Njíkpà 3

Petro ndèymí Yohana nà pâ ndèy koko vêy nì kpatss̀ ddiy

1 Ddì nì ddu ó, Petro ndèymí Yohana nà dêy rǎ ru Drà-dzà dè, Drà nzz̀dha dhò, à tdè chow-chow sâ drrdhiy ngítss̀ djú nga mî. 2 Fúnga nà bbalè dêy véy ní ndèy koko vêy cha ndèymí gôw óddù nì kpatss̀ mbǎ Drà-dzà mí kaley cha ka íy nì Lǎní Kale-tsò nì tsò rò. Ka dêy à léy fungá wánì ddu ró ndaní à déy ddiy kwo cha ì nì tsǔw Drà-dzà mí bbay ò nì bbalè dè ddù. 3 À njà tdè Petro ndèymí Yohana nà tdè chow-chow tsùwdha nà Drà-dzà mí bbay ò ro, à kâ ddiy rò kwo ndrǔ tsò ró. 4 Petro ndèymí Yohana nà kâ nga njà ngbír à dè, Petro kâ tdrà à dhò, “Nja nga mà dè!” 5 Fú kpatss̀ kâ nga njà ndrǔ dè ro, à dêy ddey ndèy rà ney ddiy rò chùw ndrǔ dè ddù.

6 Chú Petro kâ tdrà, “Manì ngǎ mb rò ní, chú ma rà cha manì ndanà nì ddiy bbu nyi dhò. Nazareti ó Yesu Kristo ró dho nà, manì jǎ nyi dhò, ngbí nyi ndèymí nyi bbíy.” 7 Petro kâ à tduw ví òluw nì à thokpa nà, à kâ à ngbi ru. Ndùw fú kpatss̀ koko ndèymí à tdyòwtey nà kâ ngu klǒw. 8 À kâ ndèy ngbi ru, ka dèy ndèy koko djú ro, à kâ lòw dey bbiy. À kâ rà ndrǔ nà Drà-dzà mí bbay djò ndèy ídha nà ndèymí Drà mádha nà. 9 Bbalè wánì njà à tdè bbiy Drà mádha nà ro, 10 ndrǔ tsì tdè à cha ndèy dêy dǒw ddiy kódha dhò Lǎní Drà-dzà mí bbay mí kaley-tsò ró nì li ní, bbalè wánì ónga ꞌwìy cha ndèy njèy tdè ndèy fú kpatss̀ ró nì ddiydhò.

Petro tdrà tdè Drà mì lò Drà-dzà mí bbay djú ddiy

11 Cha ndèy kó nì ddiy nì li lòw tdè Petro ndèymí Yohana nà nì koko ro, bbalè wánì ónga ꞌwìy, ndrǔ kâ kòw ddìnga ó Petro mà dè cha ka íy nì Sulemani ngá dza gitéy nga ó. 12 Petro njà fú bbalè ro, à kâ tdrà ndrǔ dhò: “Israeli ó bbalè, nyì ónga ní ꞌwǐy ddudhò fǔchú í li ró? Nyì léy nyì nyú mà ró ŋǎchú fǔchú, gbè mà lêy fú li bbîy màdhí klôw nà, ǐngí mà dhi déydha cha ndèy nì Drà mí ɦiy nà nì dho? 13 Abrahamu ngá Drà, ndèymí Isaka ndèymí Yakobbo ngá nà cha mà bbúw dêy nzž nì, bbû madha nděyngá njí-dja Yesu dhò. Nyì bbû tdè à, à mí ndrò-djá thokpa ó, nyì djà à Pilato nyú djú, à jì tdè ndèy kló à ro. 14 Chú nyì gù nzǐ ka kló thí ní li ndèymí chǒw ní ddiy ndèy nì njěy nì li, nyì ùw ndèy hwì bbalè nì li ka bbú nyì dhò. 15 Nyì hwì Yesu cha ndèy lêy bbalè déy ndruteyró nì djiy nà nì, chú Drà ngù à djiy ní dhi óddò. Mà nì fú lò ì tsì nì ndrǔ. 16 Yesu ró dho mà ùw ddiydhò, fú dho chú lêy í kpatss̀ ngû klǒw, cha nyì njà, nyì tsì tdè níchú. À nì Yesu ró dho ndèymí à mí ùwdha nà lêy ndey fú kpatss̀ ngû lǎní cha nyì njà níchú.

17 “Nja-nja ma-djú, ma tsì nyì njèy fú ddiy nzá ì tsì lò nì bbalè níchú, cha nyì djùkpa ì nì ddǎ nì kpà níchú. 18 Chú, í nì cha Drà tdrà tdè ndrǔ dhò nabi-kpà tsò ró nì ddiy. À tdrà tdè, Kristo ndèymí à lêy fú ddiy njèy ndèy dìychú. 19 Fúddiy dhò, nyì lí nyì dhà rónga nyìdhí ngǎjìní njeydha óddù, nyì lí nyì Drà dè, ndaní nyìdhí cherr sǎ ndèy gudjò. Fú nyì ngùdha lǎní nì rà shì Drà dèddò, 20 Drà rà Drǒngóli Kristo cho cha ndèy nì Masiya nì ŋà ndèy vû nyìdhò nì, à nì Yesu. 21 À kà à dey rakpa ò pbǔw cha Drà vû nì nga djò cha ndèy rà wánì ddiy ngù ndèy rr̀dja ò, à tdèy tdè ndruteyró nděyngá thí ní nabi tsò ró níchú. 22 Ddiydhò Musa tdrà tdè, ‘Drǒngóli nyìdhí Drà rà nyì dhò nabi ngbi nyìdhí pbúw kà-óddù gbè ma níchú. Nyì kà nyì rř fú li wánì ddiy ó cha à rà tdrà nyì dho nì. 23 Bbalè wá, cha nzǐ ì rà nabi chuw rr̀ nì, ka rà fú ndrǔ dda gudjò nděyngá bbalè kà-óddù.’

24 “Dìychú, nabi-kpà wá cha ì tdrà tdè fú lò nì, à nga ndèy Samweli róddò ndèymí à dzzdjú kpa nà tdrà fú ddu ró lò. 25 Nyì nì nabi ngá ddèy, nyì ddí nì cha Drà tdèy tdè nyìdhí bbuw nì dhò nì yǎdha tdèydha ó. Ddiydhò Drà tdrà tdè Abrahamu dhò, ‘Fú li ó ddèy òluw, dziylíy djú bbalè wá rà brû chùw.’ 26 Drà ngbîy nděyngá njí-djá ru ro, à chô à nji nyi dè, à bbû nyìdhò brû, nyì lídha nà nyìdhí ngǎjìní njeydha óddù.”