Pàka ì ùw Drà nì kpa kàó yâ krŕdha djú
15
1 Ì ùw Yesu nì kpa, njàddí mà-djú rò shì tdè bbiy Yuddeya mí bba óddò Antiyokiya mí bba ò, ndrǔ lòw tdè cha ì ùw Yesu nì kpa gwiy: “Ya nzá nyì ró yâ ka krr̂ cha Musa ngá yǎdha gwîy níchú, nyì kà nzá nyì pá.” 2 Í ddiy mbà tdè Pawulo ndèymí Barnaba nà mà kàó lò-pàdha fú kpa nà. Fú lò dho, ndrǔ vû Pawulo ndèymí Barnaba nà ndèymí njàddí ì ùw nì ndrǔ rò nà ndrǔ rǎ ru Yerusalemu mí bba ò Yesu ngá dyòw-djá njà ndèymí bba-djá dhiy í lò nà. 3 Ì ùw Yesu nì kpa chô ndrǔ cha ndrǔ kà ì rǎ mí nga ò ndèymí cha ndrǔ tdè dǎ Foyinishiya òluw ndèymí Samariya nà ro, ndrǔ tdrà ya ŋǎchú Yunani-ddúw lîy tdè ì Drà dè mí lò. Í lò-ɦéy lêy cha ì ûw Drà nì ndrǔ wá hwî nà. 4 Ndrǔ shì tdè Yerusalemu mí bba ò ro, cha ì ùw Yesu nì kpa, dyòw-djá ndèymí drò-dró ní kpa nà nì kwô ndrǔ, ndrǔ tdrà wánì ddiy cha Drà njèy ì dè nì nga là djò nì.5 Ì ùw nì njàddí kpa rò cha ì tdè Farisayo mí ngúw kàó nì ngbî ì ru ndèymí ndrǔ kâ tdrà, “À jì ka njěy yâ Yunani-ddúw ró ndèymí ndrǔ pbǒ Musa ngá yǎdha rónga.”
6 Yesu ngá dyòw-djá ndèymí drò-dró ní kpa njûw ì ddìnga ó, í lò-ónga njàdha dhò. 7 Bíy ní lò-pàdha dzzdjú, Petro ngbî ndèy ru, à tdrà ndrǔ dhò, “Ma-djú cha ì ùw Yesu nì, nyì tsi njàddí nga nà, Drà vû ma nyì kà óddò, ndaní Yunani-ddúw rř Hwî mí lò-ɦéy ndèymí ndrǔ ûw. 8 Drà cha ndèy tsi nì bbalè thíy ónga nì, à dhò ndèy kwô ndrǔ Bblǒ Thíy bbúdha nà ndrǔ dhò, à njèy tdè màdhò níchú. 9 À ndò mà ónga nzá mà Yahuddi-ddúw ndèymí ndrǔ Yunani-ddúw nà, ddiydhò à ngù mà ónga thí ùwdha nà. 10 Nja-nja, ddudhò nyì ní Drà ónga mbř nò léydha nà Yesu kodjú kpa djú cha mà ndèymí mà-bbúw djòluw à shì tdúwdha nà nǐ? 11 Ngǎ! Mà ùw mà rà gôw chùw Drǒngóli Yesu mí ndru òluw, ngbè ndrǔ níchú.”
12 Bbalè wá cha ì njûw tdè ì nì djúnga ddà ɦiy, cha ì tdè lò rř Barnaba ndèymí Pawulo nà nì tdrǎ ddùw mí ɦiy djò ndèymí wá li ónga ꞌwiy dho mànì ddiy cha Drà njèy Yunani-ddúw kàó ì dè nì nga là djò nì. 13 Ndrǔ sî tdè ro, Yakobbo tdrà, “Ma-djú cha ì ùw Yesu nì, nyì rr lò ma dè. 14 Simonia dhò mà dhò ŋǎchú Drà dhò tdè ndèy mí ddeydha njitsò djú à tdûw ndanà Yunani-ddúw ndèy dho ddiy. 15 Í lò njûw ndèy ddì-kà-ddì nabi-kpà dhí lò nà cha à ndîy ndèy níchú:
16 “‘Í ddiy dzzdjú ma rà ngu
ndèymí ma rà Dawuddi ngá ndèy chèy nì rù-dzà ss̀ ví.
Ndèy sà ndèy nì ma rà ss̀,
ma rà ngù ví ndèy rr̀dja ò,
17 ndaní ì gògò mànì bbalè měy Drǒngóli,
ndèymí Yunani-ddúw wá cha ì nì ma ró dho iy nì,
Drǒngóli tdrà, cha ndey njeynì fú ddiy nì’
18 ka tsì ndru ní nga djú ddò nì ddiy kpà.b
19 “À nì màtsá lò-tdèydha, manì tdrǎ, nzǐ mà léy à déy klǒw Yunani-ddúw dhò cha ì nì ì li Drà dè nì dhò. 20 Fú ddiy rr̀djá, mà kà mà ndíy ndrǔ dhò, tdràdha nà, ndrǔ rŕ ì gú kpà dhò nì nyû bbúdha róddù, bbǎlà róddù, tdyà ní ndèy tdyà ndèy nì zǎ ndèymí jǔw nyùdha róddù. 21 Ddiydhò Musa ngá yǎdha ka gwîy Yahuddi-ddúw dhí njuwdha-dzà òluw à nga ndèy ndruní nga djú ddò, cha ka dêy zǒw wánì Sabato ddù ró.”
