Njíkpà 6

Zargbòw nì kpa ka vû ddiy

1 Fú ddu ó, Yesu kodjú kpa hó lòw dey ì ndrr, ngéy ní nga óddù ì shì nì Yahuddi-ddúw ndèymí Yunani-ddúw ónga lòw dey ndru, Ebraniya ló ì nì tdrǎ nì ndrǔ ró, nzǐ ka dêy ndrǔ dhí ngǎ kpa ɦíy tso-tso kwo ddì-kà-ddì nzǐ ì nì Ebraniya ló tdrǎ nì ndrǔ dhí ngǎ kpa ɦíy nà wánì ddu ró mí lò dhò. 2 Dri ndèy djú rwo nà nì Yesu ngá dyòw-djá kâ ì dyási njuw cha Yesu kodjú kpa ddìnga ó ro, ndrǔ kâ tdrà, “Mà kà nzá mà bbǎ Drà mí lò tràdha, mà ngú nyû dzźdha ndèymí nyû ndòdha mí njí njèy. 3 Fúddiy dhò, ma-djú ndèymí mà-ví cha ì ùw Yesu nì, nyì vú kpa zarr̀gbòw, lǎní ka nì ì ɦuwdjò tdrǎ nì nyì kà-óddù, cha ì ónga kì Bblǒ Thíy nà nì ndèymí nyǔwꞌwíy nà nì. Mà rà í njí bbu fú ndrǔ thokpa ò, 4 mà Yesu ngá dyòw-djá rà mà Drà nzz̀dha nà ndèymí Drà mí Hwî mí lò-ɦéy tdràdha nà.”

5 Í lò bbû hwî fú kpa dhò wá, ndrǔ kâ Stefano vu cha ndèy ónga kì ùwdha nà ndèymí Bblǒ Thíy nà nì; njàddí Filipo, Pokoro, Nikonora, Timona, Permena ndèymí Nikolawo cha ndèy shì tdè Antiyokiya mí bba óddù nì cha ndèy li ndèy Yudda-ddúw dhí ddînì óddù nì. 6 Ndrǔ bbû fú kpa Yesu ngá dyòw-djá dè, ndrǔ nzz̀ Drà ndèymí ì thokpa léydha nà kpa djú.

7 Drà mí Hwî mí lò-ɦéy nyâ ndèy sǔw. Yesu kodjú kpa hó lòw dey ndèy ndrr zěy-zěy Yerusalemu ó ndèymí bíy nì Drǎ ngá dyǎdjá ddiy ùw pádha.

Stefano ka lòw tdè ddiy

8 Stefano cha ndèy tdè Drà mí kpá-kpá-nga nà nì ndèymí Drà mí ndru nà nì, njèy tdè drǒngó ní ddùw ndèymí ngéy-ngéy nì ɦiy nà bbalè kàó. 9 Bbalè rò cha ì tdè Yahuddi-ddúw dhí njuwdha-dzà ó nì shì tdè Kurene, Iskaderiya ndèymí Kilikiya ndèymí Aziya mí drò-dró ní bba óddù. Fú kpa ngbî ì pàka nà Stefano mà tsò ró, 10 chú ndrǔ kâ tdè nzá cha Stefano tdè tdrǎ nì lò mí nyǔꞌwíy ndèymí Bblǒ Thíy nà.

11 Ndrǔ kâ njàddí kpa chey ndaní ndrǔ tdrǎ, “Mà rr̀ Stefano nì Musa ngá yǎdha ndèymí Drà ró dho sǎ.” 12 Fúddiy dhò, ndrǔ chò tdè bbalè, drò-dró nì ndrǔ, ndèymí Musa ngá yǎdha mí li-gwíydha-djá gi, fú ddiy lêy ndrǔ njûw ì à ró ro, ndrǔ kâ à lòw, ka à mbà drò-dró ní Yahuddi-ddúw djò-kpa ddàdha djá dhí njuwdha nyú djò. 13 Ndrǔ mbà tdè mbwa mí bbalè cha ì rà fú lò ró lò tdrà nì, “Í kpatss̀ bba nzá í thí nì nga ró dho sàdha ndèymí Musa ngá yǎdha nà. 14 Ddiydhò mà rr̀ fú li tdè tdrǎ, Ì Yesu Nazareti ó nì rà í Drà-dzà sà, à rà Musa bbû mà dhò nì yǎdha rónga li.” 15 Bbalè wá cha ì dòw tdè fú lò-tdèydha mí njuwdha ó nì kâ nga njà chǒw Stefano dè, ndrǔ njà à nyú ónga tdè malayika nyú ónga níchú.