Petro ndèymí Yohana nà drǒngó ní njuwdha nyú djú
4
1 Petro ndèymí Yohana nà tdè lò tdrǎ bbalè dhò ro, Drǎ ngá dyǎdjá, Drà-dzà rónga ì nì pbǒ nì kpa djú drǒngóli ndèymí Saddukayo ní kpa nà, rà ndrǔ dè. 2 Fú drò-dró ní kpa tdè thǒw na, ddiydhò Yesu kodjú kpa tdè bbalè gwiy Yesu ó ì dhì nì ndrǔ rà ngu djiy ní. 3 Ndrǔ kâ Petro ndèymí Yohana nà chèy ro, ndrǔ kâ kpa léy ngiy-dzà ò pbǔw bbǔbbú nga ò, ddiydhò ddiy tdè ngítss̀ djú. 4 Chú, bíy ní bbalè cha ì rr̀ Petro nì tdrǎ nì lò nì ndrǔ ùw fú ddiy, ì ùw fú lò nì ndrǔ kíyddà ndrr̂ ndèy peytey mbu.5 Něyngá bbǔtss̀ ró, Yahuddi-ddúw dhí li-djùkpa ddàdha djá, bba-djá nà ndèymí Musa ngá yǎdha mí li-gwíydha-djá nà, njûw ì wá Yerusalemu ò. 6 Ana cha ndèy tdè drǒngó ní Drǎ ngá dyǎdjá tdè fungá ddìnga ó Kayafa nà, njàddí Yohana mànà, Iskander ndèymi njàddí kpa nà drǒngó ní Drǎ ngá dyǎdjá làyi mànà. 7 Ndrǔ lêy ka mbǎ Petro ndèymí Yohana nà ngiy-dzà óddù drǒngó ní lò-tdèydha mí njuwdha nyú djú ro, ndrǔ kâ kpa dhiy, “Nyì njèy ná fú ddiy ŋá klôw nà ǐngí áyì ró dho nà?”
8 Petro cha ndèy ónga ki tdè Bblǒ Thíy nà nì kâ tdrà kpa dhò, “Bbalè djùkpa ddàdha djá ndèymí Israeli mí drò-dró ní kpa nà!” 9 Ya ndu nyì nì jǐ mà tdrǎ lò ndèy njèy ndèy véy ní ndèy koko vêy nì kpatss̀ ró nì zòw lò djò ndèymí nyì ní mà dhiy ŋǎchú fú li-rónga djì ddiy, 10 nyì wá ndèymí Israeli nà wá nyì tsì í ddiy: À nì Yesu Kristo Nazareti ó nì ró dho nà, cha nyì chô tàdha ní tsúw djú nì chú Drà ngù à djiy ní dhi óddù, à lêy í kpatss̀ dèy nyì nyú djú ndèy rónga djì ddiy nà. 11 Yesu nì,
“‘djuw cha nyì dza ss̀dha djá gù nì,
cha à ngû tdè tdêy djú djuw ní.a’
12 Li rò nì ngǎ cha gôw dho ndèy chùw ndèy ró nì, ddiydhò ngéy ní dho nì ngǎ cha ka bbû í rakpa ss̀téy cha mà dho gôw chùw ndèy ró nì.”
13 Kpa njà Petro ndèymí Yohana nà thíy tdè kpá-kpá ro, kpa ónga ꞌwìy wá, ddiydhò Petro ndèymí Yohana nà tdè nzá ì gwîy ì nì bbalè ndèymí ngǎ ìdhí nga ddeydha nà nì, ndrǔ ddêy í kpa tdè Yesu mànà. 14 Chú cha ndrǔ njà tdè ndèy rónga djì tdè nì li dèy Petro mà kàó Yohana nà ro, ndrǔ mèy kpéy cha ì dho tdrà nì ddiy. 15 Fúddiy dhò, ndrǔ kâ jà kpa dhò, nyì shi rúgò drá ní nga dhò lò-tdèydha mí njuwdha-dzà óddù, ndrǔ kâ ì tsò kpa njuw ddìnga ó. 16 Ndrǔ dhîy lò ì kàò luw, “Mà ní rǎ ddu njey í bbalè nà? Bbalè wá cha ì nì Yerusalemu ó nì tsì í kpa njèy nì ddùw, mà dho ddòw nzǐ. 17 Chú fú ddiy tsò tdówdha dhò ndaní nzá à nyá bbalè kàò luw, ddiy jì mà ddǔw fú ndrǔ nyú nzá nà fú ndrǔ ndrŕ ì Yesu ró dho tdràdha nà ngéy ní bbalè dhò ddíyàchú.”