Ndíydha ní lò cha ì ùw Yesu nì Yunani-ddúw dhò
22 Dyòw-djá ndèymí, bba-djá, ndèymí cha ì ùw Yesu nì kpa nà Yerusalemu ó nì, ùw ì vú ìdhí bbalè rò ì chó Antiyokiya mí bba ò, ddìnga ó Pawulo ndèymí Barnaba nà. Ndrǔ vû Sila ndèymí Yudda nà cha ndrǔ îy tdè Barsaba ní nì ma-djú kàó ddù, kpa rwo cha ì tdè ì ùw Yesu nì kpa djùkpa ddǎ nì. 23 Ndrǔ thokpa ó ka chô ndíydha ní lò,
Mà dyòw-djá, drò-dró ní kpa, ndèymí ma-djú cha ì ùw Yesu nì,
Ngéy ní pbúw cha ì ùw Yesu nì kpa Antiyokiya, Shami, ndèymí Kilikiya mí bba ó nì:
Zudha nyì dhò.
24 Mà rr̀ mà kàó bbalè rò rà nyì nza lò nà, ndrǔ lî nyìdhí ddeydha nzá mà bbû nì lò nà. 25 Fúddiy dhò, à tdè lǎní mà dhò, mà thíy kâ ddì ddiy nà, mà vú bbalè mà chó ndrǔ nyì dè ndèymí màdhí jǐ-djá Barnaba ndèymí Pawulo nà, 26 ì ddâ ì thíy ìdhí djiy djú ddò nì, màdhí Drǒngóli Yesu Kristo ró dho djú. 27 Fǔchú ro, mànì Yudda ndèymí Sila nà cho, ndrǔ rǎ fú lò tdrà ì, mà ndîy nì ì-tsò nà. 28 Ddiydhò, à nì lǎní Bblǒ Thíy dhò, ndèymí mà nà, nzǐ mà léy tǔw-tǔw nì nga nyì djú, cha à da, ndèy nì ndèy jǐ cha ì ùw Yesu nì ndrǔ dhò nì ddiy djòluw. 29 Nyì bba ddiy bbúdha tdyàdha ní gú dhò, jǔw róddò, tdyà ní ndèy tdyà ndèy nì zǎ ndèymí bbǎlà njèydha nà, ya nyì pbò nyì fú ddiy róddù, nyì rà dey lǎní.
Nyì ma lǎní.
30 Fú kpa ka chô tdè nì rà bbiy Antiyokiya mí bba ò, cha ndrǔ njûw tdè cha ì ùw Yesu nì bbalè ddìnga ó ro, kpa kâ ndíydha ní lò bbu ndrǔ dè. 31 Fú ndíydha ní lò ndrǔ zòw ro, hwî njèy ndrǔ, ddiydhò à bbû ndrǔ dhò klôw. 32 Yudda ndèymí Sila nà cha ìníddò, ì tdè nabi-kpà nì, ndrǔ tdrà lò lèy ndrǔ dówdha mî ndèymí klôw bbúdha mî mà-djú dhò. 33 Ŋà kpa dêy fungá ddiy dzzdjú, mà-djú chô ndrǔ ì jùw djòw ddiy nà ndrǔ ngú cha ì chô ì nì kpa dè. 34 [À tdè lǎní Sila dhò à děy fulè.] c 35 Chú, Pawulo ndèymí Barnaba nà ndrǔ mà tdè Antiyokiya mí bba ò, cha ndrǔ dêy Drǒngóli mí lò gwiy ndèymí Hwî mí lò-ɦéy tdràdha nà njàddí bíy ní ì dyasi nà.
Pawulo mà ndò ì Barnaba nà ddiy
36 Njàddí ddu dzzdjú, Pawulo kâ tdrà Barnaba dhò, “Mà ngú mà-djú cha ì ùw Yesu nì rónga njà ddíyàchú wánì bba òluw cha mà tdrà Drǒngóli mí lò ǒmá nì, mà njǎ ya ŋǎchú ndrǔ nì dey ddiy.” 37 Barnaba jì tdè ì rǎ Yohana cha ka íy nì Marko ní nì nà ddí, 38 chú, Pawulo jì tdè nzá, ddiydhò à bbà tdè ndrǔ Pamfuliya ó nì ꞌwìydha nì nga ò, à rà tdè ndrǔ nà nzá njí ò.