Pawulo nì Melita mí juw djú
28
1 Cha mà shì tdè ndèy ꞌwìy nì nga djò ddiy dzzdjú, mà tsì mí juw djú nga ka íy nì Melita. 2 Juw djú bbalè kwô tdè mà lǎní. Ndrǔ vû kàss mà kwódha dhò ddiydhò dji tdè kwo nga ddí tdè shú. 3 Pawulo njûw tdè tsúw gilá kpà ro, à lêy tdè ddí kàss djò, ngìydhá kâ shì ǒmá ddò kàss mí líy ní nga dhò, à kâ Pawulo bbì ka ndèy bblìy à thotèy ró. 4 Juw djú kpa njà ngìydhá nì ndèy bblǐy à dhotèy ró ro, ndrǔ tdrà ì dyasi dhò, “Í kpatss̀ kà ndèy déy li hwìdha dja ní; yakpe à pâ ju-ddà óddò, lò-ndòdha ùw nzá fú li déy djiy ní.” 5 Chú Pawulo jà fú ngìydhá kàss ò, ngìydhá nyû à rónga nzá. 6 Bbalè dêy ddey à rà kì ǐngí à rà chèy gudjò ka dhì, chú cha ndrǔ nà ddiy rò tdè ngǎ ndèy njèy ndèy à ró nì ro, ndrǔ lîy ìdhí ddeydha ndèymí ndrǔ tdrà à nì gú.7 Fú nga tdè chow fú juw djú pey ngá nza nà, à ró dho tdè Pubiliyo; à kwô mà, à pbò mà lǎní ddu gbow nì dhò. 8 Pubiliyo mí djǎnì tdè ndèy nza ndèy rónga gbîy ddiy nà ndèymí jǔw-dhì nà ra djú: Pawulo tsùw à dè ndèymí à nzz̀ Drà, à lêy ndèy thokpa à ró à djì ndanà à rónga. 9 Í ddiy njèy tdè ndèy ro, ì mà tdè juw djò dhi nà nì ndrǔ shì ndèymí ndrǔ rónga ddí djì. 10 Ndrǔ bbû mà dhò mádha bíy ní tuw nà ndèymí mà thì tdè mà bbiydha dhò ro, ndrǔ bbû tdè mà dho cha mà jì tdè nì ddiy.
Pawulo shì tdè Roma mí bba ó ddiy
11 Bǐy gbow nì dzzdjú mà ngà bbiydha tsò dda ó tuw nà Iskaderiya óddù ndèy shì nì drǒngó ní ngǒ nà cha ndèy dèy tdè juw djú grr̀ mí bǐy nà nì, à tdè ndèy djòró zu mí dyàdha ní gú mí ɦiy nà ndèy ró dho nà Kasto ndèymí Poluke nà. 12 Mà shì ngǒ dey nì mí nga ó cha ndèy nì Surakusa mí drǒngó ni bba ó, ndèymí mà děy fungá ddu gbow nì dhò. 13 Fu nga óddò mà lêy mà bbiydha nà dda ó tuw nà ndèymí mà shì Regiyo mí bba ó, nêyngá bbǔtss̀ ro bbiy nì nga là djò nì vi lòw dey vu, nêyngá bbǔtss̀ ró mà shì tdè Puteoli mí bba ó. 14 Fulè mà chùw njaddí cha ì ùw Yesu nì kpa cha ì îy tdè mà déy ì nà ddu zarngbò nì dhò fulè. Fúddiy dhò mà rà Roma mí bba ò. 15 Ì ùw Yesu nì kpa fulè nì rr̀ tdè mà tdè shǐ ro, fú ddiy lêy ndrǔ rà mà tsò tdèy Apiya ò ndèymí njàddí ndrǔ rà Gbow nì ddùdha mí nga ó. Pawulo njà tdè í kpa ro, à bbû madha Drà dhò ndèymí à jùw ngû klǒw. 16 Mà shì Roma mí bba ò ro, ka ùw Pawulo dhò à déy ndèy ddǐ ddi ní ndèymí la-dzàdha dja nà à rónga pbòdha dhò.
