Ananiya ndèymí Safira nà
5
1 Chú ddì nì kpatss̀ cha ndèy ró dho tdè Ananiya nì, ddìnga ó dza-yà Safira nà, ndrǔ dzẑ tdè ì thokpa ó ddiy ónga. 2 À kâ fú ddiy gitèy rò kli ì dhò, ɦìytss ddí tsì tdè mí lò, chú ndrǔ mbà gògò ndrǔ lêy Yesu ngá dyòw-djá kotéy. 3 Petro kâ tdrà, “Ananiya, ddudhò setani tsûw ná lò nyì-thíy ò, kpòw nyi njèy ndanà mbwa Bblǒ Thíy dhò, nyi ngû nyi dzẑ nì nza ó ddiy mí mb rò kli nyidhò? 4 Fú ddiy tdè ná ngǎ nyìdhî dêy nzá nyì dzẑ tdè ǒnga ro? Nyì dzẑ ǒnga mí nga dzzdjú, mí mb tdè ná ngǎ nyi thòkpa ó? Ddu léy ndèy nyi ddêy fú ddiy njèydha? Fú nì nyi njèy mbwa ngǎ bbalè dhò chú Drà dhò.” 5 Ananiya rr̀ tdè fú lò ro, à kâ chèy gú djò, ndùw à kâ dhì. Drǒngó ní do lòw bbalè wá cha ì rr̀ fú lò nì. 6 Kpa ní nzòw kâ tsùw dzá ro, ndrǔ kâ à rónga ndéy, ka à mbà rúgò, ka à tdòw.7 Sâ gbow nì dzzdjú, ǎngá dza-yà Safira cha nzá ndèy tsì tdè ya ddu njèy ndèy ddiy nì, ddí kâ tsúw dzá. 8 Petro kâ à dhiy, “Tdrà ma dhò, í ní dìychú nyì chùw Ananiya nà dziylíy ónga dzźdha óddù nì ddiy?”
Safira kâ tdrà, “Òní, fúnì tdè mí dzẑ.”
9 Petro kâ tdrà Safira dhò, “Ddudhò nyì rr̀ nyì ndaní nyì mbǔ Drǒngóli Thíy ónga? Nja! Ì tdòw nyǐngá dza-dja nì kpa koko nì dzá tsò djú, ndrǔ rà nyi ddí mbà rúgò.” 10 Fúnga nà, à kâ chèy Petro kotéy, à kâ dhì. Kpa ní nzòw tsùw dzá ro, ndrǔ chùw ŋà à dhì, ndrǔ kâ à tdúw, ka rà à tdòw nděyngá dza-dja kuwtsó. 11 Drǒngó ní do kâ chèy cha ì ùw Yesu nì kpa ndèymí ì rr̀ tdè fú ndèy njèy ndèy nì ddiy nì ndrǔ djú wá.
Yesu ngá dyòw-djá pâ bíy ní bbalè rónga
12 Yesu ngá dyòw-djá njèy wá li ónga ꞌwíy dhò mà ní ɦiy kpà ndèymí ddùw kpà nà, bbalè-kpà kàó. Ì ùw tdè Drà mí lò nì kpa dêy wánì nga nà ì njuw ddìnga ó Sulemani nga njuwdha mí nga ó. 13 Rútsó li rò ddí tdè ngǎ cha ì dho ì tsò gba fú kpa nà nì, kpe bbalè dêy ndrǔ ma drǒ. 14 Chú, bíy ní kpa ndèymí dhì nà ùw tdè Drǒngóli mí lò, ndrǔ kíyddà ndrr̂ ndèy. 15 Yesu kodjú kpa tdè njěy nì ddiy dhò, ndrǔ mba tdè dhi nà nì bbalè tuw tsò djòluw, ndrǔ là ndrǔ ɦíydha mí ddiy djú ndèymí ra mà djòluw, ndaní ya Petro nì dǎ ro, à ndrr-djò ká ndrǔ rónga tsò tsì cha à nì dǎ ro. 16 Bíy ní bbalè kpa shì tdè Yerusalemu mí drǒngó ní bba kàtéy nì bba óddù, ndrǔ mbà dhi nà nì bbalè ndèymí che thíya nì nza nì bbalè nà, ndrǔ wánì rónga djì.
