8
1 Sawulo tdè ddí ddì li cha ndèy ùw tdè ndrǔ hwǐ Stefano nì.Nzadha lêy cha ì ùw Yesu nì kpa ónga pîy ndèy ngéy-ngéy
Fú ddu ó, drǒngó ní nzadha ngà tdè ndèy Yerusalemu ó cha ì ùw Yesu nì kpa ró, bbalè wá dhâ ngéy-ngéy Yuddeya mí ngòw òluw ndèymí Samariya nà, dyòw-djá chú mà. 2 Drà dò ì dêy njěy nì bbalè shì rà Stefano tdòw drǒngó ní dzz̀dha nà. 3 Chú Sawulo dêy rǎ wánì nga òluw cha ì ùw Yesu nì kpa nzádha nà. À rà ddì-ddì ní dza òluw, dhì ndèymí kpa ní bbalè lówdha nà, à dêy ndrǔ mbǎ ngiy-dzà ò.
Filipo tdrà tdè Drà mí Hwî mí lò-ɦéy Samariya mí bba ó
4 Chú, cha ì ùw Yesu nì kpa cha ka dhâ tdè ngéy-ngéy ní tdrà tdè Hwî mí lò-ɦéy wá cha ì rà tdè mí nga òluw. 5 Filipo rà tdè bbiy Samariya mí drǒngó ní bba ò, à tdrà tdè ndrǔ dhò Kristo ɦuwdjò. 6 Bíy nì bbalè kpa dêy Filipo nì tdrà nì lò rř ddiydhò ndrǔ tdè ì ró mí lò-rr̀dha ꞌwíy nà ndèymí ì njǎ cha à tdè njěy nì ddùw kpà. 7 Bíy nì che thíya kpà cha ì tdè bbalè ó nì shì rúgò bbalè óddò ì nì swa ì chuw rí ní nà. Ì ró dhi nà nì ndrǔ ndèymí ì koko vêy nì ndrǔ rónga pâ. 8 Fúddiy dhò, drǒngó ní hwî tdè fú drǒngó ní bba ó.
Simoni dyǎdja ní nì
9 Ddì nì kpatss̀ ndèy ró dho tdè Simoni nì tdè dyǎdja fú bba ó bíy ní ddu kpa dho, à dêy léy Samariya mí bba ó nì bbalè ónga dêy ꞌwǐy ndèymí à dêy tdrǎ ndèy nì drǒngó. 10 Bbalè wá cha ì ɦuwdjò drr̀ nì ndèymí nzá ì ɦuwdjò drr̀ nì dêy cha à nì tdrǎ nì lò rř, “Í kpatss̀ nì Drà mí kpá-kpá-nga nà cha ndrǔ íy nì Drǒngó nì.” 11 Bíy nì ddu dhò ndrǔ dêy à kodjò dyǒw, ddiydhò à dêy ndrǔ ónga ꞌwìy ddùw njèydha nà.
12 Chú ndrǔ ùw Filipo tdè tdrǎ nì Drà mí Hwî mí lò-ɦéy Drà mí Pey mí nga djò nì ndèymí Yesu Kristo ró dho nà nì ro, ka bbû ndrǔ dhò bàtízò, kpa ndèymí dhì nà. 13 Simoni ndèynìddò ddí ùw, à lòw bàtízò. Fú ddiy dzzdjú à dyòw tdè Filipo dzzdjò wá cha à dêy rǎ mí nga òluw, à ónga ddí ꞌwìy cha ndèy njà tdè nì drǒngó ní ɦiy ndèymí ddùw Filipo dêy njěy nì dhò.
14 Yerusalemu ó Yesu ngá dyòw-djá rr̀ Samariya ó bbalè ddí ùw Drà mí lò ro, ndrǔ chô Petro ndèymí Yohana nà ndrǔ dè. 15 Ndrǔ shì tdè ro, ndrǔ nzz̀ Drà cha ì ùw Yesu nì kpa dhò ndaní ndrǔ chǔw Bblǒ Thíy, 16 ddiydhò Bblǒ Thíy shì tdè nzá ndrǔ djò, ndrǔ lòw tdè bàtízò Drǒngóli Yesu ró dho nà kpala-kpala. 17 Petro ndèymí Yohana nà kâ ì thokpa ley cha ì ùw Yesu nì kpa djú, ndrǔ kâ Bblǒ Thíy kwo.
18 Simoni njà tdè Bblǒ Thíy bbû ndèy ndrǔ dhò Yesu ngá dyòw-djá thokpa léydha nà ndrǔ djú ro, à kâ Yesu ngá dyòw-djá dhò mb bbu 19 à kâ tdrà, “Bbú ma dhò ddí í klôw ndaní cha ma rà ma thokpa léy ì djú nì ndrǔ kwó Bblǒ Thíy.”
