Njíkpà 10

Petro ndèymí Korneliyo nà

1 Kayisariya mí bba ó tdè ddì li, à ró dho tdè Korneliyo. À tdè la-dzàdha mí kpa ddàkì ddì nìdhí ngúw djú drǒngóli cha ka íy nì Italiyano ní nì la-dzàdha djá. 2 À nděyngà dzá bbalè nà wá ndrǔ bbû ì Drà dò njèydha dhò. À dêy ndèy thokpa ó ddiy bbu ndrǒ ngéy ní bbalè dhò, à dêy ddí Drà nzž wánì nga nà. 3 Ddì ní ddu ó, chow-chow sâ drrdhiy nì ró, nyu nyù tdè à. À njà tdè Drǎ ngá malayika lǎní drǒ cha ndèy shì tdè ndèy dè nì, à kâ à iy, “Korneliyo!”

4 Korneliyo njà tdè malayika do nà, à kâ dhiy, “Drǒngóli, ddu ná ndey.”

Malayika kâ lò ngù, “Nyìmí Drà nzz̀dha ndèymí ddiy bbúdha nà zòw ní bbalè dhò nì shì ru rakpa ò Drà dè. À nì ddeydha ní ddiy bbúdha mî Drà nyú djú. 5 Nja-nja chó bbalè Yopa mí bba ò, ndrǔ rǎ Simoni cha ka íy nì Petro nì iy. 6 À nì déy Simoni nà cha ndèy nì shí thìydha mí nyǔꞌwiy nà nì, ǎngá dza nì ju-ddà tsò-ró.”

7 Cha ndèy tdrà tdè lò à dhò nì malayika rà tdè ro, Korneliyo kâ nděyngá rwo nì njí-djá iy ndèymí ndèy rónga pbòdha mí li nà cha ndèy njey nì Drà dò nì. 8 À tdrà tdè ndrǔ dhò ddiy wá cha ndèy njèy ndèy nì, à kâ ndrǔ chô Yopa mí bba ò.

Nyu nyù Petro ddiy

9 Něyngá bbǔtss̀ ró, kpa tdè rǎ ìdhí bbiydha ò ro, ŋà ndrǔ shì tdè chow-chow Yopa mí bba ò ro, sâ za nì djú, Petro kâ dji ru, kpì ní dza djò Drà nzz̀dha dhò. 10 À ɦùw lòw tdè ro, à jì tdè ndèy nyǔ ddiy rò, chú nyû ka tdè rǐ ro, ddiy mí ɦiy rà à djò. 11 À njà tdè rakpa pù ndèy, ddiy rò tdè thuw bbiy rakpa óddù ngbè hwî ndèy nyú nà ní rù níchú. Ddiy rò tdè thuw bbiy dziylíy djò ndèy tdéy tho nì nà. 12 Fú ddiy ó tdè tho ì koko nà nì nyà jì wá ndèymí ì dda nì ì ì-ngòtsò nà nì ndèymí rì nà vi ó nì. 13 Li chuw rò kâ tdrà à dhò, “Petro, ngbí nyi ru. Ji nyi nyǔ.” 14 Petro kâ lò ngù, “Drǒngóli, ngǎ fǔchú! Ma nyù děy nzá cha màdhí yǎdha Yahuddi-ddúw gù nì.” 15 Fú li chuw kâ lò tdrà à dhò rwo ngà nà, “Nzǐ íy ddiy swà ní ddiy ní cha ŋà Drà thì à nì thí ro.” 16 À njà fú ddiy mí ɦiy gbow ngà nà, ndùw ka tdûw fú rù ví rakpa ò. 17 Petro ónga dêy tdǒ ndèy njà tdè nì ddùw dhò ro, Korneliyo chô tdè nì kpa chùw Simoni ngá dza, ndrǔ kâ dèy kaley-tsò ró. 18 Ndrǔ dhǐy ya Simoni cha ka íy nì Petro ní nì fungá ddiy. 19 Petro tdè ddeydha nà ndèy njà tdè nyu tùw òluw nì ddiy djò ro, Bblǒ Thíy kâ tdrà à dhò, “Simoni, gbow nì kpa nì jǐ ì njǎ nyi. 20 Ngbí nyi ru, thú bbiy, ra ndrǔ nà nzǐ nyi thíy ónga tdǒ, ddiydhò, ma chô ndrǔ ma.” 21 Petro kâ thu bbiy à kâ tdrà kpa dhò, “Manì cha nyì nì měy nì li. Nyì shǐ ddudhò?” 22 Kpa ngù lò, “Mà shì Korneliyo cha ndèy nì Roma mí la-dzàdha mí kpa ddàkì ddì nìdhí ngúw djú bba-dja dèddò. À nì chǒw ndèy njey nì ddiy nì li ndèymí Drà dò ndèy nì njěy nì li, cha Yahuddi-ddúw wá njeynì à dò àmí lǎní njeydha dhò nì. Thí ní malayika tdrà tdè à dhò, nyi shǐ ǎngá bba ò, ndanì à rř nyi rà tdrà nì lò.” 23 Petro kâ kpa kwo dzá nděyngá lu ní.

Petro nì Korneliyo ngá dza ó

Něyngá bbǔtss̀ ró Petro kâ rà kpa nà, njàddí cha ì ùw Yesu nì, djúní Yopa ó nì kâ rà ndrǔ kodjú. 24 Něyngá bbǔtss̀ ró à shì Kayisariya ò. Korneliyo tdè kpa pbǒ ddiydhò à îy tdè ndèy làyi ndèymí ndèy dyási nà ddìnga ó, ndèy làyi ndèymí chow nì ndèy dyási nà. 25 Petro tsùw tdè dzá ro, Korneliyo njûw ndèy à nà, à kwò ndèy à kotéy, à kâ nzz̀ à dhò. 26 Chú, Petro kâ ley à ngbí ndèy ru. À kâ tdrà, “Ngbí nyi ru, Manì bbalè nyi níchú.”

