Njíkpà
Dyòw-djá dhî
Yesu ka tdûw ru rakpa ò ddiy
1
1 Drǒngó li Tewufilo, màtsá njitsò djú nì bǔkù ó, ma ndîy tdè nì ddiy nì cha Yesu lòw dey njèy tdè nì ddiy wá ndèymí à dêy gwiy nì lò-tsò ngà ndèy mí nga djúddò nì, 2 kpòw ka tdûw à ru rakpa ò mí ddu ò, à bbû fú yǎdha kpà Bblǒ Thíy tùw òluw dyòw-djá dhò cha ndèy vû tdè ndrǔ ddiy dzzdjú. 3 À nzâ tdè ndèy tàdha ní tsúw djú ddiy dzzdjú, à dhò ndèy djiy ní ndèy kodjú kpa dhò ddu drì-drí nga tho nì dhò ndèymí à kâ lò tdrà ndrǔ dhò Drà mí Pey mí nga djò. 4 Ddì ní à njûw ndèy kpa nà ro, à kâ tdrà kpa dhò, nzǐ nyì ddá nyì Yerusalemu óddù, chú nyì pbǒ mà dja tdèy nyì dho nì lò cha nyì rr̀ ma tdè tdrǎ nyì dho níchú. 5 Yohana bbû tdè bàtízò dda nà, chú drá ní ddu ó nyì rà bàtízò lòw Bblǒ Thíy nà.6 Ndrǔ njûw tdè ì ddìnga ó ro, kpa kâ dhiy à tsò ró, “Drǒngóli, ddiy ná fú nga nà, nyi ní rǎ Israeli mí Pey mí nga ngù?” 7 Yesu kâ lò ngù kpa dhò, nyì kà nzá nyì tsǐ fú sâ ǐngí fú ddu cha Drà thì ndèymí klôw nà nì. 8 Chú nyì rà klôw chùw Bblǒ Thíy rà shì nyì djò ro, fú nga nà nyì rà tdè à djò ì nì lò těy nì kpa ní Yerusalemu ó, Yuddeya ónga chú dzò, Samariya ó ndèymí kpòw dziylíy tsò tdôw mí nga ò. 9 Fú ddiy Yesu tdrà tdè ro, Drà kâ à tduw ru rakpa ò. Kpa tdè à njǎ ro, nduw-nduw kâ à rónga tsò tà kpa nyú djú ddò. 10 Kpa tdè nga njǎ chǒw ru rakpa dè cha Yesu tdè rǎ ro, fú nga nà rwo nì kpa ì thô ì ró sárŕ ní rù nì kâ shì ndrǔ dè. 11 Kpa kàó ddì li kâ tdrà ndrǔ dhò, “Galilaya mí dziylíy ó bbalè, ddudhò nyì děy ingá, nyì nì nga njǎ rakpa dè ní? Í Yesu, cha Drà tduw rakpa ò nyì kà-óddù nì rà ngu dziylíy djò ddí fǔchú cha nyì njà à nì rǎ níchú.”
Matiya ka vû Yudda Iskariote rìdja ó
12 Yesu kodjú kpa kâ ngu Yerusalemu ò, Olive ní ka dêy íy nì ngòw djúddò cha ndèy tdè Yerusalemu kuwtsó ddò chow-chow kìlómìtà ddì nì mí bbiydha ní cha Yahuddi dhí yǎdha ùw sabato mí ddu ó nì. 13 Ndrǔ shì tdè ro, kpa djî njàddí dza djú ka ss̀ nì dza ò, cha ndrǔ dêy dey ǒmá nì ó; fú dza ó tdè Petro, Yohana, Yakobbo, Anderiya, Filipo, Tomasi, Batolomayo, Matayo, Yakobbo Alifayo mí ddùw-nì, Simoni, Zelotea mí bbalè kàó li, ndèymí Yudda, Yakobbo mí ddùw-nì. 14 Ndrǔ dêy ì tsò njuw wánì nga nà ddìnga ó Drà nzz̀dha dho ì jùw ddì nì nà. Dhì ní ndrǔ, Mariya Yesu mí yânì ndèymí Yesu mí djúní mànà.
15 Drá ní ddu dzzdjú, mà-djú cha ì ùw Yesu nì, 120 nì njûw tdè ì ddìnga ó ro, Petro kâ ndèy ngbi ndrǔ kàó, 16 “Ma-djú cha ì ùw Yesu nì, ndru ní, Drǎ ngá ndíydha ní lò à jì à njěy ndèy cha Bblǒ Thíy tdrà tdè Dawuddi kow ó luw níchú Yudda ró dho nà cha à bbû tdè ndanà Yesu à mí ndrò-djá thokpa ó nì lò, nja-nja à njèy ndèy dìychú. 17 À tdè mà kàó ddì li, à njèy njí ddí mà kàó.” 18 Yudda dzz̀ dziylíy ka bbûw ndèy dhò ngǎjìní ddiy njèydha mí mb nà. À chèy dziylíy djò, à ónga kpà ndèy kpǔ, à zz̀ nyà ndèy kpa wá rúgò. 19 Yerusalemu ó bbalè wánì rr̀ í ddiy ro, ndrǔ îy fú nga ìdhí lò-tsò nà Akeldama ní, mí lò-tey nì, Jǔw mí nza.
20 Fúddiy dhò, Petro kâ tdrà, Dawuddi ngá ngo mí bǔkù ó à ndîy ndèy ǐchú,
“ ‘Bba í dza ónga,
nzǐ léy li rò déy fulè dzá.’
Ndèymí,
‘Nyì léy ngéy ní li njěy fú li rr̀dja ó njí.’”
21 “Fúddiy dhò, à jì mà vú ddì li cha ndèy tdè mà nà wánì nga nà cha Drǒngóli Yesu tdè mà nà ndèymí cha à tdè bbiy rúgò mà kàò luw ro, 22 à nga ndèy cha Yohana bbûw àdhò bàtízò mí nga djú ddò, pbǔw ka tdûw à ru rakpa ò mí nga djò.”
23 Ndrǔ bbû bbalè rwo nì ró dho: Ddì li tdè Yusufu cha ka îy tdè ddí Barsaba ní, dja-nì ró dho tdè Yusto, ndèymí Matiya nà. 24 Ndrǔ wá kâ Drà nzz̀ yà ì nì tdrǎ ǐchú! “Drǒngóli, nyi njà bbalè thíy ónga wá, dho màdhò cha nyi vû nì li í bbalè rwo nì kàó ddù, 25 ndaní à njěy cha dyòw-djá rà njěy nì njí Yudda bbà nì, à rà cha ndèy jì mí nga ò nì.” 26 Ndrǔ bû dyǎ, dyǎ chèy Matiya djú, ka ndrr̂ à dri ndèy djú ddì nì dyòw-djá kíyddà ní.