Stefano tèy lò, lò-tdèydha mí njuwdha ó ddiy
7
1 Drǎ ngá dyǎdjá djú bba-dja kâ Stefano dhíy ddíyàchú, “Í nyi ró ka lêy nì lò ná dìychú?”2 À ngù, “Ma-djú ndèymí ma djá, nyì rr manì tdrǎ nì lò! Drà mí Drǒngó ní nga dhò tdè ndèy mà dja Abrahamu dhò děy à tdè Mesopotamiya mí dziylíy ò ro, nzá à dêy tdè Harani mí dziylíy ó ní. 3 Drà tdrà à dhò, ‘Bba nyìdhí ngá bba ndèymí nyìdhí ngá bbalè nà, rà cha ma rà dhò nyi dhò nì dziylíy ò.’
4 “Fúddiy dhò, à bbà Kalidayo mí dziylíy, à kâ rà dey Harani mí dziylíy ò. Djǎnì mí dhi dzzdjú, Drà chô à i nja-nja mànì dey ǒmá nì dziylíy ò. 5 Chú Drà bbû tdè à dho nga rò drá ddí nzá ingá cha à kà tdè à lêy ndanà ndèy koko dziylíy djò ní. Chú Drà tdèy à dhò ndèymí à ó ddèy nà ndrǔ rà dziylíy chùw à dzzdjú, yakpe fú Abrahamu tdè ngǎ ngba ní. 6 Drà tdrà tdè à dho, í tuw òluw, ‘Nyi ó ddèy rà dey lu ní ngǎ ìdhí dziylíy ó, ka rà ndrǔ nza ndèymí ndrǔ rà dey piy ní cho ddàkì tho nì dho. 7 Chú, Drà tdrà, ma rà nzadha bbu ì rà ndrǔ ley à njěy ì dhò piy ní pbúw dhò.’ Fú ddiy dzzdjú ndrǔ rà shì fú ngòw óddù, ‘ndrǔ rà ma nzz̀ í nga ó.’ 8 À kâ Abrahamu dhò yâ mí yǎdha bbu. Abrahamu kâ ngu Isaka mí djǎnì ní ndèymí à kâ à ro yâ njèy ddu rù nì ó àmí gôw dzzdjú. Fú ddiy dzzdjú Isaka ngû Yakobbo mí djǎnì ní, Yakobbo ngû dri ndèy djú rwo nà nì pbúw dhí djǎnì ní.
9 “Fú dri ndèy djú rwo nà nì mà bbúw, Yakobbo mí ddúwní tdè dyǎ nà Yusufu ró ddiydhò, ndrǔ dzẑ à ónga piy nì Misiri mí ngòw ò. Chú Drà tdè à nà, 10 ndèymí à pâ tdè à àmí wánì ngǎjìní lò óddù. À bbûw Yusufu dhò nyǔꞌwiy ndèymí à lêy Yusufu chùw lǎní ddiy Misiri ó nì Farawu nyú djú. Fúddiy dhò Farawu Misiri mí pey lêy à Pey ní Misiri djú ndèymí ǎngá kaley nà.
11 “Drǒngó ní ɦùw kâ chèy tdè Misiri mí ngòw ó wá ndèymí Kanani nà, fú ddiy mbà lèy ní nzadha, à lêy ndruní nì mà bbúw chùw nyû nzá. 12 Yakobbo rr̀ nyû nì Misiri ò ro, à kâ ddúwní cho fulè ndrǔ rǎ nyû dzz̀ ìdhí ddì nì mí bbiydha ó. 13 Ndrǔ dhí rwo nì mí ràdha ó, Yusufu dhò ndèy djúní dhò áyì ndèy nì ddiy, fú ddiy lêy Farawu tsì Yusufu màdhí ngá ndrǔ. 14 Yusufu tdrà djúní dhò, ‘Nyì tdra màtsá djǎnì Yakobbo dho, Nyi ndèymí nyìdhí ngá drì-drí nga zargbòw ndèy djú mbu nì nà nì ndrǔ rǎ Misiri ò.’ 15 Yakobbo ndèymí nděyngá njàddí ndrǔ nà wá kâ rà bbiy Misiri mí dziylíy ò, cha à ndèymí nděyngá nzòw dhì mí ngà ò. 16 Ndrǔdhí bbúw ní dhí kpalá ngû ví Shekem mí bba ò, cha ka tdòw Abrahamu dzz̀ tdè Imor mí ddúwní dèddò, Shekem mí bba ò ney nì dzẑ nà.
17 “Cha nga shì tdè chow Drà dho ndèy léy ndanà ndèymí lò-tdèydha njèy ndèy Abrahamu dho nì, màdhí bbalè hó Misiri ónì ndrr̂ ndèy tǐy. 18 Ngéy ní Pey ndèy tsì Yusufu nzá nì kâ ngu Pey ní Misiri mí ngòw ó. 19 Í Pey tsà tdè màdhí bbalè nyú, à kprà tdè ndrǔ ónga ndèymí à njèy tdè ngǎjìní ddiy mà bbúw ró ndaní ndrǔ bblá ìdhí nzòw-kà ndaní ndrǔ dhǐ.
