Yùxanà
rè sɛbɛn fiira faumaà
Sɛbɛɛn kaɔ nìì reè rè, ko dzwɛɛ̀
1
1 Mun ɲɛynamoo kur'là bɔɔ̀, nèe mun nè sɛbɛn, è sìn Ŋaablà re tàan ɲankɛrɛunmaà ko e dzin nèè rè rà, mun twɛy nìì reè kɛ̀niɔ̀n è ɲɛn sààbeen tsɛ. À na mun soo re è kɛ̀niunma waa, ŋà nìì reè sapɛ rii sààbeen tɔɔ̀. 2 Ɲe ye kɛ̀niɔ̀n sààbeen kamà, tɔ̀ sààben niì ni mùn ɲan, è bà nà to tsùù mùn ɲan kudɛyn. 3 Àwà Ŋaablà ɲanwùɔ ko màtsur'la, ko jaanciàn, è bo Fà Ŋaablà ko Yesù Kirisà, Fà Ŋaablà Dzin Kpir'la rè, twɛy nà bà ni mùn ne, è ɲɛn sààbeen ko kɛ̀nbààbee tsɛ.Yùxanà nìi dèu sààbeen ko kɛ̀nbààbee tsɛ
4 Mun taama dzibeu cɛyn m'a jà, ci mùn Fà Ŋaablà dzugooma xɔù nìi tàrau, è kòrò tɔ̀ ka, wo dzin nèè swey jìɛ sààbeen shia tsɛ. 5 Àwà naà, mun nìi gaa wo re dòònun, tɔ̀ rii yɛ ci mùn ye e si kɛ̀n. Mun tɔ̀ niì sɛbɛn kaà wo re, tɔ̀ na dzugooma xɔù yeu waa, ŋà mùn nìi tàrau fɔ dan. 6 Kɛ̀nbààbee rìì yɛ, mùn y'a dzugooma xɔù rèè shi jiì. Ye dzugooma xɔù rìi myɛ̀un fɔ dan, ye yè bà ni à shi jiì, tɔ tɔ̀ rii.
Yùxanà ci nìì reè sànfiribaa ko Kirisà ɲan
7 Àwà sànfiribaa giri boo dziɲaan doùn, nìì reè na e tsiɛ à ra ci Yesù Kirisà nàu gɔɔ̀n ɲàn waa. Twɛy rìì kir'là sànfiribaà, ko Kirisà ɲaàn. 8 Ye e yɛrɛ kaàwɔ ! Tà tsuru, ye mà nà fɔn ɲe re faagoò tɔ̀n'nà ɲàn waa, ŋà ye yè sàrà dzii tsyɛunma tàrà. 9 Mòò o moò na toò Kirisà raa kàr'nà tsɛ, fɔ à sɔn ni bà beè à tɛ̀y, tɔ̀ na Ŋaablà taraɔ̀ waa. Ŋà mòò riì toò tà kàr'nà tsɛ, tɔ Fàà ko Dzin Kpir'la sa taraɔ̀. 10 Mòò o moò ma na tɔ̀ kàr'nà ka e re, e maà e tsiì à ra e re gàne rɔ̀n, e to mà à tswà tsu waa. 11 È ɲɛn à tsɛ mòò riì y'à tswàa, tɔ̀ sa dzyèeŋnà à ka e re faadzii ɲaan neè doùn.
Yùxanà rè goomaa lataan, ko tswɛ̀ɛ