Sawulo lî ndèy Yesu dè
9
1 Cha Sawulo tdè bbiy Yesu kodjú kpa nyú ddùdha ndèymí ndrǔ chìdha nà tdè ro, à kâ rà Drǎ ngá dyǎdjá djú drǒngóli dè. 2 À dhîy lò ndíydha à dè cha ndèy rǎ ndanà Dameski ò Yahuddi-ddúw dhí njuwdha-dzà ò, ndaní ya ndèy chùw fulè li rò cha ndèy nì Drǒngóli mí tuw ó nì, à tdě kpa ǐngí dhì, ndèy mbǎ Yerusalemu ó ngiy-dzà ò. 3 Sawulo shì tdè chow-chow ndèymí bbiydha nà Dameski mí bba ò ro, kadha kâ shì chǔ rakpa óddù, à kâ à rónga tdyi gbrǔ. 4 À chèy dziylíy djò, à kâ li chuw rò rr̀ nì lò tdrǎ ndèy dhò, “Sawulo, Sawulo, ddudhò nyi ní nzadha bbu madhò?”5 Sawulo kâ dhiy, “Nyi ná áyì, Drǒngóli?”
À kâ lò ngùw, “Manì Yesu cha nyi nì nzadha bbu ndèy dhò nì. 6 Nja-nja, ngbí nyi ru rǎ drǒngó ní bba ò, ndrǔ rà nyi dhò cha nyi kà nyi njěy nì ddiy tdrà fulè.”
7 Ì tdè bbiy Sawulo mànà nì bbalè tsò ꞌwìy wakpa; ndrǔ rr̀ li chuw, chú ndrǔ njà ndèy li-rónga nzá. 8 Sawulo ngbî ndèy ru dziylíy djú ddò, à pù tdè ndèy nyú ro, chú à dêy ddiy njǎ nzǐ. Fúddiy dhò, ndrǔ ddà à ddàdha ní à thokpa nà Dameski mí bba ò. 9 Ddu gbow nì dhò à tdè ddiy njǎ nzǐ, à nyù ddiy rò nzá ǐngí mbdha ní ddiy rò ddí à mb nzá.
10 Dameski mí bba ó Yesu kodjú kpa rò tdè ney ndèy ró dho nà Ananiya. Drǒngóli îy à nyu òluw, “Ananiya!”
Ananiya zz̀ lò, “Òní, Drǒngóli.”
11 Drǒngóli kâ tdrà à dhò, “Ra Yudda ngá dza dè cha ka íy nì Chěy ní tuw ó, dhíy Tarso óddù ndèy shì nì li cha ndèy ró dho nì Sawulo nì, ddiydhò à nì Drà nzž. 12 Nyu òluw à njà ndèy ró dho nà Ananiya ní li shì, à lêy ndèy thokpa à djú ndaní ndèy njǎ ddiy ví.”
13 Ananiya zz̀ lò, “Drǒngóli, ma rr̀ bíy ní lò à ró ndèymí Yerusalemu mí bba ó nyìmí thí ní bbalè ró ngǎjìní ddiy cha à nì njěy nì nà. 14 À shì ingá Drǎ ngá dyǎdjá mí ngúw djú drǒngóli bbû à dhò nì kpá-kpá-nga nà ndaní ndèy chěy cha ìnì nyi ró dho iy nì bbalè wá.”
15 Chú Drǒngóli tdrà Ananiya dhò, “Ra! Í kpatss̀ nì màtsá vúdha ní ddiy cha ndèy rà ley ma ró dho tsǐ ndèy Yunani-ddúw kàò nì ndèymí ndrǔdhí Pey nà ndèymí Israeli mí bbalè nyúdjú. 16 Ma rà dhò fú li dhò ŋàbùnà à kà fú li chǔw zòw ma ró dho mí lò djú ddiy.”
17 Ananiya kâ rà, à tsùw dzá. À lêy ndèy thokpa Sawulo djú ro, à tdrà, “Ma dju Sawulo, Drǒngóli Yesu, cha ndèy dhò ndèy nyi dhò tuw ó cha nyi tdè rǎ ingá ro nì, chô ma ndaní nyi njǎ ddiy ddíyàchú ndèymí ndaní nyi kǐ Bblǒ Thíy nà.” 18 Ndùw, ddiy rò gbè ddiy kòwrŕ níchú nì kâ chèy Sawulo nyú óddù, à kâ lòw dey ddiy njà ddíyàchú. À kâ ndèy ngbi ru ro, à kâ bàtízò lòw; 19 nyû rò nyùdha dzzdjú, à chùw klôw.
Sawulo Dameski ó ndèymí Yerusalemu nà
Sawulo dêy bíy nì ddu dhò Yesu kodjú kpa nà Dameski mí bba ó. 20 Ddì ngà nà, Sawulo lòw bbalè gwiy Yesu nì Drà-ddùw Yahuddi-ddúw dhí njuwdha-dzà òluw. 21 Bbalè wá cha ì rr̀ à nì, ónga ꞌwìy wakpa, ndrǔ dhîy, “Í ní ngǎ ndèy dêy ngǎjìní ddiy njěy Yesu ró dho ì dêy tdrǎ Yerusalemu ó nì kpatss̀? À shǐ ngǎ ingá ndaní ndèy mbǎ ndrǔ shúdha ní Drǎ ngá dyǎdjá mí ngúw djú drǒngóli nyú djò?” 22 Chú Sawulo ngû klǒw tǐ à da Yahuddi-ddúw djòluw cha ì nì Dameski ó nì dhò Kristo nì dìychú Masiya.
