Ndrǔ hwì Yakobbo chú ndrǔ lêy Petro ngiy-dzà ò
12
1 Fú ddu ó Pey Herodde chèy tdè cha ì ùw Yesu nì kpa rò, à tdè jǐ ndèy bbǒw ndrǔ. 2 À jà ka hwì dyòw-djá Yakobbo, Yohana mí djûnì gòw-dyì nà. 3 Herodde njà tdè í ddiy nyâ hwî Yahuddi-ddúw ò ro, à chěy Petro ddí. Í ddiy njèy tdè ndèy ngǎ ndèy ó thiy nà nì madha mí nyû ddu ó. 4 Herodde chèy tdè Petro ddiy dzzdjú, à lêy à ngiy-dzà ò, à bbû ka pbǒ à rónga tho nì la-dzàdha mí ngúw cha ndèy ó la-dzàdha dja tdè tho tho nì dè. À ddêy tdè ndèy mbǎ Petro bbalè nyú djú lò-tdèydha ò Pasaka mí nyû ddù dzzdjú.5 Petro ka lêy tdè ngiy-dzà ò ro, chú cha ì ùw Yesu nì kpa dêy Drà nzž à dhò wánì nga nà.
6 Herodde jì tdè ndèy ddá Petro bbalè nyú djò ro, chú fú kúw nà Petro tdè ddǔ rwo nì la-dzàdha djá kàó, shúdha ní fú kpa ró rwo nì nyòr nà ndèymí njàddí rwo nì la-dzàdha djá dêy nga pbǒ ngiy-dzà tsò ró. 7 Drǒngóli ngá malayika kâ shì chǔ Petro dè, à dyî ngiy-dzà ónga wá. Malayika jà Petro rónga, à chîy à. À tdrà, “Ngbí nyi ru zěy!” Petro thotèy ró nyòr kâ ndèy klo.
8 Malayika kâ tdrà à dhò, “Thó nyì ró rù ndèymí nyi koko ró shí nà,” Petro njèy fǔchú. Malayika tdrà à dhò, “Hwo nyìmí rù djú rù, dyǒw ma.” 9 Petro dyòw à kodjò ngiy-dzà óddù, chú à tdè ngǎ ddeydha nà cha malayika nì njěy nì ddiy nì dìychú ddiy, à nzz̀ tdè ndèy nì ddùw njǎ. 10 Ndrǔ dà ddì nì ndèymí rwo nì mí nga pbòdha djá ro, ndrǔ shì djuw mí kaley-tsò ró cha ndèy ra nì drǒngó ní bba dè nì. Kaley tsò pù ndèy ndrǔ dhò ndèyníddù, ndrǔ shì òmà luw. Ndrǔ bbîy tdè drá ddiy dzzdjú malayika kâ Petro bbà.
11 Petro nyú kâ ndèy pù, à tdrà ndèyníddù, “Nja-nja ma tsì dìychú Drǒngóli chô nděyngá malayika à rǎ ma pa Herodde thokpa óddù ndèymí Yahuddi-ddúw dhí lò-ddéydha róddù.”
12 Petro ddêy fú lò ro, à kâ rà Mariya, Yohana cha ka íy nì Marko mí yànì ngá dza ò, cha bíy ní bbalè-kpà njûw tdè ì Drà nzz̀dha dhò mí nga ò. 13 Petro tdô rúgòluw nì kaley-tsò ro, Rodda ní ka íy nì sǐngba ní ngba kâ rà kaley-tsò pù. 14 À rr̀ fúnì Petro chuw ro, hwî tdè à njěy ddiydhò, à pù kaley-tsò nzá, chú à kâ kòw rà tdrà ngéy ní ndrǔ dhò, “Petro nì kaley-tsò ró!” 15 Ndrǔ tdrà à dhò, “Nyi ná vǐy?” À dêy tdrǎ sǔw Petro nì ndey ro, ndrǔ kâ tdrà, “À kà à déy Petro ngá malayika.”
16 Chú, Petro dêy kaley-tsò tdo sǔw, ndrǔ pù ro, ndrǔ njà à, ndrǔ ónga ꞌwìy wá. 17 Petro kâ tdrà ndèy thokpa nà ndrǔ djúnga ddǎ ndèymí à tdrà ndrǔ dhò ya ŋǎchú Drǒngóli ddâ tdè ndèy ngiy-dzà óddò ddiy. À kâ tdrà, “Nyì tdra í lò Yakobbo dhò ndèymí djúní nà ddí.” À kâ rà ngéy ní nga ò.
18 Bbǔbbú nga nà, la-dzàdha djá ónga tdè tdǒ ndèymí nga ngbùwdha tdè drǒ cha ndèy njèy ndèy Petro ró nì ddiydhò. 19 Herodde mèy tdè à kpéy ddiy dzzdjú, à chùw à nzá, à lòw dey la-dzàdha dja dhiy ndèymí à dêy jǎ ka hwî ndrǔ. Herodde kâ rà dey drá ní ddu dhò Yuddeya mí bba óddò Kayisariya mí bba ò.
Herodde mí dhi
20 Herodde tdè thǒw nà Turo mí bba ndèymí Sidon mí bba ó bbalè ró, ndrǔ kâ rà à dè ì gbǎ ìdhí lò-tsò ddì, ddiy nà. Chú ndrǔ lòw jǐ Blasto Pey ngá njí-dja nà ro, ndrǔ kâ tdrà dziylíy djòw ŋà, ddiydhò à màdhí ngá dziylíy dêy nyû chǔw Pey ngá dziylíy óddò.
21 Cha ka tdèy tdè Herodde thó ndèy Pey mí rù na mí ddu ó ro, à dǒw Pey mí thìynga djú ddí, à kâ lò tdrà bbalè dhò. 22 Bbalè kâ swa rí ní ì chuw nà, ndrǔ kâ tdrà ǐchú, “Í nì gú chuw, ngǎ mà bbalè chuw.” 23 Ndùw-ndùw, Drǎ ngá malayika kâ Herodde pèy gudjò dhi nà ddiydhò à bbû tdè madha Drǒngóli dhò nzá, ndèymí à zz̀ ó kǎkà kâ à à, à kâ dhì.
24 Chú Drà mí lò dêy ndèy ndrr sǔw, à nyâ ndèy ddí.
25 Barnaba ndèymí Sawulo nà sî cha ì tdè njěy nì ddiy ro, ndrǔ ngû Yerusalemu óddò Yohana nà cha ka îy nì Marko nì.