Yesu kodjú kpa chùw nzadha ddiy
17 Fúnga nà, Drǎ ngá dyǎdjá djú drǒngóli ndèymí ì tdè à mà nà ddu wánì ró nì bbalè, Saddukayo ní kpa kàó bbalè, kâ kì dyà nà. 18 Kpa kâ Yesu ngá dyòw-djá chèy ro, ndrǔ kâ kpa bblà ngiy-dzà ò. 19 Chú kúw nà, Drǒngóli ngá malayika kâ ngiy-dzà tsò pù, à kâ kpa pu rúgò ro, à kâ tdrà, 20 “Nyì ra, nyì děy, nyì tdrǎ Drà-dzà mí bbay djú, bbalè dhò í djiy mí lò-ɦéy.” 21 Bbǔw-bbúw nga nà, ndrǔ kâ tsùw Drà-dzà mí bbay djò cha ka tdrà ì dho níchú, ndrǔ kâ lòw dey bbalè gwiy. Chú Drǎ ngá dyǎdjá djú bba-dja ndèymí ì tdè à mà nà nì ndrǔ shì tdè ro, ndrǔ kâ njuwdha mí bbalè tsò njúw ndèymí Israeli mí ddèy ó bba-djá nà, ndrǔ kâ cho kà zž Yesu kodjú kpa ngiy-dzà óddò. 22 Chú la-dzàdha mí kpa rà tdè ró, ndrǔ chùw kpa ngǎ ngiy-dzà ò. Ndrǔ ngû luwtò njuwdha ò ro, ndrǔ kâ fú lò ngù kpa dhò. 23 Kpa kâ tdrà, “Mà chùw ngiy-dzà tsò ka tdûw lǎní drǒ, nga pbòdha mí kpa ddí dèy dzá tsò djú, chú mà pù tdè dzá tsò ro, mà chùw bbalè tdè ngǎ ngiy-dzà ó.” 24 Ndrǔ rr̀ tdè í lò ddiy dzzdjò, Drà-dzà rónga pbòdha djà ndèymí Drǎ ngá dyǎdjá mí ngúw djú bba-dja ónga ꞌwíy wá, ndrǔ ónga dêy tdǒ ddu rà ndey ndèy njèy í lò ró ddiy.
25 Ddì li rò kâ shì, à kâ tdrà, “Mà nja fú bbalè cha nyì lêy tdè ngiy-dzà ò nì dèy, ndrǔ nì bbalè gwiy Drà-dzà mí bbay djú.” 26 Fú ndèy tdè ngiy-dzà rónga pbǒ nì kpa djú bba-dja, kâ rà dhǐy mí kpa nà ddì ngà ó, kpa kâ Yesu kodjú kpa mbà bbò ní nga nà, ddiydhò kpa dêy bbalè dò njěy, nzánà ndrǔ bú ndrǔ djuw nà.
27 Kpa mba Yesu kodjú kpa drǒngó ní njuwdha ó ro, ndrǔ lêy kpa lò-ndòdha mí njuwdha nyú djú ndanì Drǎ ngá dyǎdjá djú drǒngóli dhíy ndrǔ. 28 À kâ tdrà, “Mà jà nyi dhò nzǐ nyì gwíy bbalè fú dho nà. Chú nyì nja, nyì lêy Yerusalemu dzò kì nyìdhí fú li-gwíydha Yesu ró dho mí lò nà, nyì nì jǐ ka ngǔ mà ngǎjìní bbalè ní fú kpatss̀ mí dhi mí lò dhò.”
