LUWKA
ndîy nì hwî mí lò-ɦéy
Í bǔkù ó ndèy chùw ndèy nì lò-kpà òluw nì drò-dró ní lò.
Luwka ndîy nì hwî mí lò-ɦéy Yesu djú ddù, gbè Israeli mí kòní ndèy ddu ka kò nì Li pádha-dja, dziylíy djú ndrǔ bbúw-djá wánì ndrǔdhí Li pádha-dja. Luwka nì tdrǎ nì ddiy tdè Drǒngóli, Drà-thíy îy tdè Yesu, ndaní ndèy mbǎ lǎní hwî mí lò-ɦéy, nzání ì nì ì nza nì ndrǔ dhò (4.18). Fú hwî mí lò-ɦéy-ónga kì tdè lò ddiy nì těy ngéy-ngéy ní ɦùw jì nà nì ndrǔ-tsi djò. Luwka mí bǔkù ó hwî djò ndèy tèy lò nì lò màddí mí nga ddéydha-djò kpa-tsò dda ddání; drǒngó ní ddiy nì lò-tsò ngà ndèymí shàpítà ó. Fú nìchú nì Yesu rà ngu mí lò-ɦéy tdrǎ, fú ddiy kíyddà ní, fú lò-tsò nì ndèy si mí nga ó, nì rakpa ò Yesu djî ddiy. Ùwní ì ùw nì ndrǔdhí uwdha nì dhǐy ddiy mà, à nì ndèy ónga piy Yesu djî rakpa ò ddiy dzzdjú, fú ddiy ó ndèy nì lò těy nì li nì, ndèy ndîy dyòw-djá dhí bǔkù nì ddì nì fú li nú.
Fú bǔkù ónga ka ndò rwo nga là djú (Shàpítà 1-2 mà, 9-19 nà nì djò). Fúnì ó lò-kpà nì věy, ddiy chùw ndèy í hwî mí lò-ɦéy ó chú ddì: Gbè malayika dhí ngo, měyá rónga ì dêy pbǒ nì kpa rà tdè Yesu rónga njǎ ddiy mà, Yesu nì Drà mí dza ó děy ndèy nì sìrì ní ngba nì ro ddiy mà, Samariya mí ngòw ó lǎní li mà, ndèymí ddùw-nì vîy víyní nì li djú lò ró ji mà kpà nà. Hwî mí lò-ɦéy òluw plûw, ka lêy li-nyú Drà nà ka nì lò těy ddiy mà, Bblǒ-thíy mà, dhì ní ndrǔdhí njí Yesǔ ngá dhǐy kàó ddiy mà, Drà nì ndrǔdhí cherr-kpà sǎ ddiy mànà djò.
Í bǔkù ó ndèy chùw ndèy nì lò-kpà-ónga ka kpì ddiy
Í bǔkù ó ndèy chùw ndèy nì lò-kpà ó drò-dró ní lò 1:1-4
Bàtízò ndèy dêy bbu nì Yohana mà, Yesu gòw ndèy ddiy mànà, děy nzòw ní kpa tdè ddiy mànà 1:5; 2:52
Bàtízò ndèy dêy bbu nì Yohana njèy nì njí 3:1-20
Yesu mí bàtízò mà, Setani mbù à ddiy nà 3:21–4:13
Ndrǔ nyú djú Yesu njèy Galilaya ó nì njí 4:14–9:50
Galilaya mí ngòw óddù, Yerusalemu mí drǒngó ní bba ò 9:51–19:27
Yesu mí djiy-tsò tdyâ ndèy ǒmá nì yěngà 19:28–23:56
Djiy ní Drǒngóli Yesu ngû ddiy mà, dhòní à dhò ndèy ddiy mà, rakpa ò à rà ddiy mànà 24:1-53