Timotewu mà rà ddìnga ó Pawulo ndèymí Sila nà
16
1 Pawulo ndèymí Sila nà rà tdè nji Derbe mí bba ò, fú ddiy dzzdjú, Lustra mí bba ò, cha ddì nì Yesu kodjú kpa ndèy ró dho tdè Timotewu nì tdè dey mí nga ò. Àmí yânì tdè Yahuddi-síngba ndèymí à tdè ndèy ùw Drà nì li, chú àmí djǎnì tdè Yunani-ddùw. 2 Lustra ndèymí Ikoniya mí bba ó nì cha ì ùw Yesu nì kpa dêy à ló těy lǎní. 3 Pawulo jì tdè ndèy tdúw à ì rǎ à nà, fú ddiydhò à krr̂ à ró yâ ddiydhò Yahuddi-ddúw wá ì tdè fungá nì tsì tdè djǎnì nì Yunani-ddùw.a 4 Cha ndrǔ dêy rǎ ddì nì bba óddù njàddí bba ò ro, ndrǔ dêy kǒw dyòw-djá ndèymí drò-dró ní kpa bbû Yerusalemu mí bba óddù nì yǎdha cha ndrǔ pbǒ rónga nì bbu, bbalè dhò. 5 Fúddiy dhò, cha ì ùw Yesu nì kpa dhí ùwdha ngǔ klǒw, ndrǔ kíyddà dêy ndèy ndrr ddu ró ddu ró.Makedoniya ónì kpa ró ndèy shì Pawulo nyú djú nì ddùw kpà
6 Pawulo mà ndèy dyási nà bbîy Furujiya mí bba òluw ndèymí Galatiya nà, ŋà Bblǒ Thíy gù ndrǔ Drà mí Hwî mí lò-ɦéy tdràdha óddù Aziya mí ngòw óluw ro. 7 Ndrǔ shì tdè Musiya mí ngòw ò ro, ndrǔ ddêy tdè ì tsǔw Betaniya mí ngòw ò, chú Yesu mí Thíy ùw nzá ndrǔ dhò. 8 Fúddiy dhò, ndrǔ dà Misiya mí ngòw òluw ndrǔ rà bbiy Troya mí bba ò. 9 Kúw ónga nà, Pawulo njà tdè li-nyú djú ndèy shi nì ddiy, Makedoniya mí ngòw ó kpatss̀ dèy à nì ddiy kwo ndèy dè. “Ra Makedoniya mí ngòw ò, nyi kwó mà tso-tso.” 10 À njà wá li ónga ꞌwiy dho mànì ddiy ro, fú nga nà ndùw mà thì mà, mà rǎ Makedoniya mí ngów ò. Mà ddêy fúnì Drà îy mà ndey mà rǎ, Hwî mí lò-ɦéy tdrà ndrǔ dhò.
Ludiya lî ndèy Drà dè ddiy
11 Troya óddò, mà rà ngbír Samotraki mí juw djò, ngǒ nà dda ó tuw nà, nêyngá bbǔtss̀ ró mà rà Neyapoli mí bba ò. 12 Fungá ddù, mà rà drǒngó ní bba ò cha ka íy nì Filipi ní nì, cha ndèy tdè Makedoniya mí ngòw ó nì, Roma mí dziylíy ó nì. Mà dêy fungá bíy ní ddu dhò.
13 Sabato itsś djú, mà rà rúgò drǒngó ní bba mí kaley tsò ró ddà tsò rò, cha mà ddêy tdè mà rà shì Drà nzz̀dha mí nga chùw mí nga ò. Mà dòw fungá, mà tdrà lò cha ì njûw tdè ì fungá nì dhì dhò. 14 Fú ì tdè lò rř nì dhì kàó ddì li ró dho tdè Ludiya, cha ndèy tdè ngbù-kà-ngbù ní rù ónga dzź nì li, à shì tdè Tuwatera mí bba óddò. À tdè Drà ndèy dêy nzž nì li. Drǒngóli pù à thíy tsò ndaní à ǔw Pawulo nì tdrǎ nì lò-ɦéy. 15 À lòw bàtízò nděyngà dzá nì bbalè nà wá ro, à îy mà ndèy bbâ. À tdrà, “Ya nyì nì tdrǎ manì dìychú Drǒngóli ndèy ùw nì li, nyì ra màtsá ngà dzá.” À chêy mà.
Pawulo ndèymí Sila nà ngiy-dzà ó
16 Ddì nì ddu ó, cha mà tdè rǎ Drà nzz̀dha mí nga ò ro, mà njûw mà piy ní sǐngba ní ngba nà chá ndèy tdè che thíy nà nji tsò djò nì lò jòwdha mî. À mbà tdè ddiy drǒ djání dhò fú ddiy njèydha tùw òluw. 17 Í sǐngba ní ngba dyǒw Pawulo ndèymí mà nà, swádha nà, “Í kpa nì Ru Pléy nì Drǎ ngá nokpa kpà cha ì nì nyì dho gôw mí tuw tdrǎ nì.” 18 À njèy fú ddiy bíy ní ddu dhò. Luwtéy ddu ó, zòw lòw Pawulo, à lî ndèy à tdrà che thíy dhò, “Yesu Kristo ró dho nà, manì jǎ nyì dhò nyì shi rúgò fú sǐngba ní ngba óddò!” Fúnga nà, che thíy bbà à.