29 Petro mà ndèymí njàddí dyòw-djá mà nà kâ lò ngù, “Mà kà ná mà pbǒ bbalè dhí lò à da Drà mí lò djòluw? 30 Mà bbúw dhí Drà ngù cha nyì hwì tdè tàdha ní tsúw djú nì Yesu ví djiy ní dhi óddù. 31 Drà ngbî à ru ndèy mí drǒngó-ní-nga djò ndèy thokpa ví mí nga djòluw nì djò gbè Pey-ddùw ndèymí Gôw-dja ní ndaní à bbú nyì dhà rónga lídha ndèymí lò-bbàdha nà Israeli dhí cherr mî. 32 Mà nì fú lò-ɦéy ì nì tdrǎ nì ndrǔ ndèymí Bblǒ Thíy nà, cha Drà bbû ì nì ndèy dò njěy nì ndrǔ dhò nì.”
33 Fú njuwdha ó bbalè rr̀ fú ddiy ro, thǒw lòw kpa, kpa jì tdè ì chǐy Yesu kodjú kpa chìdha ní. 34 Chú, fú njuwdha ó ddi li ndèy tdè Farisayo ní kpa ndèy ró dho nà Gamaliel nì, à tsì tdè Musa ngá yǎdha gwíydha djá, bbalè wánì ddí dêy à dò njěy. À kâ ndèy ngbi ru fú njuwdha kpà kàó ro, à kâ jà kpa dhò, kpa bbǎ Yesu kodjú kpa rúgò drá ní nga dhò. 35 À kâ tdrà kpa dhò, “Israeli ó kpa, nyì déy nyì nyù nà cha nyì nì jǐ nyì njěy í kpa ró nì ddiydhò. 36 Děy nzá í ddu tdè ndèy shì ní, ddì li cha ka iy tdè Tewudda ní nì ddâ tdè ndèy, à lêy ndèy ɦuwdjò drr̀ drǒngóli ní yà ndèy nì tdrǎ ndèy nì nú ndèy. Bbalè rò cha ì dho ka ddàkì tho nì njûw ì à ró, cha ka hwì tdè à ro, ì dêy à dzzdjò dyǒw nì kpa wá pîy i ónga ngéy-ngéy. Cha ndrǔ dêy njěy nì ddiy wánì dzz̀ ngû ngǎ. 37 Tewudda dzzdjú, njàddí li shì ndèy ró dho nà Yudda Galilaya ó nì Gamente tdè bbalè zòwdha mí ddu ó, à kâ bbalè-kpà njuw ndèy ró, à ddí ka kâ hwì, ǎngá kpa cha ì dêy à kodjò dyǒw nì ddí kâ ì ónga piy ngéy-ngéy. 38 Fú lò dhò, nja-nja manì tdrǎ nyì dhò: Nyì bba fú kpa! Nyì bba ndrǔ rǎ! Ya í lò dhìydha ní ddiy ǐngí fú ndrǔ nì njěynì ddiy shì bbalè dèddò ro, à rà ndèy sà. 39 Chú, ya í ddiy shì Drà dèddò ro, nyì rà fú kpa rr nzǐ, nyì rà chùw nyì nì la njěy Drà tsò ró.”
40 Ndrǔ rr̀ à chuw ro, ndrǔ kâ Yesu ngá dyòw-djá iy ì dè, ka kpa dhèy. Ndrǔ kâ jà kpa ní, nzǐ kpa tdrǎ Yesu ró dho nà ddíyàchú, ndùw ndrǔ kâ kpa bbà à rǎ. 41 Yesu kodjú kpa bbà njuwdha hwî nà, ddiydhò Drà zòw ndrǔ ŋà ì kâ nì bbalè ní fú dho mí nzadha dhò. 42 Wánì ddu ró, Drà-dzà mí bbay djòluw ndèymí ddì-ddì ní dza-kpà òluw, kpa bbà tdè nzá bbalè gwíydha ndèymí Hwî mí lò-ɦéy tdràdha nà Yesu nì Kristob.