Petro gù lò Yerusalemu ó nì Kanisa dhò ddiy
11
1 Dyòw-djá ndèymí cha ì ùw Yesu nì kpa Yuddeya òluw nì rr̀ tdè Yunani-ddúw ddí kwô tdè Drà mí lò. 2 Fúddiy dhò, Petro rà tdè ru Yerusalemu mí bba ò ro, ì ùw nì kpa cha ì ró yâ ka krr̂ tdè nì nyâ pàka à tsò ró, 3 ndrǔ tdrà, “Nyi rà tdè nzá ì ró yâ ka krr̂ nì kpa dhí dza ò, nyi nyù nyû ddí ndrǔ nà.” 4 Petro lòw wánì ddiy nga ndrǔ dhò cha à njèy tdè ndèy níchú. 5 “Ma tdè Yopa mí drǒngó ní bba ó Drà nzž ro, màtsá nyu ó mà njà ddùw. Ma njà tdè drǒngó ní rù níchú nì ddiy nì thuw bbiy rakpa óddù, kà tdè thuw ndèy tdéy tho nì nà, à thûw pbǔw ma tdè mí nga ó. 6 Ma njà tdè fú ddiy chǒw ro, ma njà í dziylíy djú ì koko tho nì nyà, tsó téy nyà, ì ddanì ì, ì ngòtsò nà nì nyà ndèymí vi ó rì nà. 7 Ma kâ li chuw rò rr̀ à nì lò tdrǎ ma dè, ‘Petro, ngbí nyi ru. Ji nyi nyǔ!’8 “Ma ngù lò, ‘Ngǎ fǔchú, Drǒngóli! Swà ní ddiy ǐngí ndèy nì ngǎ thí nì ddiy rò tsùw ma kuw ò nzá.’
9 “Li chuw rò tdrà lò rakpa óddù rwo nì mí ó, ‘Nzǐ íy nèy ndèy nì nì ddiy swàní ddiy ní cha Drà ngù thíy nì.’ 10 Í ddiy njèy tdè ndèy gbow ngà nà, ka kâ à drr̀ wá ru rakpa ò ddíyàchú.
11 “Fúnga nà, gbow nì kpa cha ka chô tdè ma dè nì Kayisariya óddù nì dèy tdè ma dêy tdè ǒmá nì dza tsò ró. 12 Bblǒ Thíy kâ tdrà ma dhò, nzǐ ma tdyǎ nga ràdha nà ndrǔ nà. Mà kâ rà ma-djú za nì nà ro, mà kâ tsùw Korneliyo ngà dzá. 13 À kâ tdrà ma dhò ya ŋǎchú malayika dhò tdè ndèy, ndèy dho nděyngá dzá, à kâ tdrà ndèy dhò, ‘Chó bbalè Yopa mí bba ò ndrǔ rǎ Simoni cha ka íy nì Petro nì iy. 14 Fú li rà nyi dhò lǎní lò mbà cha nyi ndèymí nyǐngá dza ó bbalè nà wá nyì rà gôw chùw.’
15 “Cha ma lòw lò tdrà ro, Bblǒ Thíy kâ thuw kpa djò, cha à shì tdè mà djò njitsò djú níchú. 16 Ma kâ cha Drǒngóli tdrà tdè nì lò ddey, ‘Yohana bbû tdè bàtízò ddaa nà, chú nyì rà bàtízò lòw Bblǒ Thíy nà.’ 17 Ya Drà bbû tdè ndrǔ dhò ddì-kà-ddì ní bbudha cha à bbû tdè màdhò mà ùw tdè Drǒngóli Yesu Kristo ro, ma ná áyì cha madho Drà mí lò gù nì?”
18 Ndrǔ rr̀ tdè í ddiy ro, ndrǔ tdè ngǎ lò rò nà cha ì dho gù nì, ndrǔ kâ madha bbu Drà dhò, tdràdha nà: “Drà kâ li dhà rónga lídha bbu ddí Yunani-ddúw dhò djiy ó.”
Antiyokiya ó nì Kanisa
19 Nja-nja cha ì ka dhâ tdè Stefano ró ndèy shì tdè nì nzádha mí lò dhò nì kpa rà tdè pbǔw Foyniki mí drǒngó ní bba ò, Kupro ndèymí Antiyokiya mí bba ò, Drà mí lò-ɦéy tdràdha nà Yahuddi-ddúw dhò. 20 Ì ùw tdè Drà mí lò nì kpa rò shì tdè Kupro óddù ndèymí Kurene nà, ndrǔ rà Antiyokiya mí bbà ò ndrǔ lòw dey Yunani-ddúw gwiy Drǒngóli Yesu mí Hwî mí lò-ɦéy nà. 21 Drǒngóli mí kpá-kpá-nga tdè ndrǔ nà, bíy ní bbalè ùw ndèymí ì lídha nà Drǒngóli dè.
22 Í lò-ɦéy rr̀ tdè ndèy Yerusalemu mí bba ó cha ì ùw Yesu nì kpa gi ò ro, ndrǔ kâ Barnaba cho Antiyokiya mí bba ò. 23 À shì tdè ro, à njà Drà mí ndru, hwî njèy à, ndèymí à kî ì ùw tdè Drà mí lò nì ndrǔ thíy ndaní ndrǔ déy Drǒngóli mí lò ó. 24 À tdè lǎní kpatss̀, à kì tdè Bblǒ Thíy nà ndèymí ùwdha nà, bíy ní bbalè ddí rà tdè Drǒngóli dè. 25 Barnaba kâ rà Sawulo mèy Tarso mí bba ò, 26 à chùw tdè Sawulo ro, ndrǔ ngû à nà Antiyokiya mí bba ò. Cho ddì nì dhò Barnaba ndèymí Sawulo nà njûw ì ddìnga ó cha ì ùw Yesu nì kpa nà ndèymí bíy ní bbalè gwíydha nà. Yesu kodjú kpa ka îy tdè ndrǔ nji Kristayo ní Antiyokiya ó.
27 Fú ddu kàó, nabi rò kpà shì Antiyokiya ò Yerusalemu óddò. 28 Fú kpa kàó ddì li cha ndèy ró dho tdè Agabba ní nì ngbîy ndèy ru à kâ tdrà Bblǒ Thíy nà, drǒngó ní ɦùw rà chèy Roma mí dziylíy ó dzò. Í ddiy njèy ndèy Klawudiyo tdè Roma mí Pey ro. 29 Yesu kodjú kpa wá ddì-ddì ní li jì níchú ddêy tdè ì bbú ì thokpa ó ddiy Yuddeya ó cha ì ùw Yesu nì ì djú dhò 30 Í ddiy ndrǔ njèy, ì thokpa ó ddiy chódha bba-djá dè Barnaba ndèymí Sawulo nà nì dè luw.