Bblǒ Thíy shì Yesu kodjú kpa djò ddiy
2
1 Pentekote a mí ddu ó, cha ì ùw Yesu nì kpa wá tdè ddìnga ó. 2 Fúnga nà, ddiy chuw rò shì ru rakpa óddò gbè rí ní viy níchú! Fú ddiy kì věy cha Yesu kodjú kpa njûw tdè i ǒmá nì dza ó. 3 Ndrǔ njà tdè kàss dà níchú nì ddiy ndò ndèy ka dòw wánì bbalè djòluw. 4 Bblǒ Thíy bbû kpa dhò kpá-kpá-nga, fú ddiy lêy ndrǔ lòw dey ngéy-ngéy ní lò-tsò tdrǎ cha Bblǒ Thíy bbû ì dhò níchú.5 Fúnga nà, Yahuddi-ddúw ì tdè Drà dò njěy nì, cha ì shì ngéy-ngéy ní drò-dró ní bba óddù nì tdè dey Yerusalemu ó. 6 Ndrǔ rr̀ tdè í ddiy chuw ro, bíy ní ndrǔ njûw ì ddìnga ó. Chú, ndrǔ ónga ꞌwìy wá ddiydhò ndrǔ dêy lò rř ndrǔ nì tdrǎ ìdhí déy ní lò-tsò nà cha ì shì mí nga óddù nì.
7 Ndrǔ ónga ꞌwìy ddiy nà, ndrǔ dhîy, “Í kpa wá cha ì nì í lò těy nì shí ná ngǎ Galilaya óddù? 8 Ddudhò mà ní ndrǔ nì tdrǎ nì lò rř màdhí lò-tsò nà? 9 Mà kàó njàddí ndrǔ shì Partiya óddù, njàddí ndrǔ Midiya óddù ndèymí Elam nà. Njàddí ndrǔ nì Mesopotamiya óddù, Yuddeya, Kapadokiya, Pontiyo ndèymí Aziya nà. 10 Njàddí ndrǔ rò shì Furujiya óddù ndèymí Pamfuliya, Misiri ndèymí ngéy ní ngòw gitèy Libiya ó nì cha ndèy nì chow Shami nà nì óddù, Roma óddù nì lu, 11 Yahuddi-ddúw ndèymí Yunani-ddúw cha ì ùw tdè Yahuddi-ddúw dhí ddǐnì nì kpa nà, Krete ó kpa ndèymí Arabiya ó kpa mà rr̀ ndrǔ nì lò těy ìdhí bba ó lò-tsò nà cha Drà njèy nì ddùw dhò!” 12 Ndrǔ ónga ꞌwìy wá ì ónga nì tdǒ ddiy nà, kpa dêy ì dhiy ì kàò luw: “Í ddiy mí lò-tey ní ddu tdrǎ?” 13 Chú, njaddí ndrǔ děy kpa njǎ gbè ngǎ nì ddiy níchú. “Ndrǔ dêy tdrǎ tdè fú kpa rr̀ wa nà.”b
Petro tèy lò bbalè dhò Pentekote mí ddu ó ddiy
14 Petro ngbî ndèy ru ddìnga ó dri ndèy djú ddì na nì kpa nà ro, à kâ lò tdrà rí ní ndèy chuw nà bíy ní bbalè kpa dho, “Màdhí ngá Yahuddi-ddúw ndèymí cha ney ì nì Yerusalemu ó ndrǔ nà wá, nyì rr̀ cha manì tdrǎ nì lò. 15 Í bbalè rr̀ nzá rr̀dha ní gbè njàddí ndrǔ nì ddey níchú. Nga nì děy sâ gbow bbǔw-bbúw nga mî! 16 Chú, í nì cha nabi Yowel tdrà tdè nì lò,
17 “ ‘Drà tdrà tdè, Luwtéy ddu ó,
Ma rà màtsá Thíy ddù wánì bbalè djò.
Ddúw nyí ndèymí dhá nyí rà lò dhò,
nyìdhí kpa ní nzòw rà ddùw njà,
nyìdhí bba-djá rà nyu nyù.
18 Fú ddu ó, ma rà màtsá Thíy bbuw màtsá nokpa ní kpa ndèymí
noyi ní dhì dhò,
ndrǔ rà ndanà lò tdrà cha ndèy rà shì nì lò djò.
19 Ma rà ddùw njèy ru rakpa ó,
ndèymí dziylíy djú ɦiy ró
jǔw, kàss ndèymí kwo mí nduw-nduw nà.
20 Itsś rà ndèy li ków
bǐy rà ndèy li ngbú jǔw níchú
fú ddiy rà ndèy njèy wá děy nzá Drǒngóli ngá lò-tdèydha mí ddu shì ní.
21 Chú, cha ndèy rà
Drǒngóli ró dho iy nì li rà pa.’
22 “Israeli ó kpa, nyì rr̀ í lò! Nazareti mí bba ó Yesu tdè cha Drà chô nyì dhò ddùw, wá li ónga ꞌwíy dhǒ mànì ddiy ndèymí ɦiy nà cha Drà njèy nyì kàó à dè nì nga là djòluw, cha nyì tsì níchú. Nja-nja fú ddiy nì dìychú, 23 í kpatss̀ Drà bbûw tdè nyì dè lò-tey nà ndèymí Drà mí lò-tsìdha nà, nyì ì jì ngǎjìní bbalè nà nyì hwì à, à chódha nà tàdha ní tsúw djú. 24 Chú, Drà ngù fú li djiy ní dhi óddù, à klô à dhi mí nzadha óddù, ddiydhò ddiy kà tdè nzá dhi déy klôw nà à djú. 25 Ndruní Pey Dawuddi ndîy cha Masiya tdrà tdè nì ddiy:
“‘Ma njà Drǒngóli wánì nga nà ma nyú djú.