18 Ndrǔ kâ Petro ndèymí Yohana íy dzá ddíyàchú, ndrǔ jà kpa dhò, nzǐ nyì tdrǎ ǐngí nyì gwíy bbalè Yesu ró dho nà ddíyàchú. 19 Chú Petro màgò Yohana nà kâ lò ngù, “À ní lǎní Drà nyú djú mà pbǒ nyì dè nì lò rónga à da Drà dèddò ní? Nyì tdéy ddí nú nyì. 20 Mà kà nzá mà bbǎ cha mà njà nì ddiy ndèymí mà rr̀ nì ddiy djú lò tèydha.” 21 Njuwdha ddù tdè ndrǔ nyú ddíyàchú ddiy dzzdjú, ndrǔ bbà ndrǔ rǎ, ddiydhò ndrǔ chùw lò rò nzá ndrǔ ró cha ì ka tdè ì nzá ndrǔ ndanà nì. Ddiydhò bbalè wánì dêy madha bbu Drà dho cha ndèy njèy ndèy ní ddiy dhò. 22 Ddiydhò cha ndèy rónga pâ tdè ddùw tùw òluw nì li mí cho dà tdè drì-drí nga tho nì djòluw.
Ì ùw Yesu nì kpa ní Drà nzž ddiy
23 Cha Petro ndèymí Yohana nà ka ddâ tdè ngiy-dzà óddù ro, ndrǔ ngû ìdhí bbalè dè, ndrǔ tdrà ìdhí bbalè dhò, Drǎ ngá dyǎdjá mí ngúw djú drǒngóli ndèymí drò-dró ní kpa tdrà tdè ì dhò nì lò. 24 Ndrǔ rr̀ tdè fú ddiy ro, ndrǔ tdûw ì chuw rí ddìnga ó Drà nzz̀dha dhò. “Drǒngóli, nyi tdyà, rakpa ndèymí dziylíy ndèymí ju-ddà nà ndèymí ì ó wánì ddiy nà. 25 Ndruní nyi tdrà tdè Bblǒ Thíy nà màdhí bbúwní nyǐ ngá njí-dja Dawuddi tsò òluw, tdràdha nà:
“ ‘Ddudhò Yunani-ddúw ní thǒw nà?
Ddudhò ndrǔ ní ngǎ ndèy ónga nà nì lò ddey?
26 Dziylíy djú Pey ddúw thì tdè ì la dhò
Li djùkpa ddàdha djá njúw tdè ì tsò ddìnga ó
Drǒngóli ró ndèymí ǎngá Kristo ró.\f + \fr 4:26 \ft Fú nì, Kristo ǐngí Masiya. ǐngí vìydha ní li f*’
27 À nì dìychú, Herodde ndèymí Potiyo Pilato nà, njûw tdè ì ddìnga ó Yunani-ddúw nà ndèymí Israeli ó bbalè nà í drǒngó ní bba ó, nyǐ ngá thí ní njí-dja Yesu ró, cha nyi vìy tdè chì nà nì. 28 Chú ddiy wá cha ndrǔ njèy tdè nì, njèy ndèy cha nyi ddêy tdè à njěy ndèy njitsò djú níchú. 29 Nja-nja, drǒngóli rr ndrǔ nyú ddùdha; bbú nyǐngá njí-djá dhò ndrǔ tdrǎ nyìmí lò ngǎ do ní. 30 Dda nyi thokpa ónga ndaní à djǐ, à njěy wá li ónga ꞌwíy dhǒ manì ddiy ndèymí ddùw nà nyìmí thí ní njí-dja Yesu ró dho nà.” 31 Ndrǔ nzz̀ Drà ddiy dzzdjú, cha ndrǔ njûw tdè ì tsò mí nga jà ndey. Ndrǔ wánì ónga kì tdè Bblǒ Thíy nà, fú ddiy lêy ndrǔ tdrà Drà mí lò ngǎ do ní.
Ndrǔ thíy ndèymí ndrǔ dhí nga ddéydha wá tdè ddì
32 Ì ùw Drà mí lò nì ndrǔ thíy ndèymí ndrǔ dhí nga ddéydha nà tdè wá ddì. Li rò ddí tdè ngǎ cha ndèy tdrà ndèy thokpa ó ddiy nì ndèymí ndèyníddò ní, chú ndrǔ dêy ì nì ndanà nì ddiy wánì ónga ndǒ ì kàò luw. 33 Dyòw-djá kwô í ónga drǒngó ní klôw nà Drǒngóli Yesu mí ngúdha djiy ní dhi óddù, ndèymí Drà mí ndru tdè ndrǔ djú drǒ tǐ. 34 Li rò tdè ngǎ cha ndèy ró ddiy mí zòw nà nì ndrǔ kàó. Wánì nga nà cha ì tdè dziylíy nà ǐngí dzà nà nì dêy ónga dzz, ndrǔ dêy mí mb cha ì chùw ddiy ǒnga dzźdha óddù nì mbǎ ddìnga ó. 35 Ndrǔ dêy ley dyòw-djá kotéy ndaní ndrǔ ndǒ cha ì ró ddiy mí zòw nà nì ndrǔ dhò.