19 Njí djá njà tdè ìdhí mb chùwdha mí klôw ngû ngǎ ro, ndrǔ lòw Pawulo ndèymí Sila nà ndrǔ drr̀ ddiy ónga dzźdha mí nga ò, li djò-kpa ddàdha djá nyú djò. 20 Ndrǔ mbà kpa lò-ndòdha djá nyú djú ro, ndrǔ kâ tdrà, “Í kpa nì Yahuddi-ddúw, ndrǔ nì màdhí drǒngó ní bba nza drǒ 21 ndrǔ nì bbalè gwiy nzá Roma mí yǎdha ùw nì ddiy nà ǐngí mà pbǒ rónga ddí.”
22 Bíy ní bbalè-kpà njûw ì Pawulo mà ró gò Sila nà ro, lò-ndòdha djá jà ka thá fú kpa ró rù ndèymí ka dhěy ndrǔ. 23 Ndrǔ dhèy kpa ddiy dzzdjú ndrǔ bblà kpa ngiy-dzà ò ndèymí ndrǔ jà ngiy-dzà rónga pbòdha-dja dhò à pbǒ kpa rónga ndèy nyú nà. 24 À kwô í lò jàdha ro, à lêy ndrǔ dza-ó-dza òluw nì ngiy-dzà ò, à kâ kpa koko chèy kóngó nà.
25 Kúw ónga nà, Pawulo ndèymí Sila nà tdè Drà nzž ndèymí ngwo ngwǒdha nà, njàddí ngiy-dzà ó kpa dêy ndrǔ chuw rř rr̀-dha ní. 26 Ndùw-ndùw drǒngó ní chìy-chìy shì tdè, à lêy ngiy-dzà ko-bbùwtey jà ndèy. Fúnga nà, ngiy-dzà tsò pù ndèy, bbalè wá cha ì tdè ngiy-dzà ò nì thokpa ró nyòrr̀ klô ndèy. 27 Ngiy-dzà rónga pbòdha-dja chì ro, à njà ngiy-dzà tsò pù ndèy, à ddâ nděyngá gòw-dyì, à jì ndèy hwî ndèy, ddiydhò à dêy ddey ngiy-dzà ó kpa kòw ŋà wá. 28 Chú, Pawulo swâ, “Nzǐ nyú nyi rónga! Mà nì ney wá!” 29 Ngiy-dzà rónga pbòdha-dja îy tǎlà, à ì ndèy ngiy-dzà ò, à chèy Pawulo ndèymí Sila nà nyú djú ndèy rónga nì bbǐ ddiy nà. 30 À kâ ndrǔ mbà rúgò, à dhî, “Drǒngóli, ma njey ná ddu ndaní ma chǔw gôw?”
31 Ndrǔ ngù lò, “Ùw Drǒngóli Yesu, nyi rà gôw chùw, nyi ndèymí nyǐngà dzá bbalè nà wá.” 32 Ndrǔ kâ Drǒngóli mí lò tdrà à dhò ndèymí ì tdè fulè dzá nì ndrǔ nà wá. 33 Fú kúw nà ngiy-dzà rónga pbòdha-dja tdûw ndrǔ ndèymí à gbû ndrǔ dhí chúw ónga; ndùw-ndùw à ndèymí ǎngá dzá bbalè nà wá ndrǔ lòw bàtízò. 34 Ngiy-dzà rónga pbòdha-dja mbà ndrǔ nděyngà dzá ndèymí à lêy nyû ndrǔ nyú djú; à tdè hwî nà ddiydhò à nděyngà dzá bbalè nà wá ùw Drà. 35 Bbǔw-bbúw nga nà, lò-ndòdha djá chô ìdhí la-dzàdha djá jàdha nà ngiy-dzà rónga pbòdha-dja dè, “Nyì ddá fú kpa.” 36 Ngiy-dzà rónga pbòdha-dja tdrà Pawulo dhò, “lò-ndòdha djá jà mà ddá nyì Sila nà. Nja-nja nyì ra, nyì jùw djòw ddiy nà.”
37 Chú Pawulo tdrà ndrǔ dhò, “Ndrǔ dhèy mà bbalè nyú djú, màdhí lò ka tdèy nzá ngǎjìní, yakpe mà ní Roma ó kpa, ndrǔ bblâ mà ngiy-dzà ò. Nja-nja ndrǔ nì jì ì ddá mà chíychìy ní ŋǎchú? Nzǐ! Bba ndrǔ rǎ mà dda ì, ì níddò ndèymí ndrǔ mbǎ mà djòtey ì.”
38 La-dzàdha mí kpa ngù í lò, lò-ndòdha djá dè ro, ndrǔ rr̀ Pawulo ndèymí Sila nà tdè Roma ó bbalè, do lòw ndrǔ. 39 Ndrǔ rà ndrǔ zòw njèy, ndrǔ mbà ndrǔ djòtey ngiy-dzà óddò, ndrǔ kwô ndrǔ bbǎ ì drǒngó ní bba. 40 Pawulo ndèymí Sila nà shì tdè ngiy-dzà óddò ddiy dzzdjú, ndrǔ rà Ludiya ngá dza ò cha ndrǔ njûw ì cha ì ùw Yesu nì kpa nà ndrǔ bbû klôw kpa dhò. Ndrǔ kâ rà.