Barnaba ndèymí Sawulo nà ka chô ndrǔ njí dhò ddiy
13
1 Antiyokiya mí bba ó nì Drà-dzà ó tdè nabi-kpà ndèymí li-gwíydha-djá Drà-dzà ó nì nà. Fú kpa kàó tdè Barnaba, Simewoni cha ka íy nì Nigera nì, Lukiyo Kurene mí bba ó nì, Manayen cha Pey Herodde Antipas ngùw nì, ndèymí Sawulo nà. 2 Cha kpa tdè Drǒngóli nzž ndèymí nyû bbàdha nà ro, Bblǒ Thíy kâ tdrà, “Léy Barnaba ndèymí Sawulo nà ngéy madhò cha ma îy ndrǔ dhomà nì njí dhò.” 3 Fúddiy dhò, nyû bbàdha dzzdjú ndrǔ nzz̀ Drà, ndrǔ lêy ì thokpa kpa djú ndèymí ndrǔ chwô kpa rǎ Drà mí njí njèy.Dyòw-djá gwîy bbalè Kupro mí bba ó ddiy
4 Fú bbalè kàó rwo nì kpa Sawulo màgò Barnaba nà Bblǒ Thíy chô tdè nì rà Selukiya mí bba ò, fungá ddò ndrǔ rà Kupro mí jùw djò ngǒ nà ju-ddà óluw. 5 Ndrǔ shì tdè Salamini mí bba ó ro, ndrǔ kâ Drà mí Hwî mí lò-ɦéy tdrà bbalè dhò Yahuddi-ddúw dhí njuwdha-dzà ó. Yohana Marko tdè kpa nà ndrǔ tso-tso kwódha dja ní.
6 Ndrǔ dà tdè wánì juw djòluw pbǔw Pafo mí bba ò. Fulè ndrǔ shì ddì nì gú dja chùw ndèymí mba mí nabi nà ndèy ró dho nà Bar-Yesu nì, 7 cha ndèy tdè ddìnga ó li djùkpa ddàdha dja nà ndèy ró dho tdè Sergiyo Pawulo nì, à tdè ndèy tsì lò drǒ nì li. Fú kpatss̀ îy tdè Barnaba ndèymí Sawulo nà ndèy dè, ddiydhò à jì tdè ndèy rř Drà mí lò. 8 Chú Eluma cha ndèy tdè gú dja nì, fúnì fú dho mí lò-tey à tsâ ndrǔ dhò, ddiydhò à jì tdè ndèy lí pey ddúw djú li ùwdha róddù. 9 Chú Sawulo cha ndrǔ îy tdè ddí Pawulo nì kì tdè Bblǒ Thíy nà, à njà nga chěy Eluma dè ndèymí à tdrà, 10 “Nyi nì che thíy ddùw nyi nì la-djá wánì chǒw ní lò-tsò ró, nyi ónga kì mbwa nà ndèymí ngǎjìní ddiy nyú tsàdha nà. Nyi rá Drǒngóli mí chěy ní tuw rónga lídha bbà ŋǎngí? 11 Nja-nja Drǒngóli mí kpá-kpá-nga nì nyi ró, nyi rà nga njà nzǐ, njàddí ddu dhò nyi rà itsś njà nzǐ.”
Fúnga nà, ndùw-ndùw ndèymí kúw ní nga shì à djò, Sawulo lòw dey bbalè mèy à ddǎ ndèy, ndèy thokpa nà. 12 Li djò-kpa ddàdha dja njà cha ndèy njèy ndèy nì ddiy ro, à ùw, ddiydhò à ónga ꞌwìy Drǒngóli mí lò-gwíydha dhò.
Pawulo ndèymí Barnaba nà Antiyokiya mí bba ó Pisidiya ó nì
13 Pafos óddò Pawulo mà ndèy dyasi nà rà ngǒ nà ju-ddà òluw Pamfuliya mí bba ò cha ndèy nì Perga mí drǒngó ní bba ó ní, cha Yohana bba ndrǔ à ngû luwtòw Yerusalemu ò. 14 Perga óddò ndrǔ rà tdè Antiyokiya mí bba ò cha ndèy nì Pisidiya ó nì. Sabato itsś djú ndrǔ tsùw Yahuddi-ddúw dhí njuwdha-dzà ò, ndrǔ kâ dòw gudjò. 15 Musa ngá yǎdha mí bǔkù ndèymí nabi dhí bǔkù zòwdha dzzdjú, Yahuddi-ddúw dhí njuwdha-dzà ó drǒngóli chô lò ndrǔ dè, tdràdha nà, “Ma-djú cha ì ùw Yesu nì, ya nyì nì ney li-jùw kídha mí lò nà bbalè dhò, krŕ-krr̀ nyì tdra.”