27 Ndrǔ tdè lò tdrǎ à nà ro, Petro tsùw dzá, à chùw bíy ní bbalè-kpà njûw ì ddìnga ó. 28 À tdrà ndrǔ dhò, “Nyì wá, nyì tsì ŋà yǎdha ùw nzá Yahuddi-ddúw njúw ì Yunani-ddúw nà, ǐngí ndrǔ rǎ ndrǔ rónga njà. Chú Drà dhò ma dhò nzǐ ma íy njàddí li swà ní li ní ǐngí ngǎ thí ní li ní. 29 Fú lò dhò, cha ka îy tdè ma ro, ma shì ingá nzá ma njèy pàka ní. Manì nyì dhiy, ddudhò nyì îy ma?” 30 Korneliyo zz̀ lò, “Ddu tho nì dhò, ma tdè Drà nzž màtsá ngà dzá í sâ drrdhiy ngítss̀ djú nga mí ó ró. Fúnga nà, ddì nì kpatss̀ kâ dèy ma nyú djú ndèy ró sárŕ ní rù nà. 31 À kâ tdrà, ‘Korneliyo, nyìmí nzz̀dha rr̀ ndèy Drà dè ndèymí à ddêy nyìmí ddiy bbúdha zòw ní ndrǔ dhò nì djò nga. 32 Chó bbalè Yopa mí bba ò, ndrǔ rǎ Simoni cha ka íy nì Petro ní nì iy. Fú li nì lu Simoni ngà dzá cha ndèy thi nì shí nì, ju-ddà tsò ró.’ 33 Fúddiy dhò, ma chô lò nyi dè ndùw-ndùw, nyi njèy lǎní nyi shì. Nja-nja mànì wá ingá Drà nyúdjú ndaní mà rř ddiy wá cha Drǒngóli jà tdè nyi dhò nyi tdrǎ màdhò.”

34 Petro kâ lòw dey tdrà, “Nja-nja ma tsì dìychú bbalè nì wá ddì-kà-ddì Drà nyú djú 35 chú kwó bbalè wánì pbúw óddò cha ì nì Drà dò njěy ndèymí chǒw ní lò njěy nì. 36 Í nì cha Drà tdrà tdè Israeli mí nzòw dho nì ddiy, à tdrà tdè ndanà Drà mí lǎní Hwî mí lò-ɦéy shú ní thíy cha Yesu Kristo mbà tdè nì, à nì wánì bbalè dhí Drǒngóli. 37 Nyì tsì cha à njèy tdè Yuddeya mí bba ó nì ddiy kpa, à ngà ndèy Galilaya óddò, cha Yohana gwîy bbalè bàtízò mí lò nà ddiy dzzdjú. 38 Nyì tsì Nazareti mí bba ó Yesu djú lò cha Drà vìy à Bblǒ Thíy na ndèymí kpá-kpá-nga nà. À bbîy wánì nga òluw cha à dêy lǎní ddiy njěy ndèymí bbalè rónga pa cha ì tdè che thíy nà nì, ddiydhò Drà tdè à nà. 39 Mà Yesu ngá dyòw-djá nì fú ddiy ì tsì nì bbalè Yahuddi-ddúw dhí dziylíy ó ndèymí Yerusalemu mí bba nà. Ndrǔ hwì à, à chódha nà tàdha ní tsúw djú. 40 Chú, Drà ngbî à djiy ní dhi óddù ddu gbow nì dzzdjú, à ùw ka njǎ à. 41 À dhò ndèy ngǎ wánì bbalè dhò, chú mà dhò cha Drà vû fú ddiy ì tsì nì bbalè ní, à nì mà cha ì nyù ndèymí ì mb à nà nì, à ngû djiy ní dhi óddò ddiy dzzdjú. 42 À jà màdhò mà tdrǎ ndèy mí lò bbalè dhò ndèymí à dhǒ ndey nì cha Drà lêy tdè à djiy ní bbalè ndèymí ì dhì nì bbalè dhí lò ndèy rà tdèy nì li, 43 wánì nabi-kpà tdrà à djú lò cha ndèy rà fú li ùw nì li dhò cherr bbàdha rà ndèy njèy.”

Ngéy ní pbúw djò Bblǒ Thíy thûw ddiy

44 Cha Petro tdè í ddiy tdrǎ ro, Bblǒ Thíy kâ thuw bbalè wánì djò cha ì rr̀ mí lò nì. 45 Yâ krr̀dha ka njèy tdè ì ró nì Yahuddi-ddúw mí ùwdha djá cha ì shì tdè Yopa óddù Petro mànà nì ónga ꞌwìy wá Bblǒ Thíy thûw Yunani-ddúw djò ddiy mí lò dhò. 46 Ddiydhò ndrǔ rr̀ tdè kpa nì lò tdrǎ ngéy ní lò-tsò nà ndèymí Drà mádha nà. Petro kâ dhiy, 47 “Li rò ná ney cha ndèy dho í kpa rŕ bàtízò lòwdha dda nà nì róddù nì? Ndrǔ chùw Bblǒ Thíy gbè mà chùw níchú” 48 Petro kâ jà fú Yunani-ddúw dhò ndrǔ lǒw bàtízò Yesu Kristo ró dho nà. Ndrǔ kâ tdrà à dhò à déy ì nà bíy ní ddu dhò.