20 Petro ngù lò: “Sa nyi nyìmí mb nà nyiníddò, ddiydhò nyi dděy tdè nyi dho Drà mí bbudha dzz̀ mb nà! 21 Nyi nì ngǎ ddiy rò nà í njí ó, ddiydhò nyi thíy nì ngǎ thí Drà nyú djú. 22 Lí nyi dhà rónga ndèymí nzz̀ Drǒngóli dè, ya nèy à dho nyi thíy jì ní ddèydha bbà. 23 Ddiydhò ma njà nyi kì dyá nà ndèymí nyi nì piy cherr dhò.”
24 Simoni kâ lò ngù, “Nyi nzz̀ ma dhò Drǒngóli dè ndaní nyì tdrà ní ddiy nzǐ à njěy ndèy ma ró.”
25 Ndrǔ tdrà tdè Drǒngóli mí lò ro, Petro ndèymí Yohana nà kâ ngu Yerusalemu mí bba ò, Hwî mí lò-ɦéy tdràdha nà Samariya mí bíy ní bba òluw.
Filipo ndèymí Etiyopiya mí bba ó ndèy ɦuwdjò drr̀ ní kpatss̀ nà
26 Nja-nja Drǒngóli ngá malayika kâ tdrà tdè Filipo dhò, “Ra bbiy nì nga là djò, ꞌwìydha nì nga ó tuw, Yerusalemu óddù ndèy shì nì cha ndèy rà bbiy Gaza ò nì dè.” 27 Fúddiy dhò, à ngà bbiydha, ndrǔ njûw ì Etiyopiya ó kpatss̀ nà. À tdè ndèy ɦuwdjò drr̀ nì li, sǐngba ní Etiyopiya ò nì Pey nga wánì ddiy djú drǒngóli. Í kpatss̀ rà tdè Yerusalemu ò Drà nzz̀, 28 à tdè ngu bbakà ro, à dòw tdè nděyngá màgálì ó, à dêy nabi Isaya ngá bǔkù zǒw. 29 Bblǒ Thíy tdrà tdè Filipo dhò, “Ra fú màgálì dè, déy chow à kuwtsó.”
30 Filipo kâ kòw tdè màgálì dè, à rr̀ tdè fú kpatss̀ nì nabi Isaya ngá bǔkù zǒw. Filipo dhî à, “Nyi ní ney nyi nì zǒw nì ddiy tsǐ?” 31 À ngù lò Filipo dho, “Ma dhó tsì ŋǎchú, ya děy nzá ndeyli dhò ma dhò ní?” Fúddiy dhò à kâ Filipo kwo à rǎ dòw ndèy kàtéy. 32 À tdè Drǎ ngá ndíydha ní lò zǒw:
“Ndrǔ ddà tdè à towmbù níchú jìdha mí nga ò,
à dêy chíy towmbù mí ngba nìchú ndèy katéy jìdha mí kpa nyú djú,
fú ddiy dhò à pù ndèy tsò ddí nzá.
33 Ka nyâ do à djú ndèymí àmí lò ndò ndèy nzá lǎní.
Áyì dho lò tèy à ó ddèy mî?
Ddiydhò àmí djiy tdûw tdè ndèy í dziylíy óddò.”
34 Ndèy ɦuwdjò drr̀ nì Etiyopiya ddùw dhîy Filipo, “Tdra ma dhò, krŕ-krr̀, nabi ná í lò tdrǎ áyì djò, ndèy djò ǐngí njàddí li djò?” 35 Filipo kâ lò nga fú à tdè zǒw nì Drǎ ngá ndíydha ní lò nà, ndèymí à kâ à dhò Yesu mí Hwî mí lò-ɦéy tdrà. 36 Cha ndrǔ tdè rǎ à nà tuw òluw, cha ndrǔ shì tdè njàddí dda tsò ró ro, ndèy ɦuwdjò drr̀ ní kpatss̀ kâ tdrà, “Nja, dda nì ingá. Ddudhò ndey ma rr bàtízò lòwdha nà?” 37 Filipo kâ lò ngù à dhò, “Ya nyi ùw nyi thíy nà wá ro, nyi dhò bàtízò lòw nèy.” À kâ lò ngù Filipo dhò, “Ma ùw ŋà Yesu nì Drà-ddùw ddiy.” 38 À kâ jà màgálì dhò à děy. Filipo ndèymí ndèy ɦuwdjò drr̀ nì kpatss̀ nà kâ thuw dda ò, Filipo kâ bàtízò bbu à dhò. 39 Ndrǔ shì dda óddù ro, Drǒngóli ngá Thíy kâ Filipo tduw gu, ndèy ɦuwdjò drr̀ nì kpatss̀ njà à ddíyàchú nzá, chú à kâ rà ndèymí tuw nà hwî nà. 40 Filipo chùw ndèy shì ŋà Azoto mí bba ò, à dêy Drà mí Hwî mí Lò-ɦéy tdrǎ wánì drò-dró ní bba òluw pbǔw à shì ndanà Kayisariya mí bba ò.