20 “Fú nga nà, ka gòw tdè Musa, lǎní ngba Drà nyú djú.a Bǐy gbow nì dho ka pbò tdè à rónga djǎnì ngà dzá. 21 Ka lêy tdè à rúgò ro, Farawu mí dhànì tdûw à, ka ngùw nděyngá ngba ní. 22 Ka gwîy Musa Misiri mí bbalè dhí wánì nyǔꞌwiy nà, à tdè kpá-kpá lò-tdràdha ó ndèymí njeydha nà.
23 “Musa tdè cho drì-drí nga tho ro, à ddêy ndèy rǎ djúní njà, Israeli mí nzòw. 24 À njà tdè ìdhíngá ndrǔ kàó ddì nì Misiri ddùw nì nza ro, à rà fú Israeli ddùw pa Misiri ddùw hwìdha nà. 25 Musa ddêy tdè djúní kà ì tsǐ Drà nì njěy ndèy nà ndèy pá ndrǔ, chú ndrǔ tsì tdè nzá. 26 Něyngá bbǔtss̀ ró, Musa shì ìdhíngá rwo nì Israeli ddúw chùw ndrǔ nì ì dhěy. À ddêy ndèy ndǒ ndrǔ kàónga. À kâ tdrà kpa dhò, ‘Nyì nì dju-dju ní, ddudhò nyì ní jǐ nyì nyú nyì rónga?’
27 “Chú ndèy tdè ngǎjìní ddiy njěy dyànìsi ró nì li kâ Musa djìy nga gidjò, à kâ tdrà, ‘Áyì léy nyi mà-djú li ní ndèymí mà-djú lò-ndòdha dja ní? 28 Nyi ní jǐ nyi hwî ma gbè nyi hwì tdè Misiri ddùw nzz̀ddíngá níchú?’ 29 Musa rr̀ tdè fú lò ro, à kòw Midiya mí ngòw ò cha à dey lu níchú ndèymí fúlè à gòw kpa nì nzòw rwo.
30 “Cho drì-drí nga tho nì dà tdè ddiy dzzdjú, malayika dhò ndèy Musa dho ndèy nì gbǐy nì gú mí kàss dà ó Sinayi mí ngòw gitéy nì ɦiynínga ó. 31 À njà fú ddiy ro, à ónga ꞌwíy wá. À rà ndaní ndèy njǎ chow nì nga óddù ro, à kâ Drǒngóli chuw rr̀. 32 ‘Manì nyì bbúw dhí Drà, Abrahamu ngâ Drà, Isaka ngâ ndèymí Yakobbo ngá nà.’ Do lêy Musa rónga bbìy, à jì tdè ddí nzá ndèy njǎ ddiy kàss dè.
33 “Drǒngóli kâ tdrà à dhò ǐchú, ‘Kló nyì kò ró shí; ddiydhò nyi dèy mí nga nì thí. 34 Ma njà ma tsá bbalè dhí nzàdha Misiri ò, ma rr̀ ndrǔ dhí dzz̀ fú ddiydhò ma rà ndaní ma léy ndrǔ déy ngádha ní. Nja-nja ra, ma rà nyi ngù ví Misiri ò.’
35 “Fú nì ví cha nyì gù nì Musa nyì tsò ró lò nà nì. ‘À yì lêy nyi ndey mà djùkpa ddàdha dja ní ndèymí mà-djú lò-ndòdha dja ní?’ Drà chwô à nděyngá malayika dè nì nga là djòluw cha ndèy dhò ndèy gbìdha ní gú òluw nì kass ó ndaní à děy nyìdhí Pey ní ndèymí nyìdhí lò-ndòdha dja ní. 36 À ddà ndrǔ djùkpa Misiri óddù, à njèy wá li ónga ꞌwíy dho mànì ddiy ndèymí ddùw nà Misiri ò, Ngbú ní ju-ddàb tsò ró, ndèymí cho drì-drí nga tho nì dhò à ddà ndrǔ djùkpa tsò ꞌwìydha nì nga òluw.
37 “Í nì Musa cha ndèy tdrà tdè Israeli mí nzòw dho, ‘Drà rà nyìdhò nabi cho nyì djú kà-óddù gbè ma níchú.’ 38 À tdè cha ꞌwìydha nì nga ó nì Israeli dhí njuwdha ó, ddìnga ó malayika nà cha ndèy tdrà lò Musa dho Sinay mí ngòw djú nì ndèymí mà djá nà. Fungá Musa kwô djiy ndèy bbú nì nì yǎdha ndaní ndèy bbú mà dè.