Pawulo tdrà lò Roma ó ndèy rónga pbòdha djá nà
17 Ddu gbo nì dzzdjú Pawulo îy Yahuddi-ddúw dhí li-djùkpa ddàdha djá ddìnga ó. Ndrǔ njûw tdè ì tsò ro, Pawulo tdrà ndrǔ dhò: “Ma-djú Yahuddi-ddúw, yakpe ma njèy ddiy rò nzá màdhí bbalè ró ǐngí màdhí bbúw dhí bbachá ró, ka chèy ma Yerusalemu ó ndèymí ka bbû ma Roma-ddùw dho-kpa ò. 18 Ndrǔ njà màtsá lò ónga ndèymí ndrǔ jì tdè ì ddá ma, ddiydhò ndrǔ chùw ngǎjìní ddiy nzá ma ró cha ndèy kâ tdè dhi nà nì. 19 Chú Yahuddi-ddúw tsâ tdè cha Roma mí li-djùkpa ddàdha djá jì tdè ì njěy nì ddiy ró ro, fú ddiy lêy ma kwô tdè Kayisari dè, à tdè ngǎ mà tdè lò rò nà cha ma, ma lêy màtsá bbalè ró. 20 Fúddiy dhò ma dhîy ma njǎ nyi ndèymí mà těy lò nyi nà, ddiydhò ma tdè shúdha ní nyòr nà Israeli mí lò djú.” 21 Ndrǔ ngù lò, “Mà chùw ndíydha nì lò nzá Yuddeya óddò nyìmí lò djò ndèymí djúnyí rò tdè ngǎ cha ndèy shì fúlè ddò nì cha ndèy ngù lò ǐngí à tdrà ngǎjìní lò nyi ró. 22 Chú mà jì mà rr nyìmí ddeydha, ddiydhò mà tsì bbalè wánì nga òluw nì lò tdrǎ ngǎjìní í ndòdha ró.”
23 Ndrǔ jì ì njúw ì Pawulo mànà njàddí ddu ó ndèymí ndrǔ shì ddí ì hó nà bíy cha Pawulo tdè dey mí nga ò. Bbǔw-bbúw nga djúddò pbǔw ngítss̀ nga djò à tûw fú lò ónga ndèymí à dhò ndrǔ dhò Drà mí pey mí nga djú lò ndèymí à tdêy ndèy chéy ndrǔ Yesu mí lò nà Musa ngá yǎdha óddò ndèymí nabi nà. 24 Njaddí ndrǔ ùw tdè cha à tdrà tdè nì lò chú njaddí ndrǔ ùw nzá. 25 Ndrǔ tsâ tdè ì kàó ndèymí ndrǔ lòw dey rà cha Pawulo tdrà tdè ndèymí luwtéy lò ddiy dzzdjú. “Bblǒ Thíy tdrà dìychú ní lò nyì bbúw dhò cha à tdrà tdè nabi Isaya dè luw:
26 “‘Ra í bbalè dè ndèymí nyi tdrǎ,
“Nyì rà dèy rr̀ rr̀dha ní, chú nyì rà tsì nzǐ,
nyì rà dey njà njàdha ní, chú nyì rà ǒnga tuw nzǐ.”
27 Ddiydhò í bbalè thíy ngû djǐ-djǐ,
ndrǔ gi ddí nì ngá rr̀ nzǐ,
ndèymí ndrǔ pbîy ì nyú.
Ndaní nzánà ì njǎ ì nyú nà,
ndrǔ rr ì gi nà,
ndèymí ndrǔ tsǐ ì thíy nà,
ndèymí ndrǔ lí ì, ndaní ma léy ì rónga djǐ.’
28 “Fú ddiydhò, manì jǐ nyì tsǐ Drà mí gôw ka chô Yunani-ddúw-kpà dho, ndèymí ndrǔ rà rr̀!” [ 29 À tdrà fú lò ro, Yahuddi-ddúw ngbîy ì drǒngó ní lò-ddéydha nà ì kàò luw!]a