23 Bíy ní ddu dzzdjú, Yahuddi-ddúw njûw ì ndaní ì hwî Sawulo, 24 chú Sawulo tsì ndrǔdhí ddeydha. Ndrǔ děy à pbǒ itsś ndèymí kúw nà wá drǒngó ní bba mí kaley-tsò ró ndaní ì hwî à. 25 Chú Yesu kodjú kpa tduw à kúw nà, ndrǔ thû à tdyǔ nà dza nyú òluw rúgò.
Sawulo nì Yerusalemu ó ddiy
26 Sawulo shì tdè Yerusalemu ó ro, à jì tdè ì gbá ì ddìnga ó Yesu kodjú kpa nà, chú à mí do dêy ndrǔ njěy, ndrǔ dêy ùw nzǐ ya dìychú à tdè Yesu kodjò dyǒw nì li! 27 Chú Barnaba tdûw à, ka à mbà Yesu ngá dyòw-djá dè. À tdrà ndrǔ dhò ŋǎchú Sawulo njà tdè Drǒngóli ndèymí bbiydha ó ndèymí Drǒngóli tdrà à dhò nì ddiy ndèymí àmí lò-tdràdha nà Dameski mí bba ó Yesu ró dho nà ngǎ do ní. 28 Fúddiy dhò, Sawulo dêy ndrǔ nà, à bbîy Yerusalemu mí bba òluw, lò-tdràdha nà ngǎ do ní Drǒngóli ró dho nà. 29 À tèy lò Yahuddi-ddúw nà cha ì tey nì Yunani lò nì ndaní ì tsǐ dìychú nì lò, chú ndrǔ ddêy ì hwî à. 30 À mí djúní cha ì ùw Yesu nì tsì fú lò ro, ndrǔ mbà tdè à Kayisariya mí bba ò ndèymí ndrǔ kâ à cho Tarso mí bba ò.
31 Ì ùw Yesu nì kpa Yuddeya ó nì, Galilaya ndèymí Samariya ó ndrǔ tdè ì jùw djòw ddiy nà. Ndrǔ dhò Bblǒ Thíy bbû kpá-kpá-nga ndèymí lò-ddéydha nà, à lêy ndrǔ hwo ndrr̂ ndèy, ì nì Drǒngóli dò njèy ddiy nà.
Petro pâ Ayineya rónga
32 Cha Petro bbîy tdè wánì ngòw òluw ro, à kâ rà cha ì ùw Yesu nì thí ní bbalè rónga njà Luda mí bba ò. 33 Fungá à chùw kpatss̀ ndèy ró dho tdè Ayineya nì. Fú kpatss̀ ɦîy tdè ra djú cho rù nì dhò, ddiydhò véy ní ndèy koko vêy ddiy nà à ró klôw tdè ngǎ. 34 Petro tdrà à dhò, “Ayineya, Yesu Kristo rà nyi rónga djì nja-nja! Ngbí nyi ru, tdúw nyìmí ɦíydha mí ddiy.” Ndùw Ayineya ngbî ndèy ru. 35 Bbalè wá ì dêy Luda mí bba ó ndèymí Sharon mí bba ó nì njà à ro, ndrǔ ùw Drǒngóli.
36 Yopa mí bba ó tdè Yesu kodjú kpa kàó ddì li, à ró dho tdè Tabita, kà lî ro, à nì Dorikaa, wánì sâ nà à tdè lǎní ddiy njěy ndèymí zòw ní ndrǔ tso-tso kwo. 37 Fúnga nà, dhi lòw à rí, à kâ dhì, ndrǔ gbû à rónga ro, ndrǔ lêy à dza djú dza ò. 38 Ludda tdè chow Yopa nà. Yesu kodjú kpa rr̀ Petro tdè Ludda ó ro, ndrǔ chô rwo nì kpa rǎ à iy, “Krŕ-krr̀, nzǐ tdya nga ràdha nà mà dè!”
39 Petro rà tdè ndrǔ nà, à shì tdè ro, ndrǔ kâ à mbà ru, dza djú dza ò. Ì kpá dhì nì dhì kâ dèy gbrǔ Petro ró ì nì dzž ddiy nà ndèymí ì nì Dorika thì tdè nì rù dhǒ děy à tdè ì nà ro. 40 Petro ddâ ndrǔ wá rúgò dza óddù; à kâ ndèy dyòwtey kwò gudjò ka Drà nzz̀. À lî ndèy nyú bu dè, à tdrà, “Tabita, ngbí nyi ru.” À pu ndèy nyú, à njà Petro, à dòw ru. 41 Petro kâ à tduw à thokpa nà, à kâ dèy ndèy koko djú. À kâ Drǎ ngá thí ní bbalè ndèymí ì kpá dhì nì dhì iy ro, à kâ à bbu ndrǔ dè djiy ní. 42 Í lò-ɦéy tsì tdè ndèy Yopa mí drǒngó ní bba óddù wá, bíy nì bbalè ddí ùw tdè Drǒngóli mí lò. 43 Petro dêy tdè Yopa mí bba ò bíy nì ddu dhò Simoni nà cha ndèy tdè shí njèydha mí nyǔꞌwiy nà nì.