39 “Chú mà djá gù à chuw rr̀-dha. Fú ddiy rr̀dja ó, ndrǔ gù tdè à, ì thíy ónga nà, ndrǔ jì tdè í ngú ví Misiri ò. 40 Ndrǔ kâ tdrà Aruna dhò, ‘Thi màdhò gú cha ndèy rà mà djùkpa ddà nì, ddiydhò í kpatss̀ Musa cha ndèy ddà mà djùkpa Misiri óddù, mà tsì nzá cha ndèy njèy ndèy à ró nì ddiy!’ 41 Fúnga nà, tdè cha ndrǔ tdyà tdè ddrà mí ɦiy ní ndrìytsś mí ngbà. Ndrǔ mbà à dhò bbudha ndèymí ndrǔ njèy madha cha ì thokpa njèy nì ddiydhò. 42 Chú Drà lî ndèy ndrǔ róddù, à kâ ndrǔ bbu ndaní ndrǔ nzž madha rakpa ó itsś ma, bǐy mà ndèymí lùlú mà dhò. Í nì nabi kàó ddì li ndîy nì bǔkù ó níchú:
“‘Nyì Israeli ddúw, nyì mbà ná tdè madhò bbudha ndèymí madha nà ddí,
cho drì-drí nga tho nì dhò ꞌwìydha nì nga ò?
43 Nyì tdûw Molok ngá gú-dzà
ndèymí Refani ngá lùlú mí drà nà
cha nyì tdyà nyì dêy ndèy dhò nzz̀dha bbu nì drà mí ɦiy.
Fúddiy dhò, ma rà nyì cho ngéy ní ndrǔ dhí bba ò,’ dà ní dà Babeli ò luw.
44 “Mà pbúw tdè Drǎ ngá rù-dzà nà cha ì tdè ꞌwìydha nì nga ò ro. À njèy tdè ndèy gbè cha Drà tdrà tdè Musa dhò à njěy cha ndèy njà nì ddiy níchú. 45 Fú ddiy dzzdjú, cha Yoshuwa ddà tdè mà bbúw djùkpa la ò cha Drà dìy tdè í tdè dey fú dziylíy ó nì pbúw tsò ró nì ro, ndrǔ tdûw fú Drǎ ngá rù-dzà ndrǔ rà ndanà Drà bbû ì dho tdey nì ní dziylíy ò. Fú Drǎ ngá rù-dzà mà fu nga pbǔw Pey Dawuddi nga ddu ò. 46 Drà tdè ndru nà Dawuddi ró ndèymí Dawuddi dhîy Drà bbǎ ndèy sš dza cha ndèy ndèymí wánì Israeli nà dho Drà nzz̀ ǒmá nì. 47 Fúddiy dhò, Sulemani ss̀ tdè dza Drà dho.
48 “Chú Ru Pléy nì Drà déy nì ngǎ bbalè ss̀ nì dza ó, nabi tdrà tdè níchú:
49 “‘Drǒngóli kâ tdrà, Rakpa nì màtsá Pey mí thìynga,
dziylíy nì mà kotéy tsúw-djùw.
Nyi rá ŋá dzà jì ss̀ madhò?
Ǐngí ma rónga shùdha mí nga rá dey ŋangá?
50 Ma thokpa njèy ná nzá ndey fú ddiy kpa wánì?’
51 “Nyì thíy ndèymí nyì gi nà à nì gbè nzá ì tsì Drà nì ndrǔ níchú! À kà ná nyì njěy pàka Bblǒ Thíy ró! Nyì nì fú ddiy njěy gbè cha nyì bbúw njèy níchú. 52 Nabi rò ná ney cha nzá nyì bbúw njèy rǒmá ngǎjìní ddiy nì? Ndrǔ hwì tdè cha ì dêy chǒw ní Li rà shì ddiy mí lò tdrǎ nì kpa. Nja-nja nyì ley fú li ró lò, nyì hwì fú li ndanà. 53 Nyi cha nyì kwô Musa ngá yǎdha malayika kpa dèddò nì, chú nyì pbǒ rónga nzá.”
Ka bû Stefano djuw nà ddiy
54 Cha fú njuwdha ó ndrǔ rr̀ fú lò ro, thǒw lòw ndrǔ, ndrǔ lòw dey ì ka à ro. 55 Chú Stefano cha ndèy ónga kì tdè Bblǒ Thíy nà nì, à ngbî ndèy nyú ru rakpa ò, à kâ Drà mí drǒngó nì ngà nja, ndèymí Yesu na cha ndèy dèy Drà thokpa ví djòluw nì ó. 56 À kâ tdrà, “Nja, ma nja rakpa pù ndey ndèymí Ndrǔ-ddùw dèy ví djòluw nì Drà thokpa ó.”
57 Fúnga nà, ndrǔ rû í gi ónga í thokpa nà ndèymí rí ní swádha nà ro, ndrǔ kâ kòw à dè. 58 Ndrǔ kâ à drr̀ rúgò drǒngó nì bba óddò ro, ndrǔ lòw dèy à brr djuw nà. Fúnga nà, cha ì njà tdè fú ddiy nì bbalè kâ ìdhí rù ley Sawulo ní kpatss̀ ní ngba kotéy.