16 Pawulo ngbîy ndèy ru, à tdrà ndèy thokpa nà, “Israeli ó bbalè ndèymí Yunani-ddúw cha ì nì Drà nzž nì, nyì rr lò ma dè! 17 Israeli mí bbalè dhí Drà vû mà djá, à lêy ndrǔ ngû drǒngó ní pbúw ní cha ndrǔ tdè dey Misiri ò ro, à ddâ ndrǔ Misiri óddò ndèymí drǒngó ní kpá-kpá-nga nà. 18 À chèy ndèy jùw ndrǔ nà cho drì-drí nga tho nì dhò ꞌwìydha nì nga ò. 19 Drà sà Kanani ó zarr̀gbòw nì pbúw, à bbû mí dziylíy Israeli mí nzòw dhò ndrǔ déy mí dziylíy djá ní. 20 Í ddiy wá tdûw cho 450.
“Í ddiy dzzdjú Drà bbû ndrǔ dhò lò-ndòdha djá à ddǎ ndrǔ djò-kpa pbǔw nabi Samweli ró. 21 Bbalè kâ pey dhiy Drà dè, à bbû ndrǔ dhò Sawulo Kish mí ddùw-nì, Benjamin ngá pbúw ó nì, cha ndèy nyù tdè pey cho drì-drí nga tho nì dhò nì. 22 Sawulo ka ddâ ddiy dzzdjú, Drà lêy Dawuddi ndrǔ dhí pey ní. À tdè Drà tdrà tdè ndèy ɦuwdjò nì li, ‘Ma chùw Dawuddi Yese mí ddùw-nì, ma jùw jì nì li, à rà wánì ddiy njèy cha ma jùw jì à njěy nì.’
23 “Í kpatss̀ ngá pbúw óddù Drà ddâ gôw dja Israeli dhò Yesu, cha à tdèy nì. 24 Děy nzá Yesu ngà ndèy mí njí tsò ní, Yohana tdrà Israeli ó bbalè dhò wá ndrǔ lí ì dhà rónga ndèymí ndrǔ lǒw bàtízò. 25 Yohana tdè ndèy mí njí tsò tdya ro, à tdrà, ‘Nyì ná nzž manì áyì? Ma nì ngǎ cha nyì nì pbǒ nì li. Chú cha ndèy shì ma dzzdjú nì li, ma kà nzá ma kló à koko ró shí ngìy.’
26 “Ma-djú cha ì ùw Yesu nì, Abrahamu ngá nzòw ndèymí ì nì Drà dò njěy nì Yunani-ddúw nà, à nì mà dhò í gôw mí lò-ɦéy ka chô. 27 Yerusalemu ó bbalè ndèymí ìdhí pey ddúw nà tsì Yesu nzá, chú nabi-kpà dêy tdrǎ nì lò cha ka dêy zǒw Sabato ddù ró nì ndrǔ lêy à njèy ndèy à djádha ó. 28 Kpe nzá ndrǔ chùw ddiy rò cha ì dho ndanà à djò dhi tdèy nì, ndrǔ dhîy Pilato tsò ró à bbú ka hwǐ à. 29 Ndrǔ njèy tdè wá ndèy ndîy ndèy à ró nì lò ro, ndrǔ thûw à tàdha ní tsúw djú ddò ndèymí ndrǔ lêy à tdôw dzì ò. 30 Chú Drà ngù à djiy ní dhi óddù, 31 ndèymí bíy nì ddu dhò cha ì tdè bbiy à nà nì kpa njà à Galilaya óddò Yerusalemu ò. Ndrǔ nì nja-nja fú lò djò ì nì lò tdrǎ nì kpa màdhí bbalè dhò.
32 “Mà ddí nì Hwî mí lò-ɦéy tdrǎ, cha Drà tdèy mà djá dhò nì, 33 à lêy fú ddiy njěy ndèy màdhò, ndrǔ ó ddèy, Yesu tdúwdha nà ru. Cha à ndîy ndèy Dawuddi ngá dyì rwo nì mí bǔkù ó níchú.
“ ‘Nyi nì màtsá ddùw nì,
ndu ma ngû djǎnyi ní.’
