-ddà tsò rò, chú Sila ndèymí Timotewu nà dêy tdè Beroya mí bba ó. 15 Ì mbà Pawulo djòtey nì kpa mbà tdè à Ateni mí bba ò ro, ndrǔ kâ ngu lò-tdèydha nà Sila mà dho Timotewu nà ndaní ì njuw ì ndrǔ nà zěy-zěy.
Pawulo nì Ateni mí bba ó
16 Cha Pawulo tdè ndrǔ pbǒ Ateni mí bba ó ro, zòw lòw àmí djiy ddiydhò Ateni mí drǒngó ní bba kì tdè tdyàdha ní gú mí ɦiy nà. 17 Fúddiy dhò, à dêy lò-ónga ddey Yahuddi-ddúw dhí njuwdha-dzà ó Yahuddi-ddúw nà ndèymí Drà ì děy nzž nì Yonani mí kpa nà, ddiy ónga dzźdha mí nga ó, ddu ró ndèymí cha ì tdè fungá ní bbalè nà. 18 Nyǔꞌwiy djá cha ì tdè Epikuriyo mí bba ó ndèymí Estokiyo mí bba ó kpa nà dêy lò pǎ ì kàó Pawulo mànà. Ndrǔ rò dhîy, “Kemo-ddùw ná jǐ ndèy tdrǎ ddu?” Njàddí ndrǔ tdrà, “Pawulo nì dziylíy djú gú ró dho tdrǎ,” ndrǔ tdrà í ddiy ddiydhò Pawulo tdè Yesu mí Hwî mí lò-ɦéy tdrǎ ndèymí àmí ngúdha djiy ní dhi óddù nì. 19 Ndrǔ kâ à tduw ka à mbà ì ɦuwdjò drr̀ nì Areyopago mí njuwdha ò, cha ndrǔ tdrà tdè à dhò, “Mà dho ná ney í tdey nì ní lò tsi cha nyi nì tdrǎ nì? 20 Nyi nì nzá mà tsì nì lò mbǎ mà gi ò ndèymí mànì jǐ mà tsǐy ddu à nì ddiy.” 21 (Ateni ó bbalè wá ndèymí mà kàó lu ní kpa nà cha ì nì dey vúní nì, chú ndrǔ nì lò těy fú lò-djò ndèymí ndrǔ nì lò tdey rř.)
22 Pawulo kâ ndèy ngbi ru Areyopago mí njuwdha ó, à tdrà, “Ateni ó kpa! Ma njà wánì tuw òluw nyì jì Drà nyú mèydha drǒ. 23 Ddiydhò cha ma tdè bbiy nyìdhí drǒngó ní bba òluw ro, ma njà cha nyì nì nzž nì ddiy mí ɦiy-kpà, ma chùw ru ka ss̀ nì nga ró ka ndîy í lò, Nzá ka tsì nì Drà dho. Nja-nja nyì nì nzž nzá nyì tsì nì ddiy ní nì ddiy, manì rǎ tdrà nyì dhò.
24 “Drà cha ndèy tdyà dziylíy ndèy ó ddiy nà wánì, à nì rakpa ó Drǒngóli ndèymí dziylíy nà, ndèymí à déy nì nzǐ li thokpa nà ka ss̀ nì Drà-dzà ó. 25 Bbalè thokpa nà kpe ka njeynì à dho nzǐ, gbè ddiy mí zòw nì ndey à njěy níchú, ddiydhò à ndèyníddò, à bbû wánì bbalè dhò djiy ndèymí li hì nà ndèymí wánì ddiy nà. 26 Ddì li róddò, à tdyà wánì pbúw ndaní ndrǔ déy wánì dziylíy ó, à tdèy tdè ndrǔ dhí cho léydha ní ndèymí ndrǔdhí déydha ró cha ndrǔ kà ì déy mínga nà. 27 Drà njèy í ddiy ndaní bbalè měy ndèy ndèymí ndaní ndrǔ shǐ rúgò ndèy dhò, ndrǔ chǔw ndèy yakpe ndèy nì ngǎ ndì mà wánì róddù. 28 ‘Ddiydhò mànì djiy ní ndèymí mànì bbiy mànì dey à ró.’ Gbè njàddí nyǔꞌwiy djá tdrà, ‘Mà nì ǎngá ddèy.’
29 “Fǔchú ro, gbè mànì Drǎ ngá ddèy, à kà nzá mà tdrǎ Drà nì gbè tdyàdha ní ngbú ní órr̀ ǐngí sárŕ ní órr̀ ǐngí djuw nà bbalè tdyà nyǔꞌwiy nà nì ɦiy níchú. 30 Ndruní Drà nyú dà ŋà fú vǐy ní déydha djòluw. Chú, nja-nja à jà bbalè wánì dhò ndrǔ lí ì dhà rónga ìdhí ngǎjìní njeydha óddò. 31 Ddiydhò à lêy ddu cha ndèy rà ndanà dziylíy djú lò ndò chǒw ní lò ó cha à lêy nì li nà. À lěy í lò tsǐ ndèy bbalè wánì dhò à ngù à djiy ní dhi óddù ddiy nà.”
32 Ndrǔ rr̀ Pawulo nì tdrǎ njàddí ndrǔ rò ngû tdè djiy ní dhi óddù ddiy mí lò ro, njàddí ndrǔ njà tdè mí lò vúní ddiy ní, chú njàddí ndrǔ tdrà, Mà jì mà rř fú lò ddíyàchú. 33 Fú ddiy ó, Pawulo bbà njuwdha. 34 Drá ní njàddí kpa rò ngû Pawulo djòtey dyòwdha djá ní ndèymí ndrǔ ùw ddí. Ndrǔ kàó tdè Dinasiyo, Areyopago mí njuwdha ó li, ɦìytss ní li ró dho tdè Damari, ndèymí ngéy ní ndrǔ nà.