Ddiydhò, à nì ma thokpa ví òluw nì djòluw.
Ma rónga rà bbìy nzǐ.
26 Fúddiy dhò, ma thíy nì hwî nà, ma dà nì nyi ma,
ma rónga ddi rà dey cha ndèy dêy nyi djú ddiy nà,
27 ddiydhò nyi rà ma bbà nzǐ tdôw dzìy ò,
ǐngí nyi rà nyìmí Thí ní Li bbà nzǐ à ŋwǒ.
28 Nyi lêy djiy ní déydha mí tuw tsì ndèy ma dhò.
Nyi rà ley ma rà kì hwî nà nyi nyú djú.’
29 “Mà-djú cha ì ùw Yesu nì, ma kà ma tdrǎ nyì dhò ma jùw klǒw ní nà, màdhí bbuw Dawuddi dhì, ka tdòw tdè, àmí tdôw dzìy nì mà kàó pbǔw ndu. 30 Dawuddi tdè nabi ddiydhò, ndèymí à tsì tdè Drà tdèy ndèy dhò nga wádha nà, Drà rà nděyngá ddèy rò tduw ddì à rà Pey nyù ndèy rr̀dja ó. 31 Dawuddi, cha ndèy njà tdè Drà nì rǎ njèy njitsò djò nì ddiy nì li, fú ddiy lêy à tdrà Kristo rà ngu djiy ní ddiy ndèymí nyi rà nyìmí Thí ní li bbà nzǐ à ŋwǒ tdôw dzìy ò. 32 Drà ngbî í Yesu dhi óddù djiy ò, mànì fú lò ì tsì nì ndrǔ. 33 Fúddiy dhò Drà tdûw Yesu ndèy thokpa ví òluw nì djò ru rakpa ò, à chùw Bblǒ Thíy Djǎnì dèddù cha à tdèy tdè nì, à ddùw fú ddiy cha nyì nì njǎ ndèymí cha nyì nì rr̀ níchú. 34 Dawuddi djèy nzá rakpa ò, chú à kâ tdrà,
“Drǒngóli Drà tdrà, màtsá Drǒngóli Yesu dhò:
Dow màtsá drǒngó-ní-nga ó ma thokpa ví òluw nì djòluw,
35 pbǔw cha ma rà nyì mí ndrò-djá ley nyi ko-ss̀téy tsúw-djùw ní.”
36 “Fúddiy dhò, bba Israeli mí pbúw wánì tsǐ, Drà lêy Yesu, cha nyì chô tdè tàdha ní tsúw djú nì Drǒngóli ndèymí Kristo ní.”
37 Bbalè rr̀ fú lò ro, zòw lòw ndrǔ, Petro ndèymí njàddí Yesu ngá dyòw-djá kâ tdrà, “Mà-djú cha ì ùw Yesu nì, à kà ná mà njěy ddu?”
38 Petro ngù lò, “Nyì lí nyì dhà rónga, nyìdhí cherr óddù, nyì low bàtízò, bbalè wá Yesu Kristo ró dho nà nyìdhí cherr sàdha dhò. Nyì rà Bblǒ Thíy ko Drà dèddò. 39 Í lò-tdèydha nì nyì dhò ndèymí nyì ó ddèy nà ndèymí ngéy ní bbalè nà wá cha ì ùw nyi nì nà ndèymí wá cha Drǒngóli Drà rà iy nì ndrǔ nà.”
40 Chú, à dhò ndèy bíy ní ngéy ní tuw òluw, à chêy ndrǔ, à dêy tdrǎ, “Nyì uw Drà pá nyì ndaní nzánà à dhěy nyì ddìnga ó ìnì ngǎjìní ddiy njěy nì ndrǔ nà.” 41 Cha ì ùw àmí lò nì ndrǔ dhò ka bbû bàtízò. Bbalè chow-chow peytey gbow nì ndrr̂ ndrǔ kíyddà. 42 Ndrǔ dêy sǔw cha dyòw-djá dhí li-tsò njúwdha ndèymí li-gwíydha nà, ì chèy tdè ì jùw ddì ddiy nà, mùkátì ónga pbrr̀-dha nà ndèymí Drà nzz̀dha nà ddí.
Cha ì ùw Drà nì ndrǔ dhí déydha jì
43 Dyòw-djá njèy ddùw ndèymí drǒngó ní ɦiy nà, fú ddiy lêy do lòw wánì bbalè. 44 Cha ì ùw Yesu nì ndrǔ wá tdè ddì nga ó ro, ndrǔ dhí ddiy wá ddí tdè tsò nì njúwdha ní. 45 Njàddí ndrǔ dzẑ ìdhí dziylíy ónga ndèymí ì tdè ndanà nì ddiy nà, ndrǔ ndò bbalè wánì dho cha ì ró ddiy mí zòw tdè nì. 46 Ddu wánì ró ndrǔ dêy ì njuw ddìnga ó Drà dzz̀dha dhò Drà-dzà mí bbay djú, pbrr̀dha ní mùkátì nà ìdhí bba òluw, ndrǔ dêy mí nyû kwo hwî nà, ì jùw dèy ddì ddiy nà, 47 Drà mádha nà. Ndrǔ chùw lǎní ddiy bbalè wánì nyú djú. Drǒngóli dêy cha ì nì pa nì ndrǔ kíyddà ndrr ndey ndrǔ dhò wánì ddu ró.