34 À tdrà, ddiydhò Drà tdèy tdè ndèy rà fú li ngù djiy ní dhi óddù, ndèy rà fú li bbà nzǐ à ŋwǒ tdôw dzì ò.
‘Ma rà nyi dhò thí ndèymí dìychú ní bû bbu cha ma tdèy Dawuddi dho nì.’
35 Njàddí Dyì mí bǔkù ó kà dhò,
‘Nyi rà nyìmí Thí ní li bbà nzǐ à ŋwǒ tdôw dzìy ò.’
36 “Ddiydhò Dawuddi njèy tdè Drà mí njí nděyngá pbúw kàó ro, à dhì, ka tdòw à djǎnì nà, à rónga ŋwò. 37 Chú ndèy cha Drà ngù djiy ní dhi óddù nì li njà ŋwòdha nzá.
38 “Fúddiy dhò, ma-djú cha ì ùw Yesu nì, manì jǐ nyì tsǐ Yesu òluw cherr bbàdha tdrà ndèy nyì dhò. 39 À òluw bbalè wá cha ì ùw nì djú lò klô ndèy cherr róddù cha nzá Musa ngá yǎdha kà ndèy kló nì. 40 Nyì déy nyì nyú nà ndaní nabi tdrà nì ddiy nzǐ à njěy ndèy nyì ró.
41 “ ‘Nyì nja, nyì nì li njǎ vú ní ddiy ní nì bbalè
nyì ónga ꞌwìy ndèymí nyì sà nyì,
ddiydhò manì rǎ ddiy rò njèy nyìdhí ddu ó
cha nzǐ nyì rà ùw nì,
yakpe njàddí li rò tdrǎ nyì dhò.’”
42 Pawulo ndèymí Barnaba nà tdè Yahuddi-ddúw dhí njuwdha-dzà bbǎ ro, bbalè îy ndrǔ tdrǎ lò sǔw ì dho í ddiy djò njàddí Sabato nà. 43 Yahuddi-ddúw dhí njuwdha-dzà ó njuwdha sî tdè ndèy ro, bíy ní Yahuddi-ddúw ndèymí ì ùw Yahuddi-ddúw dhí ddǐnì nì kpa dyòw Pawulo ndèymí Barnaba nà dzzdjò cha ì tèy lò ndrǔ nà nì ndèymí ndrǔ dêy tdrǎ kpa dhò ndrǔ déy Drà mí ndru ó.
44 Njaddí Sabato ddù ó, chow-chow drǒngó ní bba ó wánì bbalè njǔw ì Drà mí lò-ɦéy rr̀-dha dhò. 45 Yahuddi-ddúw njà fú bíy ní bbalè kpa ro, ndrǔ ónga kì dyǎ nà, ndrǔ tdrà ngǎjìní lò Pawulo ró.
46 Pawulo ndèymí Barnaba nà kâ lò ngù kpa dhò kpá-kpá ní ì thíy nà, “Ddiy jǐ mà tdrǎ Drà mí lò nyì dho nji. Nyì gù ddiy gu nyì róddù ndèymí nyì tdrà nyì kà nzá ndruteyró nì djiy nà, nja-nja mà lî mà Yunani-ddúw dè. 47 Í nì cha Drǒngóli jà madho nì ddiy:
“‘Ma lêy nyi kadha níchú Yunani-ddúw dhò,
nyi mbǎ gôw dziylíy tsò tdôw mí nga ò.’”
48 Ngéy ní pbúw rr̀ í ddiy ro, hwî njèy ndrǔ, ndrǔ bbû madha Drà mí lò dhò ndèymí bbalè wá cha ka lêy tdè ndruteyró nì djiy dhò nì ùw Drǒngóli mí lò.
49 Drǒngóli mí lò nyâ fú pbúw òluw wá. 50 Chú Yahuddi-ddúw mwô lò drò-dró ní dhì ò cha ì njěy nì lǎní lò nì ndèymí ì nzz nì Drà nì ndèymí bba-djá nà fú drǒngó ní bba ó nì, ndrǔ nyâ nzadha Pawulo mà ró Barnaba nà ndrǔ kâ kpa dìy ìdhí ngòw óddù. 51 Fúddiy dhò ndrǔ jà ì koko ró hôw ndrǔ ròb ì nì fú ddiy gǔ ddiy nà ndèymí ndrǔ kâ rà Ikoniya mí drǒngó ní bba ò. 52 Yesu kodjú kpa ónga kì hwî nà ndèymí Bblǒ Thíy nà.