Pawulo ndèymí Barnaba nà Ikoniya mí bba ó
14
1 Ikoniya mí drǒngó ní bba ó Pawulo ndèymí Barnaba nà mà rà Yahuddi-ddúw dhí njuwdha-dzà ò gbè ndrǔ dêy njěy níchú. Fulè ndrǔ tdrà lò ì ró ꞌwiy nì nà, ddiydhò bíy ní Yahuddi-ddúw ndèymí Yunani-ddúw nà ùw Drà mí lò. 2 Chú, Yahuddi-ddúw cha ì gù nzǐ ì ǔw nì sà Yunani-ddúw jùw Pawulo ndèymí Barnaba nà ró à lêy ndrǔ jùw ngû ngǎjìní djúní ró. 3 Fúddiy dhò Pawulo ndèymí Barnaba nà dêy fungá bíy nì ddu dhò, Drà mí lò-ɦéy Drǒngóli mí ndru nà tdrǎ ì jùw kpá-kpá ní nà, cha à nì jǐ ndrǔ njěy ddùw mí ɦiy ndèymí ddùw nà nì djò. 4 Fú drǒngó ní bba ó bbalè ónga ndò ndèy, njàddí ndrǔ jì Yahuddi-ddúw, njàddí ndrǔ jì Yesu ngá dyòw-djá kpa. 5 Ngéy ní pbúw, Yahuddi-ddúw ndèymí ddìnga ó ndrǔ djùkpa ddàdha djá nà tdèy lò ndaní ì njěy Pawulo ndèymí Barnaba nà ngǎjìní ndèymí ì bû kpa djuw nà. 6 Chú, ndrǔ chùw fú lò-tey ro, ndrǔ kòw Lukayoniya mí ngòw ó drò-dró ní bba Lustra ndèymí Derbe nà nì ndèymí fú bba kàtéy bba ò ddí, 7 cha ndrǔ dêy Yesu mí Hwî mí lò-ɦéy tdrǎ òmàluw nì.Pawulo ndèymí Barnaba nà Lustra mí drǒngó ní bba ó
8 Lustra mí bba ó tdè ddì li cha ndèy koko vêy ndèy mí gôw óddò nì ndèymí à bbîy tdè nzá. 9 Í kpatss̀ dêy cha Pawulo nì tdrǎ nì lò rř. Pawulo njà nga à dè ro, à njà à nì ney ùwdha nà cha à dho à rónga pa nì, 10 à kâ à iy, “Ngbí nyi ru nyi koko djú!” Fúnga nà, fú kpatss̀ kâ ndèy ì ru, à kâ lòw bbiy.
11 Bíy ní bbalè-kpà njà Pawulo njèy tdè nì ddiy ro, ndrǔ swâ rí ní ì chuw nà Ikoniya mí lò-tsò nà, “Í gú kpà shì dziylíy djò bbalè ró ji nà!” 12 Ndrǔ îy Barnaba Zewus ní, Pawulo Herme ní, ddiydhò à tdè Hwî mí lò-ɦéy ì nì tdrǎ nì kpa djú bba-dja. 13 Zewus ní dyǎdja cha ìdhí dza tdè drǒngó ní bba mí kaley-tsò ró nì mbà tdè drr̀tsś kpá ndèymí lǎní tsó zà nà kaley-tsò rò, ddiydhò à ndèymí bíy ní bbalè nà jì tdè ì bbú madha mí bbudha ndrǔ dhò.
14 Chú, cha dyòw-djá, Barnaba ndèymí Pawulo nà rr̀ tdè í ddiy ro, ndrǔ thâ ì ró rù ndèymí ndrǔ kâ kòw rúgò bíy ní bbalè dè swádha nà: 15 “Í kpa ddudhò nyì ní í ddiy njěy? Mà ddí nì bbalè nyì níchú. Mà nì nyì dhò Hwî mí lò-ɦéy mbǎ, ndaní nyì lí nyì nyìdhí ngǎjìní njeydha óddù djiy ní Drà dè, cha ndèy tdyà rakpa ndèymí dziylíy nà ndèymí ju-ddà ndèymí ì ó wánì ddiy nà nì. 16 Ndruní à bbà pbúw wánì bbíy ì jì níchú. 17 Chú, Drà dhò ndèy lǎní ddiy cha ndèy njèy nì òluw: Drà bbû nyì dhò dji rakpa óddù ndaní nyìdhí nyû ꞌwǒ, à bbú nyì dhò nyû ndaní nyì jùw déy hwî nà.” 18 Dyòw-djá tdèy tdè ì rŕ bbalè nzǐ ndrǔ bbú bbudha ì dho, ndrǔ mbú ì bbalè nà mbùdha ní pbǔw bbalè bbà ndanà ddiy bbúdha dyòw-djá dhò.
19 Njàddí Yahuddi-ddúw kâ shì Antiyokiya mí bba óddù ndèymí Ikoniya mí bba óddù ndrǔ shì bbalè jùw li Pawulo ndèymí Barnaba nà róddù. Ndrǔ bû Pawulo djuw nà, ndrǔ kâ à ddà drǒngó ní bba óddù, ndrǔ dêy ddey ŋà à dhì. 20 Chú, Yesu kodjú kpa njûw ì Pawulo ró ro, Pawulo ngbîy ndèy ru, à kâ ngu drǒngó ní bba ò. Něyngá bbǔtss̀ ró Pawulo ndèymí Barnaba nà kâ rà Derbe mí bba ò.
Pawulo ndèymí Barnaba nà ngû Antiyokiya mí bba ò Shami ó nì
21 Pawulo ndèymí Barnaba nà tdrà Yesu mí Hwî mí lò-ɦéy Derbe ó ro, ndrǔ lêy bíy ní bbalè ngû Yesu kodjú kpa ní. Fú ddiy dzzdjú ndrǔ kâ ngu Lustra mí bba ò, ndèymí Antiyokiya mí bba nà, cha ì nì Pisidiya mí ngòw ó nì. 22 Ndrǔ bbû klôw Yesu kodjú kpa dhò ndèymí lò-tsìdha nà ndaní ndrǔ déy ùwdha nà. Ndrǔ tdrà, “Mà kà mà rǎ bíy ní nzadha òluw ndaní mà tsûw Drà mí Pey mí nga ò.” 23 Pawulo ndèymí Barnaba nà lêy li djùkpa ddàdha djá wánì Drà-dzà òluw, Drà nzz̀dha nà ndèymí nyû bbàdha nà, ndrǔ bbû kpa Drǒngóli dhò, cha ndrǔ ùw tdè nì. 24 Pisidiya mí ngòw òluw dàdha nà ddiy dzzdjú, ndrǔ shì Pamfuliya mí ngòw ó. 25 Ndrǔ tdrà Drà mí lò Perga mí drǒngó ní bba ó ro, ndrǔ rà bbiy Ataliya mí bba ò.
26 Pawulo ndèymí Barnaba nà ngû luwtò Ataliya óddò, dda ó tùw nà Antiyokiya mí bba ò, cha ndrǔ ka bbû tdè Drà mí ndru dhò mí nga ó, ndrǔ njèy tdè nì njí dhò. 27 Ndrǔ shì fulè ro, ndrǔ njûw cha ì ùw Yesu nì kpa ddìnga ó, ndrǔ dhò cha Drà njèy ì là djò nì ddiy wá kpa dhò ndèymí cha Drà pù ùwdha mí dzá-tsò Yunani-ddúw dhò ddí ddiy. 28 Ndrǔ dêy fu nga Yesu kodjú kpa nà bíy nì ddu dhò.